MARCH 2019, MIZO(RAM) DIARY

1st. Friday: Kum 2017, March thla aṭanga Lungzarhtuma sele, bawng rual zinga khawsa ṭhin chu thi a hmuh a ni. Misual kut tuar a nih rin a ni.

2nd. Saturday: Bethlehem Branch KṬP te chuan an kohhran hall-ah Synod Hospital tan thisen unit 38 an pe a, thisen petute hi mipa 33 leh hmeichhia 5 an ni.

3rd. Sunday: Isua Krista Kohhran (kross sen) ten Zirtawpni zan aṭanga pastor bial inkhawmpui an hman chu a ṭiak. Mizoram pumah Isua Krista Kohhran (Kross sen) hi pastor bial 16 a awm a ni.

4th. Monday: Governor, Kummanam Rajasekharan chuan Lok Sabha inthlanpui lo awm turah an state Karela-a bial pakhatah BJP ticket-a din a tum avangin President, Ram Nath Kovind hnenah banna a thehlut.

5th. Tuesday: Kum 1966-a India sorkar-in Mizorama bomb a thlak champha 'Zoram Ni' a ni a, Mizoram hmun hrang hrangah hman a ni. A hmanna pui ber Aizawla Dawrpui Multipurpose Center-ah chuan Home Minister, Pu Lalchamliana'n a hmanpui.

6th. Wednesday: Mizoram Hindi Traning Collage Tranees' Union bultumin Mizoram Hindi Traning Collage-a zirlai te chuan an principal, Lious Hauhnar laka lungawilohna lantir nan an exam duhlo. Zirlai te hi an collage gate bulah ṭhukhawmin lungawilohna thuziak kengin resolution 10 an pass nghal.

7th. Thursday: Governor, Kummanam Rajasekharan chuan Raj Bhavan, Durbar Hall-ah Mizoram Information Commissioner atan Dr. C. Lalzirliana s/o LN Tluanga (L) chu rinawmna thu tiamtirin a la lut. Inkhawm hi Chief Secretary, Lalnunmawia Chuaungo in a kaihruai a ni.

8th. Friday: Governor, Kummanam Rajasekharan in Thawhṭanni a Presisent, Ram Nath Kovind hnena banna a thehluh chu President in a lo pawmsak.

9th. Saturday: Mizoram Governor thar atan Assam Governor ni lai, Prof. Jagdish Mukhi chu Gauhati High Court judge, Justice Nelson Sailo chuan rinawmna thu tiamtirin a la lut. Hetihlai hian governor bangta Kummanam Rajashekharan chuan Mizoram a chhuahsan bawk.

10th. Sunday: Election Commission chuan Lok Sabha 17-na inthlan hun tur a puang. Inthlanna hi phase pasarih a kalpui a ni dawn a, Mizoram chu phase 1-ah awmin April ni 11-ah inthlan a ni anga, May ni 23-ah ram puma vote tla te chu a ruala chhiar a ni ang.

11th. Monday: Mizoram Lokayukta chairman atan C.Lalsawta (63), IAS (Rtd.) chu Raj Bhavan-ah Governor, Prof. Jagdish Mukhi-a'n rinawmna thu tiamtirin a la lut. Lokayukta chairman lak luhna inkhawm hi chief secretary, Lalnunmawia Chuaungo-in a kaihruai a ni.

12th. Tuesday: Yoda 4X4 LPS Pro Fight 2019 chu a hmawr bawk a ni ta a, champion lai NT Lalbiakkima (lightfly), Lalrinawma (light) leh HC Johnkenty Vanhlimpuia (lightheavy) ten an kawnghren neih lai an venghim thei a, Laldingliana (bantam) leh C. Lalduhawma (middle) te chu champion thar an ni bawk.

13th. Wednesday: MNF party chuan thlathara MP leh MLA By-Election neih huna an party candidate tur te chu Hnam runah an puang a, MP atan C. Lalrosanga, Tuikual North leh MLA atan Zothantluanga, Zotlang te an ni dawn a ni.

14th.Thursday: Congress leh ZPM te chuan thlathara MP leh MLA By-Election neih huna an thawhhonaa an candidate tur te chu Aijal Club-ah an puang a, MP atan Lalnghinglova Hmar, Venglai leh MLA atan Lalbuanga Sailo Chawnpui te an ni dawn a ni.

15th. Friday: Mizoram Journalist Association, Vice President leh Romei chanchinbu editor ni lai, R. Lalhmangaihzuala (54), h/o Lalfamkimi, Bawngkawn chu hearth attack avangin a thi.

16th. Saturday: Central YMA leh Hokey Mizoram ṭangkawp buatsaih LBS Suzuki Inter Branch YMA 5s Hockey Tournament chu a hmawr bawk a ni ta a, mipa-ah Durtlang champion in hmeichhia-ah Sihphir an champion thung.

17th. Sunday: H. Lalmuankima (16), s/o H. Lalnunthara, Tualpui chu matrict a exam na Khawzawl khua-ah Khawzawl rawlthar rualin an sawisa a, a hnu deuhah damdawi-ah a thi.

18th. Monday: PRISM party chuan thlathara MP election neih huna an party candidate tur chu an adviser, R. Zamawia in, Tuivamitah an puang a, candidate atan TBC Lalvenchhunga, Champhai chu an ruat.

