1st. Wednesday : Archaeological Survey of India hotute chuan Vangchhiaa thilhluite an zirchianna ațangin Mizote chu Mizoramah kum 1400-1500 vela awm țan niin an ngaih thu INTACH, Mizoram Chapter hruaitute nen Aizawl Press Club a thuthar thehdarh tute hmaah an sawi.
2nd. Thursday : Zosap missionary zinga Mizoram chhuahsan hnuhnung ber Rev. Alwyn Roberts (84) chu cancer natna avangin Welsh-ah a thi. A ni hi Mizoramah kum 1960-1967 chhung a awma, rambuai avangin kum 1967 hian a haw a ni.
3rd. Friday : ȚKP Co-ordination Comtt. buatsaih 'Arise 2018' chu Republic Vengthlang kohhran hall-ah țan a ni.
4th. Saturday: Mizoram Football Assn. leh Tata Trusts buatsaih, Mizoram Under-15 League chu Rajiv Gandhi Stadium, Mualpuiah khelh țan a ni. Match hmasa berah AFC Academy chuan FC Stonzz chu 3-2 in an hneh a ni.
5th. Sunday: Sihphir YMA te chuan Lalhmangaiha s/o Rammawia, Sihphir hnen atangin ruihhlo engemawzat an man. Lalhmangaiha in luah hi mi hrang hrangin ruihhlo tih nan an hman thin avangin thenawm khawveng te nin a hlawh hle a, amah leh a chhungte remtihna in a in hi kalhsak nghal a ni.
6th. Monday: Sesawng leh Khawruhlian inkara Tuirini lei dawh thar chu Chalfilh bialtu MLA, Pu Ngurdingliana'n a hawng. Lei hi metre 62.65 a sei niin, metre 3.74 a zau a ni. Tuirini lei hi kum 1973 khan dawh a ni tawha, a him tawk loh hlauhthawn thu-ah February thla khan dawh thar a ni a, mahse, an zawh fel hma in a chim leh hlauh mai a, tuna an hawn tak hi chumi hnua an dawh țhat leh a ni.
7th. Tuesday: Mizorama medical collage hmasa ber atan 'Mizoram Institute of Medical Education and Research' chu Chief Minister, Pu Lal Thanhawla'n a hawng.
8th. Wednesday: Rih-Zokhawthar kan a inkalpawhna chungchanga India leh Myanmar sorkar inremna, 'Agrement on Land Border Crossing with Myanmar' chu Chin CM leh Pu H.Rohluna ten an hawng.
9th. Thursday: Food Corporation of India (FCI) kudam lian sakna atan Food, Civil Supplies & Consumer Affairs deptt. chuan Sairanga an ram chu kum 99 chhung atan FCI hotute hnenah an hlan.
10th. Friday: J.Thankima Collage NSS Unit chuan an collage-ah blood donation camp an huaihawta, Aizawl Civil Hospital tan hmeichhia 8 leh mipa 67 ten thisen unit 75 an pe.
11th. Saturday: Tualchhung Tennis inelna lian ber 1st. Aijal Club Challenger Tennis League chu Aizawl Tennis Club-ah khelh țan a ni. League-ah hian team panga awmin category parukah an ințhena, a sang pahnihin ni 15-ah final an khel ang.
12th. Sunday: Hnahthiala NH-54 kawngpui, tunhmaa lo tla hniam tawh chu a chim.
13th. Monday: '2nd. Zaua Memorial 6th. North East Zone Shooting Championship-2018' R. Dengțhuama Multipurpose Hall-a neih chu a hmawr bawk a ni ta a, a pumpuiah Assam chuan gold medal 20 la in a vaiin medal 36 la in an champion a, Manipur in dawtin Mizoram chuan gold medal 6 nen medal 18 la in pathumna an ni.
14th. Tuesday: PRISM party chuan ECI in PRISM a pawm tak chu an lawm a, an election symbol tur an tlangzarh nghal. An symbol tur chu lunghlu lem a ni.
