DECEMBER 2018, MIZO(RAM) DIARY

1st. Saturday:Mizoram U-15 league final-ah Tata Trusts COE chuan Aizawl FC Academy chu 2-1 a hnehin an champion. 2nd. Sunday: MNF General Headquarter, Mizo Hnam Run chu misualin an rawk a, bungrua engemawzat a bo. 3rd. Monday: Mizoram Lok Ayukta Selection Comtt. chu video conference hmangin thil pawimawh an sawiho a, sawihonaah hian chairman, Lal Thanhawla, Chief Minister bakah member dang pathum zinga pahnih an tel. 4th. Tuesday: November ni 28 a Assembly inthlanpui neih zawh taka EVM leh VVPAT a ṭhatloh avanga vote thlak zawh theihlohna, Tuichawng biala Ajasora khua-ah chuan vote thlak ṭhat a ni a, voter 1,080 zinga mi 940 (87.03%) in vote an thlak. 5th. Wednesday: Vanapa Hall-ah 38th. PS Dahrawka Chess Trophy - 2018 khelh a ni a, category hrang hranga khelh a niin a pumpuiah Stephen MS Tluanga, Tlangnuam Vengthar a champion. 6th. Thursday: Sihphir Pastor Bial KṬP chuan an kohhran hall-ah blood donation camp an nei a, Synod Hospital tan mipa 20 leh hmeichhia 3 ten thisen unit 23 an pe. 7th. Friday: Ministry of Home, Rural Development-a Department of School Education & Literacy-a secretary, Rina Ray chuan Mizo High School leh PC Girls School te a tlawh. 8th. Saturday: Zemabawk Branch KṬP te chuan an kohhran hall-ah blood donation camp an nei a, Synod Hospital tan mipa 30 leh hmeichhia 6 ten thisen unit 36 an pe. 9th. Sunday: Cuttack, Odisha-a National Junior Football Championship (BC Roy Trophy) final-ah Mizoram chuan Punjab chu 2-1 a hnehin an champion. 10th. Monday: National People's Party thupuangtu leh Meghalaya Home Minister ni bawk James Sangma chuan Aijal Club-ah thuthar thehdarhtute kawmin inthlanpui neih zawh takah an party in vote an hmuh ve ṭeuh a rin thu a sawi. 11th. Tuesday: MLA inthlanpui neih tak result chu puan a ni ta a, MNF party chuan seat 26 la in hnehna an chang. 12th. Wednesday: Governor, Kumannam Rajashekharan chuan Indian Constitution 174 Clause (2) (b) tlawhchhanin Mizoram sorkar chu a ṭhiat. 13th. Thursday: HBK Mix Martial Arts Sym chuan Synod Hospital blood bank-ah Krismass lo thleng tur pualin thisen mipa 7 leh hmeichhia 1 ten unit 8 an pe. 14th. Friday: Serlui-ah Tuikhuahtlang DC quarter-a khawsa K. Lalhluzuala (23) s/o K. Lalzarmawia leh Lalrintluanga (20) s/o Lalsiamliana te chu an tlahlum. 15th. Saturday: Raj Bhavan tualah MNF party kaihhruai sorkar thar tur chu Governor Kumannam Rajashekharan chuan a lalut. Party president Zoramthanga chu Chief Minister a ni ang'a, Finance, GAD, SAD, PWD, Political & Cabinet, Horticulture, Planning & Programme Implementation Department te a enkawl ang. Deputy Chief Minister 1, Cabinet Minister 4 leh Minister of State 6 an awm bawk ang. 16th. Sunday: I-League khelh mekah Salk Lake Stadium-ah Kolkata derby khelh a ni a, East Bengal chuan Mohun Bagan chu Sialhawk tlangval R. Laldanmawia goal hnih leh assist vawikhat hmangin 3-2 in an hneh a, R. Laldanmawia hi hero