1st. Thursday : Jonathan C.Lalruatfela (38) s/o C. Lalsangliana Falkland Veng chu Durtlang atanga Bawngkawn lama bike-a tlan laiin leitan pelh thlak kawi thumna velah kawng chhak atanga lung rawn tlain a delh a, rang taka damdawi in panpui a ni chungin hliam tuar lovin a boral.
2nd. Friday : Daikhanlam, Kawlbem khua, Ngopa Ruihhlo Do Pâwl intite’na an man chu a thi a; he thihna thlen chungchângah Kâwlbêm Students’ Union (KSU) chuan Pu Daikhanlam thih chhan hi an sawisak vângah puhin a sawisatute hi dân anga na taka hrem an phût thu an thuchhuahah an târ lang a, Ngopa lam hian insawisak avânga thi a nih loh thu an sawi ve thung.
3rd. Saturday : Bîlkhawthlîr naupang, unau pahnih – Rodinsânga (14) leh Lalnunfela (12) s/o Lalrinenga chu Sêrlui ‘B’ HEP tuikhuahah an tla hlum.
4th. Sunday : Mizoram leh Assam inkar ramri hrula awm, Vairengte chuan Joint VC kaihhruaina hnuaiah an khua leh a chhehvel veng him turin Border Defence Force an din. He hunah hian VC te bakah NGO hrang hrang President te an kalkhawm a ni.
6th. Tuesday : India ram president chuan state palite larsap thar tur a ruat a, hetah hian Mizoram larsap thar tur a tel. Mizoram larsap atan Dr. Hari Babu Kambhampati a ni a, Governor ni lai, P.S. Sreedharan Pillai chu Goa-ah awm tura tih a ni.
7th. Wednesday : Pu Lalsangliana (70), Sihphir leh Pu Lalsangzuala (43), Bawngkawn te chu COVID19 avangin ZMC-ah an boral. July ni 3 khan hri an kai tih hriatchhuah ve ve niin, hemi ni vek hian ZMC-ah admit nghal an ni. Heti hian hri avanga thi hian za a hawlh ta chiah a ni.
8th. Thursday : Pu H.Thanmawia (88), Ramhlun North COVID-19 avangin ZMC-ah a boral. June ni 25 khan hri a kai tih hriatchhuah niin hemi ni vek hian ZMC-ah dahluh a ni.
9th. Friday : Sawrkar Laipui ruahmannain Mizoram leh Assam ramri chungchangah Mizoram Chief Secretary, Pu Lalnunmawia Chuaungo leh Assam Chief Secretary, Pu Jishnu Barua te chu New Delhi-ah an inbia a, inremna erawh an nei theilo. Inbiaknaah hian Mizoram Chief Secretary hi Mizoram DGP; Resident Commissioner, New Delhi; Pu Lalthiamsanga Sailo MPS, Joint Secretary, Home Department leh Pu Vanengkima, Scientist, MIRSAC ten an tawiawm.
10th. Saturday : November 5, 2019 a Raj Bhavan-a rinawmna thu tiamtira lak luh Governor, PS Sreedharan Pillai chuan Goa Governor ni turin Mizoram a chhuahsan. Governor hi Raj Bhavan-ah chief minister, Zoramthanga, Health minister, Dr R Lalthangliana leh IPR minister, Lalruatkima ten an thlah a, ngaihhruihna thilpek pein, a hna thar atan duhsakna an hlân.
11th. Sunday : Chief Minister hoin Speaker, MP, minister, Serlui Bialtu MLA leh MNF OB te chuan ramria sorkar ngaihdan leh ruahmanna a neihte an sawiho.
12th. Monday : Tlabung sub-division huamchhung Bandiasora khuaa retailer-in a sem tur buhfai bag 135 chu a phurhna meilawng chawpin Malsury thlen hma deuhah a pil a, thi leh hliam erawh an awm lo.
Bandiasora khaw mipuite hian June thla chhunga an chanpual tur buhfai an la khul ve loh avangin, tun tumah hian Supply chhek-in atangin thla hnih, June leh July chhunga an tla tur pekchhuah nghal a ni.
