1st. Sunday : Pathianni tina chhuak ṭhin, 'Zalen' chanchinbu chu a chhutna offset press in power supply an neih ṭhatloh avangin chanchinbu an ti chhuak lo.
2nd. Monday : MZP ten kumtina an tih ṭhin angin 'Mizo zirlai ten hnamdang nupui/pasala neilo tura inzirtirna leh intiamkamna ni' an buatsaih a, Aizawla sikul hrang hranga zirlai te hnamdang neilo turin an intiam hlawm. Hnamdang neilo tura intiamna hun hi kum 2015 aṭang khan September ni 2 apiangin an hmang ṭhin a ni.
3rd. Tuesday : NEXA Aizawl motor thar, Multi-Purpose Vehicle, Maruti Suzuki XL6 chu an showroom, Ṭhuampui-ah Minister, Pu R. Lalzirliana'n a tlangzarh. Maruti XL6 hi Zeta leh Alpha version-a siam a ni.
4th. Wednesday : Mizorama cham mek, Union Minister of State for Food Processing Industries, Rameswar Teli chuan Aijal Club-ah North East Schedule Castes - Schedule Tribe Entrepreneurs Conclave - 2019 a hmanpui.
5th. Thursday : Mizo ten kan nghahhlelh em em, Mizoram Primier League, Session - 8 chu Lammualah ropui takin AIFF Player of the year pawh lo ni tawh, Hnahthial tlangval, Jeje Lalpekhlua chuan a kick off. MPL club fan au ring ber, Venghnuai FC awmna lamah ball hi a pet a ni.
6th. Friday : PRISM Party chuan General Assembly an hmang a, he hunah hian kum 2019-'22 chhunga an hruaitu tur te an thlang nghal. President atan president ṭanglai, Pu Vanlalruata bawk an thlang leh a ni.
7th. Saturday : Chief Minister pisa tualah Bharat Hitraksha Abhyian inti ten Tripura Transit Camp-a Tuikuk awm mekte thlavang hauh na'n Sit in Demonstration an nei. He huna pungkhawm te hi Zoram pawn Parliament Member (MP) rual niin mi 120 lai ni'a hriat an ni. An ni hian CM hnenah hian memorendum an thehlut nghal.
8th. Sunday : Mizorama kohhran pawl hrang hrang ten Naupang Sunday School Inkhawmpui an hmang. Naupangte hian hla, chang leh thu in chhang hmang tein Pathian an chawimawi a ni.
9th. Monday : Hmarchhak biala BJP kaihhruaina hnuai-a an intelkhawmna, Northeast Democratics Alliance (NEDA) chu Gauhati-ah BJP president leh union home minister ni bawk, Amit Shah ho-in an ṭhukhawm a, hmarchhak bial mipui te mamawh hrang hrang sawiho a ni. He hun hmang hian Chief Minister, Pu Zoramthanga leh Lok Sabha MP, Pu C. Lalrosanga te pawh an tel.
10th. Tuesday : RC Khuma VIP Tailors Mizoram Open Arm Wrestling Championship chu Millenium Center, Ground Floor-ah neih a ni a, he hun hi Sport Minister, Pu Robert Romawia Royte in hawngin zaithiam hranghlui, Ngurthangvela nen in elh in bultan a ni. Competition hi category hrang hranga ṭhen a ni a, category tina champion ṭheuh te hian Champion of the Champion (CoC) an zawng leh a, hetah hian Neihdawn tlangval, Aizawl ITI venga cheng mek Lalruattluanga chuan Champion of the Champion Lallukhum a hlawhchhuak leh ta. Ruattluanga hian Mizoramah 2015 atang khan CoC title hi a lo humhim chho tawh a ni. Rampum huap ang pawhin tumhnih CoC nihna a lo hauh tawh bawk a ni.
11th. Wednesday : Mizoram Basketball Association buatsaih, 11th. Inter-School Basketball Tournament chu Hawla Indoor Stadium, Republic Vengthlangah khelh tan a ni. Inelna-ah hian sikul 40 atangin team 65 an tel.
12th. Thursday : PHE Department buatsaihin Tourist Lodge, Chaltlangah Swachh Prerak Day 2019 hman a ni a, Aizawl DC, Vanlalngaihsaka'n a hmanpui. He hunah hian fai lawmman chi hrang hrang semchhuah nghal a ni.
13th. Friday : Ministry of Micro, Small and Medium Enterprises hnuai-a MSME Development Institute, Kolkata leh Aizawl te chuan Aijal Club-ah 'Bengal and North East Reagion Green Innovators & Social Entrepreneurs' (BANERGISE) national seminar an buatsaih a, Chief Minister, Pu Zoramthanga'n a hmanpui. BANERGISE seminar-ah hian mahni kutkawiha thil siamchhuak engemawzatin an thil siam te an pho chhuak.
14th. Saturday : Agriculture Minister, Pu C. Lalrinsanga chuan Khawzawl Sub-Divisional Agriculture Pisa a tlawh a, an hmunhma leh an hnathawh dan te a enfiah.
15th. Sunday : Presbyterian kohhran hnuai-a Senior Department chuan Pastor bial inkhawmpui an hmang.
