1st. Friday : Lalzuiliana (82) h/o Hunsangi, Sialsuk chu an kawmchhak kawngah tlu in a chesual a, P.H.C pan pui a nih hnu in a hliam tuarloin a boral. Pu Zuia hi ziaktu lar, Darrokima pa a ni.
2nd. Saturday : Lalremsiami telna, Olympic khel tura inbuatsaih lai, India hmeichhe hockey team chuan kumi'na an hmalakna hmasa atan Argentina ram panin New Delhi atangin an chhuak.
3rd. Sunday : Hnehna Tumkau tih hla phuahtu leh satu, F. Vanlalhriatrenga (39) S/o F. Biakzama(L) Bungkawn Nursery Veng chu chaw kawng cancer avangin Guwahati-ah a boral.
4th. Monday : Sawma (45) leh a nupui Lalpianmawii (56) Sairang te chu an chenna inah thi a hmuh an ni.
5th. Tuesday : Nikum August ni 14-a Tuidam leh Kawrtethawveng khaw inkara ruhro laihchhuah te chu kum 100 bawr vel liam taa phum an nih thu Mizoram Forensic Science Laboratory zirchianna atanga finfiah a ni. Zirchianna atanga a lan danin heng ruhro te hi mihring 18 ruhro, mongoloid thlah, Kum 18 atanga kum 32 ni a chhut a ni.
6th. Wednesday : Siaha New Colony a Nuseni te ina tawngtaina room chu kawngkhar kar chhia in Dona Bei (23) New Colony VC-II a cheng nia in sawi chu a lut a, a thawm hria in thenawm khawvengte punin an man hman a ni. Dona Bei hi MTP leh VC ten thu an zawh fiah hnuah police ah pek nghal a ni.
7th. Thursday : Deputy Chief Minister, Pu Tawnluia chuan Aizawl Indoor Stadium, Republic Vengthlanga sak tur lungphum a phum. Aizawl Indoor Stadium, Republic Vengthlanga sakna tur atan hian cheng nuai 763.45/- ruahman a ni a. Ministry of Youth Affairs & Sports, Government of India hnuaia Khelo India Scheme atanga sak tur niin tunah hian Administrive Approval cheng nuai 450/- dawn tawh a ni.
8th. Friday : Health & Family Welfare Department Minister, Dr. R. Lalthangliana chuan Mizoram State Cancer Institute, Zemabawk hmuna cheng vaibelchhe 8.8/- man tur Cancer Hospital sak mek chu tlawhin an hnathawh dan a enfiah. Health Minister hian Cancer Hospital-a damlote eitur theirah thahnemtak a pe nghal bawk.
9th. Saturday : Sihphir pastor bial KṬP te chuan a mamawh apiangte hman atan Synod Hospital tan thisen unit 43 an pe a, thisen petu te hi mipa 36 leh hmeichhia 7 an ni.
10th. Sunday : Covid 19 avanga thi pakuana atan Lakhi Dhan Chakma (57), Silsury chu a thi. LD Chakma hi BP sang leh natna dang nei sa a ni a, Aizawla private hospital pakhata enkawl a nih mek laiin December 21, 2020 khan Covid-19 positive a ni tih hmuh chhuah a ni a, pneumonia a nei bawk.
11th. Monday : Runtung Branch YMA chuan an khaw pa, Pu Huliana te lo tur chu hnatlangin an vah sak. Pu Huliana te hi nupa reka awm an niin kum 60 ral kai tawh ve ve an ni.
12th. Tuesday :
Kum 2021 atan Mizo Hnam Run, Aizawl chu hawn a ni. He hunah hian Lalthlengliana, Vice President chuan party mipuite kumthar chibai buk pahin kum kalta-ah hrileng avanga harsatna tam tak an tawh rualin an party an chetthat thawkhat thu a sawi.
13th. Wednesday : Chief Minister, Pu Zoramthanga chuan Khawzawl District Complex Lungphum phumin, Khawzawl District Horticulture Office a hawng. He lungphum phumna hunah hian Hon'ble Dy. CM Pu Tawnluia, MoS Pu Robert Romawia Royte leh Horticulture Development Board Vice Chairman, Prof. F Lalnunmawia, MLA te an tel bawk a ni.
14th. Thursday : Sawrkar laipui ruahmanna angin Mizoram hman tur Covid -19 hri danna 'Covishield Vaccine' chu Lengpui Airport rawn thlenpui a ni.
15th. Friday : Mizoram COVID-19 dinhmun thlirhona (meeting) Health & Family Welfare Minister, Dr. R. Lalthangliana ho a neihah COVID-19 vanga inkaihhruaina thlahdul hret rel a ni. Meeting chuan Mizorama COVID-19 dinhmun uluk taka an thlir hnu ah February thla atang chuan biak ina inkhawm leh pawl 10 leh 12 Board exam turte tan class kal chhunzawm an rel.
16th. Saturday : Khawvêl pumpuia hri lêng danna damdâwi pêk chhuah lian tham ber tûr ‘Covid - 19 vaccination drive’ chu Prime Minister Narendra Modi-a’n a hawn hnû-ah Mizoramah pawh pêk chhuah ve nghâl niin Aizâwl Civil Hospital staff, Pi Lalmuanpuii chu vaccine hi pêk hmasak ber a ni a, doctor zîngah Dr. Lalhmuchhuaka chu pek hmasak ber a ni bawk.