Hemi tum hian a zavaiin buhfai bag 200 chuang chu meilawng pahnih hmanga phurh niin, bag 135 phurtu meilawng pakhat zawk chu ruahtui a luh nasat avangin a buhfai phurh chawpin a pil ta a ni.
13th. Tuesday : Prime Minister, Narendra Modi chuan Covid-19 hrileng thawh hnihna chungchangah India hmarchhak state Chief Minister pariatte chu video conference-in a kawm. Chief Minister-te hian an State dinhmun theuh te leh mamawh an neih te an sawi a. Chief Minister Zoramthanga pawhin Mizoramin covid19 bakah harsatna dang hrang hrang a tawhte sawiin, vaccine tam zawk mamawh belh a nih thu leh oxygen infrastructure lama mamawh awmte a sawi.
14th. Wednesday : Tunhnaia Hnahthial khua-a pawl pahnih, Mizoram Truck Drivers Association (MTDA) leh Village Level Task Force, Hnahthial North-I te inkara inhmuhthiam lohna awm chu chinfela tihtawp a ni. Ramdinliani, Director, Food, Civil Supplies & Consumer Affairs kaihhruainain a office chamber-ah hemi chungchang hi heng pawl pahnihte hian sawihovin inremna thuthlung an ziak a ni.
15th. Thursday : DoNER Minister, G.Kishan Reddy hovin India hmarchhak state Chief Minister leh an aiawhte internet kaltlangin an inkhawm. Chief Minister, Zoramthanga pawh he hunah hian a tel a. North Eastern Space Application Centre (NESAC) hmang tangkai a, awmze nei zawk a Mizorama tuihna humhalh dan tur te, leilung riral nasa lutuk veng tura checkdam siamna hmunhma thlan dan tur te, sik leh sa danglam chho zel venhim dan tur te leh Tourism tihhmasawn chungchangte a sawi.
16th. Friday : Health Minister, Dr R.Lalthangliana, Commerce and Industries changtu ni bawk chu Commerce and Industries Department buatsaih, Health Department hnena Mizo kutchhuak PPE set 3000 hlanna programme, MINECO tualzawla neihah khuallian a ni. He thil hi State Exicutive Committee-in State Disaster Response Fund sumin tualchhung siam chhuah PPE hman ni se tiin a rel a. Veng hrang hranga LLTF ten tualchhung puanthui thiam, chhawmdawl ngai thlang chhuakin PPE set 36,000 thui tura ruahmanna siam a ni. PPE set te hi ZMC Doctor te duhdan ang thlapa sample buatsaih a ni.
17th. Saturday :
UPC (NE) Serchhip bial PYD te chuan bial PYD inkhawmpui rorel bawhzuiin Serchhip dist. Hospital a mamawh a piangte hman turin thisen unit 45 an pe. Thisen petute hi mipa 22 leh hmeichhia 23 an ni.
18th. Sunday :
Mizoram Kohhran Hruaitute Committee (MKHC) ten hmalaknain Covid-19 hri laka Mizoram a him theih nan rampum huapa tawngtai a ni. He hun inkaihhruaina hi Zonet leh LPS studio atang pek chhuah a ni.
19th. Monday : Mizoram Larsap 22-na atan Dr Kambhampati Hari Babu chu rinawmna thu tiam tir a nih hnuah Chief Justice of Gauhati High Court aiawhin Justice Michael Zothankhuma, Judge, Gauhati High Court chuan a la lut. Larsap lakluhna-ah hian Chief Minister, Zoramthanga, Deputy Chief Minister, Tawnluia, Speaker, Lalrinliana Sailo, Council of Minister te, Chief Secretary, DGP, Political Party aiawh hruaitu pakhat theuh bakah NGO lian deuh te aiawh pakhat zel te an tel a ni.
20th. Tuesday :
Robert Romawia Royte, Tourism Minister chuan International Conference on North East India Tourism, Tezpur University leh Finderbridge Tourism in an huaihawt chu khuallian niin video conference kaltlangin a hman pui. Robert Romawia Royte chuan North East India ah Tourism chuan hmabak eng tak a neih thu sawiin North East State hrang hrang te thawk ho a, hripui kiam hnuah khualzin tam zawk hip a tul thu a sawi.