15th. Wednesday: India in British laka a zalen ni champha chu rampumah lawm a ni a, Mizoramah pawh hmun hrang hrangah lawm a niin Aizawlah chuan Lammualah hman a ni a, Chief Minister, Pu Lal Thanhawla'n hnam puanzar a pawt pharh.
16th. Thursday: Exise & Narcotic Department hnuaia Anti-Narcotic Squad te chuan Bawngkawnah heroin gram 252 an man a, a neitua puh Lalzuineihsial (29), Kolasib leh Ginminlun (42), Manipur te an man nghal.
17th. Friday : Bilkhawthlir Kualmawi YMAte chuan Kolasib District Hospital tan mipa 27 leh hmeichhia 6 ten thisen unit 33 an pe.
18th. Saturday: LBS Suzuki CYMA Basketball Tournament khelh mek chu a hmawr bawk a ni ta a, a pumpuiah Khatla South chuan an țhenawm Khatla chu 84-77 a hnehin an champion.
19th. Sunday: Dinthara inrel pakhatah David Malsawmtluanga (22) leh David Thanglianmanga (33) Dinthar mi ve vete ruang chhar a ni a, drug OD nia hriat an ni.
20th. Monday: Home Secretary chuan MPRO (Communication)-a Addl. SP pahnih, Lalruatsanga Tochhawng leh Zohmingliana te chu SP (Wireless) a an kaisan thu notification siamin a tarlang.
21st. Tuesday: Lawngtlaia K. Suileta in chu bungraw chuh hman lohin a kangral. In kan lai hian in neitute hi an awmlo a ni.
22nd. Wednesday: Nursery venga SBI ATM chu ruk tuma khawih a ni. Misual te hi an hlawhtlinglo naa, khawl hi an ti chhe nual a ni.
23rd. Thursday: MLA hlui, Chawngzuala (78), s/o Chawngzika (L), Mission veng chu a thi. Pu Chawngzuala hi state kan nih hnua Assembly Election hmasa ber, kum 1987-ah khan Aizawl Aizawl South - II bial ațanga thlan tlin a ni.
24th. Friday: MȚKP chuan Lunglei Gov't. Collage zirlai te tan career guidance prog.an hmanga, resource person chu Dr. C. Lalengzama hman a ni.
25th. Saturday: Tripura relief camp-a awm Bru, Mizoram khua leh tui te hruaikir hna chu țan a ni a, chhungkaw pakhat chiah kir duh an awm. Anni chhung hi Putlungasih, Lunglei district-ah an awm ang.
26th. Sunday: Sihphir PYD zaipawl te chuan Tuikual North kohhran an tlawh a, prog. hlimawm tak an hmang. Sihphir thalai te hian ngaihhrui nan bucket an hlan nghal.
27th. Monday: Lunglei RD block huamchhunga VCP leh tlawmngai pawl hruaitu te chuan BNRGSK Hall, Lawngtlaiah 'Mizoram Right to PublicServices Act-2015' chungchang an zir.
28th. Tuesday: BADP sum senga sak, Hmunhmelțha High School building thar chu bialtu MLA, TT Zothansanga'n a hawng. Building hi a dung feet 70 leh a vang feet 18 a zau a ni.
29th. Wednesday: ITI a NHM ațanga UPHWC din thar chu Union Minister of State for Health and Family Welfare, Anupriya Patel in a hawng.
30th. Thursday: Jarkhand Legislative Assembly-a Ethics & MLA Fund Monitoring Comtt. Member te chuan Raj Bhavan-ah Governor, Kummanam Rajasekharan an kawm.
31st. Friday: PWD in kawngpui an siam, Ailawng Branch YMA in an enkawl zui tura ruahmanna, Community Base Road Maintenance Contract Works atan PWD leh Ailawng Branch YMA te chuan thawhhona thuthlung an ziak. Thuthlung ang chuan Ailawng khaw hmawr, Reiek nen an inrina lai Lunghmul lui inkar kawngpui kms 12 a thui chu Ailawng YMA te hian kumkhat chhung an enkawl dawn a ni. September thla ațangin hna hi țan a ni ang.
Comments
Post a Comment