Skip to main content

JANUARY 2021, SIH(PHIR) DIARY

 


1st. Friday : Sihphir Branch YMA chanchinbu, Sawiremtlang kartin chhuak enkawltu te chuan kumi'n atana chanchinbu chhuak hmasa ber tur buaipui pahin an chhut thinna hmun, Hope Computer Centre-ah chaw an eikhawm.


2nd. Saturday : Pi Biaktluangi, Dinthar veng tu leh fa, hmun hrang hranga awm te chuan an pu, Lallura a fapa in a boral san avangin an ral.


3rd. Sunday : Branch YMA hruaitu tur chu VCP, Pu Lalropuia Pachuau kaihhruaina in community hall-ah thlan a ni a, member 133 in vote an thlak. OB ni lai panga an tling leh a, President ni lai, Pu Lallianfala chu President a ni leh ang.


4th. Monday : Multipurpose Indoor Hall-a Undivided Sihphir Fitness Centre chu R. Rosanga, President, Aizawl East I North Block MNF chuan ribbon chep chatin a hawng. He hun hi Health and Fitness Association Vice President, Laltlanmawia Sailo in a kaihruai a ni.


5th. Tuesday : Tamlo veng Welfare hruaitu tur Pi Vanlalsawmi te inah VCM, Pu H. Lalnghinglova kaihhruaina in neih a ni a, Pu Lalrivunga h/o Kros Chhuanawmi chu Chairman atan thlan a ni.


6th. Wednesday : YMA in, Kawnvenga Pu H. Rokunga ten dawr atan an luah lai chu a bang ti chhia a rawk a ni. Eitur bakah bungrua thenkhat an la ni'a hriat a ni. Bang hi YMA hruaitu thenkhat ten an siamtha nghal.


7th. Thursday : Kawnveng Self Help Group te chu Bank Facillitator, Pi Vanrammawii Fanai hnenah sum enkawl dan zirin an traning.


8th. Friday : Nikum January ni 8 a boral, David Malsawmtluanga h/o Lalvohbiki a thih champha pualin a nu Lalhmunmawii h/o Lallura te inah thenrual tha te an lengkhawm. Tlaiah chawhlui an kilho nghal.


9th. Saturday : Sihphir Pastor Bial KTP te chuan CKṬP hmingin Synod Hospital tan Sihphir Presbyterian kohhran Centenary Hall-ah thisen unit 43 an pe a, thisen petu te hi mipa 36 leh hmeichhia 7 an ni.


10th. Sunday : Sihphir Arm Wrestling Club te chu Tv Lalzarmawia te inah an committee-a, he hunah hian March ni 27, Inrinni-ah tournament neih an rel.


11th. Monday : Social Reform & Action Committee te chu Pi Remlali, Neihbawi in sak puiin an hnatlang.  


12th. Tuesday :  Village Council chuan thlanmual kawnga State Finance Commission aṭanga an hnathawh la chuang hmangin Health & Wellness Sub-center Sihphir tan Gas connection ₹ 8,000/-  leh BP check na ₹ 3,000/- leina tur an pe.


13th. Wednesday : Sakawrhmuituai tlangdung  lawn thin te lirthei hunna hmun pui (Parking Place) tur leh main entrance tura hisap chu Sihphir Branch YMA chuan JCB hmangin a lai tan.

Helai hmun hi Zo phei a YMA tuikhur piah kawng chung, Forest Nursery hmun hlui zawl deuh sa kha a ni. 


14th. Thursday : Nghakliana (80) h/o Lalringaii (L), Neihbawi Veng chu  Synod Hospital, Durtlangah ‘Thisen var tlachham’ avangin a boral.


15th. Friday : Thlai thar rate chungchang ngaihvenin MAHFED 

Chairman leh manager

an lo kal. Sihphir leh Venghlun VC te bakah

huan thlai siam hruaituten V/C house-ah an lo dawng

sawng.


16th. Saturday : Branch YMA chu Conference Hall-ah kumthar duangin an committee-a, kum 2021 chhunga hmalak dan tur hrang hrang an rel. Tlaiah chawhlui an kilho nghal.


17th. Sunday : Sehlawh zau ram neitu te chuan kum 2021 chhunga hruaitu tur an thlang a, hetah hian  Pu Laldanmawia, Dinthar veng chu President atan thlan a ni. 