19th. Tuesday: Aizawl District Election Officer chuan Agriculture Directorate Conference Hall-ah Lok Sabha inthlanpui leh Aizawl West-I Assembly By-Election neih tura inbuatsaihna atan 'Traning on Media Certification and Media Related Matters' an buatsaih. He hunah hian Media Certification & Monitoring Committee member te, journalist te leh political party hrang hrang aiawh te an tel a ni.

20th. Wednesday: Tunthla ni 12 a ṭan, Assembly Budget Session chu Speaker, Lalrinliana Sailo chuan tiamchin awmloin a ti tawp. Tunṭum session-ah hian house a chhan tur zawhna lut 139 zinga 135 pawm a ni a, 33 chhan hman a niin 42 chu chhan hman a nilo. A bak zawng chu List of Business-ah dah a ni.

21st. Thursday: Mizoram Psychological Association buatsaih 'Psychology Mitin Tan' tih chu Gov't. Aizawl Collage-ah Health Secretary, H. Lalengmawia'n a tlangzarh. Lehkhabu-ah hian mihring nuna in enkawlna tur leh rilru hrisel theih dan tur tarlan a ni.

22nd. Friday: World Water Day a ni a, district khawpui hrang hrangah hman a ni. World Water Day hi UN Conference on Environment and Development in tui in tlak lawmna ni atan kum 1993 khan a thlang a, kumtin hman chhunzawm a ni ta a ni.

23rd. Saturday: Thlathar ni 11 a Lok Sabha inthlanpui neih tura INC leh ZPM te thlawp, Lalnghinglova Hmar chuan Aizawl DC/DEO hnenah nomination paper a thehlut.

24th. Sunday: AFC U-23, 2020 qualifying round khelh mekah Mizo pathum telna India team chuan Tajikistan chu 0-2 in an hnehlo.


25th. Monday: Mizoram Pradesh Congress Committee (MPCC) leh ZPM chuan Vanapa Hall-ah April 11, 2019-a Lok Sabha inthlanpui leh Aizawl West-I MLA bye-election neih tura mipui candidate-te pualin campaign kick-off inkhawm an buatsaih. Candidate pahnihte bakah, MPC president, Lalhmangaiha Sailo, MPCC president, Lal Thanhawla leh ZPM leader, Lalduhoma ten thu an sawi.

26th. Tuesday: Lok Sabha inthlanpui leh Aizawl West-I Assembly biala by-election neih tura nomination paper lut te chu endik anni a, a vaiin pawm vek a ni. MP atan paruk leh MLA atan mi pathum ten nomination paper hi an thehlut a ni.

27th. Wednesday: Mizoram Legislative Assembly a speaker hlui, R. Lalawia (78), w/o Rozami Tlau, Tuikhuahtlang chu zunthlum natna avangin a thi. Pu R. Lalawia hi kum 1987 khan MNF ticket in Khawhai bial aṭangin thlan tlin a ni a, kum 1989-ah chuh lehin a tlinglo a, kum 1998 khan North Vanlaiphai bial aṭangin MNF ticket in thlantlin a ni leh a, speaker hna a chelh zui a ni.

28th. Thursday: Mizoram Science, Technology & Inovation Council (MISTIC) leh Baktawng Charcoal Making Society ten Baktawng khuaa phuai leh favai aṭanga meihawl leh briquette an siam 'Sawdust Briquetting and Charcoal Making Plant' chu Dr. RK Lallianthanga, chief scientific officer leh MISTIC member secretary ni bawk chuan a hawng.

29th. Friday: NESC Cup Aizawl sipai lammuala khelh mek chu a hmawr bawk a ni ta a, final-ah hian Republic Veng leh Armed Veng te inkhelin hun pangngai-ah goal inpeloa an inhnehtawk hnu-ah hun pekbelhah Armed Veng lamin goal khat an khung tak avangin Armed Veng chu a ṭumhnih na'n NESC Cup champion an ni leh ta. Champion team hian trophy leh tangka fai cheng 17,00,00/- an dawng a ni.

30th. Saturday: Mizoram Powerlifting Association (MPA) leh ZONET Cable TV Pvt Ltd buatsaih Mizo Pachak ber thlanna chu Hawla Indoor Stadium-ah ropui taka khar niin a chak em avanga ‘Cham-Chaka’ tia hming lem an vuahsak hial P. Lalchamliana, Venglai, Lunglei a champion. Kum 2011 a Mizo Pachak ber zawnna buatsaih a nih ţum khan Chama hian hnehsawh takin pakhatna a hauh a, kum 8 hnuah pawh a ber nihna hauh nawn leh ta a ni. Chama hian Mizoram mai bakah National leh International thlengin medal hi a lo hlawhchhuak tawh a ni.

31st. Sunday: Thlipui tleh in Lunglei Zobawk South Bial KNP inkhawmpui neih mekna Zobawk Venglai Biak In a nuai a. Biak in bang hnung lam, Pulpit zawn brick chim thla-in speaker a an hman zaithiam Bethsy Lalrinsangi pasal Pu Lalhriatpuia Chawngthu a delh a, vanneihthlak takin hliam na a tuar lo hlauh thung. A coat hnung erawh a thler nual.