16th. Monday : BJP chuan Aizawla an pisa-ah blood donation camp an huaihawt a, Aizawl Civil Hospital tan thisen unit 28 an pe a, thisen petute hi mipa 26 leh hmeichhia 2 an ni.
17th. Tuesday : Ni thum awh tur Mizoram Florists Association buatsaih 'Florists Fair-2019 chu Aijal Club Park (City Park) ah Agriculture Minister, Pu C. Lalrinsanga'n a hawng. Tun tum fair-ah hian mi 106 in pangpar chi hrang 60 chuang an phochhuak.
18th. Wednesday : Speaker, Pu Lalrinliana Sailo chuan ZPM Legislature Party chu a thiat.
19th. Thursday : Vanapa Hall-ah Swachh Prerak Day (Faina Thlentute Ni) hman a ni a, deputy chief minister Tawnluia, PHE minister ni bawkin a hmanpui. Khuallian, Pu Tawnluia chuan, mahni khuaa a hmuna thawktu swachh grahi-te leh tlawmngai pawl hrang hrang te, PHE department-a thawkte'n faina kawnga hma an lakna chu fakawm a tih thu sawiin, "Khaw tin faina kawngah inelna thianghlim buatsaih a ni ṭhin a, sorkarin Faina Hapta a hman ṭhin hun pawh a thleng ṭep tawh. Thingtling khaw fai thlan a ni tawh a, khawpui (notified town) 23-te fainaa inelna kalpui mek a ni bawk," a ti.
20th. Friday : Sihphir WATSAN Committee leh V/C te chuan 'Swachh Hi Seva' hmangin khawchhungah faina hnatlang an huaihawt a, an khua a zirlai leh zirtirtu mi 700 chuang an thawkchhuak. Hnatlang hi plastic hmanlohna khua an nih theih na tura hmalakna a ni. PM thuchah chhiarchhuah nghal a ni bawk.
21st. Saturday : Chanmari leh Zarkawt veng te chu ramri chungchangah an inhmuh thiamloh avangin MacDonald Hill-a School Education Directorate thlangah nasa vaklo in an innawr. He thil hi Chanmari khawtlangin an veng chin ni'a an hriat, School Education Directorate thlanga wellcome signboard an tar Zarkawt lamin an veng huamchhung ni'a an hriat ve bawk si avanga an lo phawi vang a ni.
22nd. Sunday : England rama football infiamna lian ber, English Premier League-ah Chelsea leh Liverpool an inkhel a, an inkhelhna Chelsea khelmual, Stamford Bridge-ah Mizo Chelsea Supporting Club chuan banner 'MIZO' tih leh 'Official Supporters Club Mizo' tih inziahna chu tarchhuah a ni. Banner hi hun remchangah tarchhuah leh a ni ang.
23rd. Monday : Lok Sabha Secretariat-a Bureau of Parliamentary Studies and Traning turin I&PR officer panga leh MJA member 15 te chuan New Delhi panin Mizoram an chhuahsan.
24th. Tuesday : Sorkar laipui-in lo neitu te tana pension scheme a duan, Farmer's Pension Scheme, Pradhan Mantri Kisan, Maandhan Yojana chu Assembly Annexe conference hall-ah Mizorama hman theih turin Agriculture Minister, Pu C. Lalrinsanga'n a hawng.
25th. Wednesday : Uganda ram khawpui, Kampala-ah 64th. Commonwealth Parliamentary Conference, ni 28 thleng awh tur chu tan a ni. He hunah hian Speaker, Pu Lalrinliana Sailo pawh a tel.
26th. Thursday : Vanduaina avanga ke leh lam tansak tawh, Lalrinzuali d/o Lalruatthara, Zemabawk chu Chief Minister, Pu Zoramthanga chuan tlu theilo tura siam danglam scooty a pe. Lalrinzuali hi kum nga mi a nih lai-in truck in a chil avangin a ke ding lam tan a ni.
27th. Friday : Taxation Department Auditorium-ah World Day of Deaf hman a ni a, health secretary leh MJA President ten an telpui.
28th. Saturday : Sihphir Community hall-a 12th. Mizoram State Fencing Championship 2019 neih chu a hmawr bawk a ni ta. He hun hi MJA president, Zonunsanga Khiangte chuan hmanpuiin intihsiaka ti ṭhate hnenah lawmman a hlan.
29th. Sunday :Tokyo Olympic qualifier atana inbuatsaih mek India nula hockey khel thiamte chu England nen inkhelin 1-1 in an inhnehtawk. India hian goal an phurh hmasak hnu-ah Kolasib nula, Lalremsiami Hmar hmangin an sut. England leh India hian match nga an khel dawn a, an match hmasa zawkah India hian 2-1 in hnehna an lo chang tawh a ni.
30th. Monday : Sinlung Hills Council (SHC) final electoral roll chu Aizawl leh Kolasib-ah tlangzarh a ni. Aizawl district chhunga SHC roll chu Aizawl DC Vanlalngaihsaka'n a tlangzarh a, Kolasib district chhunga SHC roll chu Kolasib DC C. Zoengsanga'n a tlangzarh. Aizawl district-ah chuan SHC hnuaiah voter 17,691 an awm a, Kolasib district-ah voter 3,995 an awm thung.
Test
ReplyDelete