of the match atan thlan zui a ni. 17th. Monday: Mizoram sorkar thara Chief Minister leh minister dang te chuan an pisa tur ṭheuh an luah ṭan. 18th. Tuesday: Mizoram Legislative Assembly pariatna atana session hmasa ber chu Assembly House-ah ṭan a ni a, Protem Speaker Lalrinawma'n thlan thar te a lawmluh zawhah Chalfilh bialtu, Lalrinliana Sailo chu Speaker atan chuhtu awmloa thlan a ni a, a seat turah hruai nghal a ni. Session hian ni thum chhung a awh ang. 19th. Wednesday: Social Welfare deptt. bultumin Lammualah Pawl Kut hman a ni a, Governor chuan kut hi a hawng. Khualzahawm chu K. Beichhua, Minister, Social Walfare a ni. Kutah hian hnam lam leh zai chi hrang hrang entir a ni a, naupang pual hun hman a ni bawk. 20th. Thursday: Assembly pariatna atana session hmasa ber chu a ṭiak ta a, session-ah hian session hnuhnung ber leh tun inkara MP leh MLA thi, mi pathumte sunna hun hman nghal a ni. Deputy Speaker atan Lalrinawma, Tuikum bialtu chu chuhtu awmloa thlan a ni bawk. 21st. Friday: Governor leh Chief Minister te chuan kan hmalawka Krismass leh kumthar lo thleng tur atan thuchah siamin he hunpui lo thleng tur hi hlim taka hmang ṭheuh turin Mizo mipui te duhsakna an hlan. 22nd. Saturday: Dawrpui phei a Upa Lalchawimawia Saron Veng dawr, insakna bungrua zawrhna chu a kang. Fire brigade ten a kan nasat hmain an ṭhelh mit. Cheng tamtak hu bungrua a kang chhia a, kawnga kal mi pakhatin hliam a tuar bawk. 23rd. Sunday : Lalhriatpuii, ni 96 d/o Pu Lalchhuanawma, Sihphir chu Pneumonia natna avangin Synod Hospital-ah a boral. 24th. Monday: Salvation Army Temple Corp in kumtin Coffee Nite an hman ṭhin chu hman leh a ni. Zaithiam hrang hrang ten mipuite hun hlimawm tak an hmanpui a, Tv. Frederick Lalrindika, Bethel Ministry chuan Christmas thuchah sawiin Thlarau Thianghlim chu nasa takin a inpuang. 25th. Tuesday: Kan sual tlan tura Lal Isua lo pianni champha a ni a, Mizoram mipui te chuan am takin an hmanga, kohhran ṭhenkhat ruai nena lawm pawh an awm. 26th. Wednesday: Darhliri (74) m/o Lalhmunzauva, Electric Veng, Aizawl a thi. 27th. Thursday: Sangṭhuami (67), Tlungvel chu stroke natna avangin a thi. 28th. Friday: Pu John Neihlaia, IPS (AMGUT 2001 batch), DIG (Hqrs.) IGP-a a kaisanna order Ministry of Home Affairs in a chhuah. 29th. Saturday: Ni hnih awh tur Sihphir Pastor Bial Kohhran Pavalai Pawl Meet chu Sihphir kohhran biak inah ṭan a ni. He hun hi Upa Vanlalchhunga, Chairman in a kaihruai a, bial leh tualchhung te report ngaihthlak a niin bialtu pastor, Rev. C. Sapkaia'n Pathian thuchah a sawi bawk. Meet hi naktuk Pathianni khian chhunzawm a ni anga, speaker, Rev Lalzuithanga'n inkhawm apiangin thuchah a sawi dawn a ni. 30th. Sunday: Thu ziak mi, H. Lalrinfela (43) Mafaa Hauhnar tia hriat lar chu a thi. 31st. Monday: Sihphir Venghlun Open Football Tournament Final-ah Matthew H. Zakhuma & Rinthangi Memorial FC chuan Gideon Academy 11:24 chu 2-0-a hnehin an champion.