18th. Monday : Sihphir Branch YMA hnuai-a  media and documentation sub-committee chu Hope Computer Centre-ah an meeting-a, he hunah hian Sawiremtlang chanchinbu kalphung tur hrang hrang te sawi ho a ni. Kum 2021 chhunga editor atan circulation manager tang lai, Lalchhanhima Varte, Branch Committee member chu ruat a ni. Meeting hi sub-committee chairman, Tv H. Lalrindika'n a kaihruai a ni.


19th. Tuesday :   VC House, Kawnvengah VC, Sihphir huaihawtin Sihphir khawchhung kawng line marking chungchang a hmalak dan tur relin Pu Lalropuia Pachuau, VCP kaihhruaina hnuai-ah Sihphir leh Sihphir Venghlun VC aiawh, Branch YMA pahnih aiawh bakah Sihphir VC hnuai a Village Task Force On Traffic ten joint meeting an nei.


20th. Wednesday :  Sihphir Self Help Group VO-II, MZSRLM leh Sihphir khua a vety. dept. tangkawp chuan ran vulhtu te an ran ina kal chilhin vawk 182 leh ar 400 te a thlawnin vaccine an pe. 


21st. Thursday : Social Reform & Action Committee (SR & AC) leh all NGO join meeting chu Conference Hall-ah neih a ni a,  khawtlanga sual dona kawng hrang hrangah SR & AC te hmalakna reng reng an thlawp tlat a ni tih resolution siamin an tarlang. Inkhawm hi Pu Lalropuia Pachuau, VCP in a kaihruai.


22nd. Friday :   Neihbawi Bazar atangin khaw chhung lam panin road marking tih tan a ni. Local Level Task Force On Traffic te bakah Chawngbawla Section YMA hruaitu ten an tawiawm.


23rd. Saturday : Kristian Thalai Pawl Sihphir Pastor Bial Conference chu Sihphir kohhran biak inah rorelin neih a ni a, tlaiah chawhlui an kilho nghal. Conference-ah hian kum 2021-2022 chhunga Office Bearer tur thlan nghal a ni a, Leader atan Pu H. Lalremruata, Venglai Branch chu thlan a ni. Hripui avangin nikhat chhung chauh hun hman a ni.


24th. Sunday : Tamlo veng Welfare te chuan  kum 2020 a V/C buatsaih, veng fai lawmman pakhatna an dawn chu Pi Vanlalsawmi te inah an lawm. He hun hi naupang puala hman a ni a,  H.Lalnghinglova VCM chuan a hman pui. 


25th. Monday : Hripui leng avanga hun rei tak a tlanloh tawh hnu-ah Sihphir-Chanmari bus chu a tlan leh tan ta. Mipuiin an hlut hle.


26th. Tuesday : Branch YMA chu Sakawrhmui tuai tlang panna kawng siamin an hnatlang. Hnatlang hi VCP, Pu Lalropuia Pachuau in a tawiawm a, Chief Minister, Pu Zoramthanga'n pawisa fai thahnem tak in a tanpui bawk.


27th. Wednesday : PYD te chu Rev Biaksangzuala huan, Neihbawi-ah leirawhchan thiarin an hnatlang.


28th. Thursday : Zu engenawzat man sak an nih avanga khua-a awm zui lo tura tih, C. Parliana w/o Lakbiakzuali leh Lalremsanga w/o Lalfamkimi Theihaingaw ve ve te chuan Sihphir khua an chhuahsan.


29th. Friday : Esther Lalmalsawmi d/o H. Lalrinliana, Kawnveng chu a pian champha kum 11 na a ni a, thenawm vela neupang hote sawmin hlim takin an lawm.


30th. Saturday : Social Reform and Action Committee te chu sualna hrang hrang laka inhnamhnawih leh lehkha pek lo ni tawhte pualin Thingdawlah ṭawngṭai in an kal.


31st. Sunday : Asia Pacific Youth Exchange (APYE) Online India 2021 chu January ni 28 atang khan India ramah a neih tan a ni a, Mizoram-in he programme hi a thleng. Sihphirah pawh zirlai 6 te zan hnih riak turin an lo thleng. V/C house-ah an innghat ang.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more