21st. Wednesday :
Sihphir YMA leh VC tangdunin Sihphira Synod Revival Camping Centre-a Myanmar raltlan mi 145 te hnenah an mamawh tur thil chi hrang hrang an pe. Sihphir YMA leh VC te hian khawchhungah raltlante mamawh tur mutbu, thuamhnaw leh chawhmeh, damdawi leh naupang inawmhlimna bakah hmaituamna an thawhkhawm chu an hlan a. Raltlante hi United for Democratic of Myanmar in a enkawl an ni a. Sihphir khawtlang chuan raltlante hriin a luhchilh loh nan tul bik thilah lo chuan tlawh pawh lo turin mipui an ngen a ni.
22nd. Thursday :
Covid-19 hrik chhuak thar a awm leh awm loh finfiah tura Mizoram atanga Covid-19 positive te swab sample 100 phai lama thawn sample 75 ah Covid-19 hrik thar chi thum hmuh a nih thu Dr. Pachuau Lalmalsawma State Nodal Officer & Official Spokes-person on Covid-19 chuan a sawi.
23rd. Friday : Tleirawl, Lalruatfeli (14), Bungkawn Vengthar chu covid vangin a thi a, covid avanga Mizoram a thi zinga naupang ber a ni. June ni 10 khan Remruatdiki, Hlimen khua kum 15 mi chu a lo boral tawh bawk.
24th. Saturday : COVID-19 positive 938 hmuhchhuah a ni a. Ni khat chhunga hri kai thar hmuh chhuah tam ber ni a ni.
25th. Sunday : Covid 19 avangin Parneihkhara (85), Bawngkawn leh Lalthanmawia (62) Vairengte te chu an boral a,
Serchhip khaw mi, Ramhlimawmi, Tripura-a missionary hnathawk lai chu a thi bawk.
26th. Monday : Mizoram chhungah Assam police lo lutin buaina an rawn siam a, hei vang hian Mizoram police nen minute 45 vel an inkap. Assam police 6 thiin engemawzatin hliam an tuar a, Mizoram lam mi pakhatin hliam a tuar ve bawk. Assam police lam hian an tlawm tih lantir nan flag var an zar avangin inkah zui a ni lo.
27th. Tuesday : MADC fur thutkhawm nithum awh tur chu Siaha MADC Session Hall-ah tan a ni.
28th. Wednesday :
Assam Police ten July ni 26, 2021 (Thawhtanni) a Mizoram rawn luta buaina an siam vanga State pahnih inkara harsatna awmte su kiang turin Union Home Secretary Ajay Kumar Bhalla kaihhruaina hnuaiah Mizoram Chief Secretary, Pu Lalnunmawia Chuaungo leh Assam Chief Secretary, Jishnu Barua te chu North Block, New Delhi-ah an inbia.
Mizoram Chief Secretary hi Mizoram DGP, SBK Singh chuan tawiawmin Assam Chief Secretary hi an DGP in a tawiawm ve bawk.
29th. Thursday :
BJP Mizoram Pradesh President Vanlalhmuaka chuan Union Home Minister, Amit Shah hnenah Assam-Mizoram Border issue chungchangah lehkha a thawn a. Assam leh Mizoram inter State Border ah buaina a chhuah fo lohna tura permanent solution siam turin a ngen.
30th. Friday : TKP Day Vawi 70-na a ni a, hemi ni denchhen hian TKP, Ebenezer Kohhran Serchhip te chuan Serchhip Hospital a hman turin Thisen Unit -17 an pe a, Thisen petu te hi mipa 9 leh hmeichhia 8 an ni.
31st. Saturday :
Olympic womens hockey khelh mekah Mizo nula, Lalremsiami telna India chuan South Africa khelin 4-3 in hnehna an chang. Group pool A match hnuhnung berah Ireland in Great Britain 0-2 a an hneh zawh tak loh avangin Lalremsiami te chuan quarterfinal an lut. Game thum chak lo zawn avangin India hian beiseina nei tawh lo tluk angin lang mahse a tawp game hnih an chak avangin quarterfinal hi an lut ta a ni.
Comments
Post a Comment