17th. Sunday : Kulikawna a in luahah Vai mistiri helper, Jasim (25) Karimganj chi thi a hmuh a ni. Jasim-a hi a tukhum lamah vuakna hnuhma ni awm tak hmuh a ni. Thu zawh chian turin a in luahpui Lawma (20) ti'a koh chu Kulikawn Police Station ah hruai nghal a ni.
18th. Monday : Ignite Studio, Khatla-ah Aizawl Municipal Corporation (AMC) inthlana MNF candidate tur Party President, Pu Zoramthanga, Chief Minister chuan a puang. CM chuan candidate-te chu mi chhuanawm tak tak an nih thu sawiin, thlantlin an nih ngei a beisei thu a sawi. He hun hi Vanlalzawma, Vice President-in a kaihruai.
19th. Tuesday : Pu Lalruatkima I&PR Minister chuan Rangvamual Futsal Ground a hawng. Rangvamual Futsal Ground hi SEDP sum hmanga siam a ni. Minister hi Pu Zothantluanga, bialtu MLA-in a ṭawiawm a ni.
20th. Wednesday : Dungtlang khaw Dai-ah ruang chhar a ni a, he ruang hi a hmelhmai atangin tunge tih hriat theih ani tawh lova, a ipte atanga document ah hmuh atangin Vailiansuaka Samthang khua nia hriat a ni. Amah hi tlusual palh niin a kawr hak chu thingah inawk palhin a chesual ta niin an ring.
21st. Thursday : Dawngsiantuanga Hnahlan In chu bungrua engmah chuh hman lovin a kang ral vek.
22nd. Friday : Rev. Father Alwyn Zothansânga (39) s/o Pu John Zoramthara, Sihphir Venghlun, MSFS (The Missionary of St. Francis de Sales), Eswathini, Swaziland, Africa-a awm mek chu COVID 19 leh Pneumonia inkawp natna avangin a boral. Rev. Fr. Alwyn hi kum 2015 khan Rev Stephen Rotluanga, Bishop of Aizawl chuan Puithiam (Father) atan a nemnghet a ni.
23rd. Saturday : Lunglei khawthlang lam khuate chakkhai lamna ber kawngpui, National Highway 301 a Phairuangkai lei chu hun engemaw chen siam that avanga khar chu lirthei zawh theiha siam zawh a ni. Hetih lai hian a sir tawn tawna kea kalna tur te, a rawng hnawih that leh a lei chhuat nal lutuk tur venna siam hna bakah tui lianin a nghahchhan a lak hek loh nan'a lung vawm khawm hna te chu thawh mek a la ni thung.
24th. Sunday : Dilon Chakma leh Surota Chakma, Tiperaghat khaw mi te fa, ni 4 a upa, Lunglei Civil Hospital-a awm mek chu Vanlalnghaki w/o Lalnunpuia, Tlabung, tuna Lunglei Farm venga a chhungte ina thleng mek chuan damdawi ina thawk anga inthuamin a la chhuak a,
Lunglei District Superintendent of Police leh a thawhpui ten uluk taka chhui zui nghalin a rubo tu hnen atang hian him dam takin hmuh let a ni.
25th. Monday : Lunglei chhim lam, Hrangchalkawn piah, TNT Centre bul kawngthlang lam leivung paihna hmunah mihring ruhro helai vela hnathawk ten an chhar. Lunglei Police enfiah nghalin tunge a nih? chhui hna an thawk nghal.
26th. Tuesday : India ram hmundangte rualin Mizoram hmun hrang hrangah Republic Day lawm a ni. Mizorama lawmna pui ber, Aizawl Sipai Lammualah chuan Larsap, P.S. Sreedharan Pillai chuan hnam puanzar pawtparhin Parade contingent ruat bik ten Hnam Puanzar zahna chibai an buk chu a chhanglet a ni. Thu sawiin Larsap chuan 'hrileng karah pawh he hun pawimawh tak hi India khua leh tuite chuan an awmna hmunah theuh Hnam Puanzar pawtparhin, inpumkhatna lan tirin an hmang a ni' a ti.
27th. Wednesday : Chief Minister, Pu Zoramthanga chuan Ramhlun South YMA Hall-ah AMC Ward No IV MNF Campaign hawnna leh Manifesto tlangzarhna hun a hmang a, MNF-ah mi thar 83 a lawm lut nghal.
28th. Thursday : Governor, P.S. Sreedharan Pillai chuan Padma Shree Award dawng tur, Pi B. Sangkhumi chu Raj Bhavan-ah lawmpuina thuziak a hlan. Khawtlang rawngbawlna, a bikin hmeichhia te chawikanna leh hmeichhe rahbi tleu te dinhmun siam that kawnga a thawh hlawk avang he chawimawina dawng tura thlan hi a ni.
29th. Friday : Kolasib bialtu MLA, minister, K Lalrinliana chuan Bairabi Zophai-a IR Post tlawhin ramri tihhmasawn nana hmalak dan tur a endik a, National Highway 154 atanga Zophai IR duty post inkalpawhna tur metre 14.5-a thui minor bridge sak mek a endik bawk.
30th. Saturday : Mizoram-a SBI branch 45-na ni turin Kâwnpui branch chu Minister of State, Pu K. Lalrinliana’n a hawng.
31st. Sunday : Ailawng khuaa I&PR leh Mizo Film Forum tangkawp ten an din, Zo khua chu a kang fai vek. Ailawng Zokhua-ah hian Mizo in hrang hrang 16 a awm a ni. In kang hi Lal in atanga intanin, inhnaih tetea sak a nih hlawm avangin hun reilote chhungin a kang fai ta vek mai a ni.
Comments
Post a Comment