KRAWS PHUN

 

Pathianni kalta zan khan Venglai Presbyterian Kohhranah Rev. Krosschhuanmawia, ATC a thuthlung thar zirtirtu chuan Synod in ATC hmuna kros lian a phun tur chungchangah campaign a rawn nei. A sawi dan chuan he kros phun tur hi Asia khawmualpuia lian ber tur a niin feet 164 (50m) a sang tur niin sum pawh cheng vaibelchhe thum ngawt ruahman a ni nghe nghe.

Kros hi keini Kristian te tan chuan vanram luh theihna ticket a nih avangin a pawimawh em em a, khawvel hmun hrang hranga ringtute chuan Isua zuitu chhinchhiahna atan kan hmang hial a nih hi.

Kros hian ringtute thinlungah hmun a luah thuk em em a, biakin tina kan tar mai bakah mahni inah kan tar hlawm bawk a, motor-ah te tarin thenkhat phei chuan ṭhi anga siamin kan awrh hial a nih hi. Khawlai leh tlang hmun remchang apiangah phunin kan tar chuai chuai a, kum 1985 a Central KTP ten Laipuitlang a an tarte phei chuan Aizawl khawpui a mawiin Kristian state kan nih zia tarlang tu hlu tak a tih theih ang. Tuna Aizawl khawpui atanga langsar taka a ding lurh mai tur hian a tarlang lehzual ngei ang.

Sawi tak angin hmun hrang hrangah kan tarin kan phun chiam chiam a, thenkhat chu enkawl zui mang lohin a mawihin a tlabal hle. Phun maia duhtawk loin a enkawl zui pawh hi kan mawhphurna a ni tih hria ila a tha hle mai. Hei mai bakah thil dang phun ang ngawt a nilo tih hria ila, a zahawm zia te hi i hre tel ang u. Tuna kan phun tur erawh enkawl zui a ni em ang chu.

Ram hrang hrang in an ram tana mi pawimawh te lim lian tak an din thin. Keini Mizo te tan chuan hnama min siamtu Lal Isua Krista leh a kros langsar taka tarlan hi thil tih awm tak a ni. Chutih rualin, a tak aia a lem pathian palh hi thil hlauhawm tak a ni a, kros lian hmanga Krista kan hmuhthiam hlauh erawh chuan kan thlarau tan chakna hnar a ni ngei ang.