1st. Tuesday : Ni thum awh tur, Mizoram Legislative Assembly session ṭan a ni a, President hlui, Pranab Mukherjee leh House-a member lo ni tawh mi pangate sûn an ni.
2nd. Wednesday : Assam Rifles director general, Lt.Gen. Sukhdeep Sangwan leh amah ṭawiawmtute chuan chief minister, Zoramthanga chu CM bangla-ah an hmu a, tun hnaia Mizoram sorkar leh Assam Rifles inkara inhriattthiam lohna thleng chungchang leh AR awmna hmun chungchang an sawipui.
3rd. Thursday : September 1, 2020-a ṭan, Mizoram Legislative Assembly session chu a ṭiak. Session tàwp ní hian chief minister, Zoramthanga chuan, Covid-19 léng vangin hmasawnna sawi tak tak theih a nih loh thu a sawi.
4th. Friday : State Election Commission (SEC) thuchhuak angin village council pariat leh Aizawla local council 22-ah inthlan buatsaih a ni. Inthlanna khua leh vengte hi August 27, 2020-a inthlan theih loh nate a ni. Hetih lai hian, Chaltlang Lily Veng leh Ramhlun South-ah chuan local council inthlan buatsaih a la ni lo thung.
5th. Saturday : Lengpui Airport kawng, Tlawng lei ah swift car MZ 01 T- 7362 chu a chesual a, a chuang mi pahnih, Lalpekmuanzuala (34) s/o Kapneihpianga, Phunchawng leh R.Vanlalngaihi w/o Lalrosiama, Laipuitlang, tuna Phunchawnga khawsa mek te chu a hmunah an boral nghal.
6th. Sunday : Assam Rifles-te chuan Melbûk, Champhai district-ah ram dang siam meizial (cigarette) báwmpui (case) 100 an man.
He'ng an man te hi tualchhunga hralhna ang chuan cheng nuai 130/- man a ni. AR-te hian cigarette neitua puh leh cigarette-te chu Champhaia Customs hnenah an hlan a ni.
7th. Monday : National Education Policy (NEP) 2020 chungchangah President, Ram Nath Kovind hoin state-a governor te, union territory-a lieutenant governor te, state chief minister ṭhenkhatte leh state HTE minister-te'n video conference kaltlangin inrawn khawmna hun an hmang a; Mizoram aṭangin Governor, PS Sreedharan Pillai leh HTE minister, Dr R Lalthangliana te an tel.
8th. Tuesday : Mizoram Youth Commission (MYC) chuan nikum November 18-a Rajiv Gandhi Stadium-a sipai lâk rûnpui neih ṭuma tling mi 61-te chu an kalna tur hmun Assam Regiment Centre (ARC), Shillong-ah an tír thla. Sipai lâk rûnpui neih ṭum hian mi 145 an tling a, an zinga mi 84 te pawh hi remchang hmasa bera kal tura tih an ni.
9th. Wednesday : PRISM party chuan thuchhuah siamin, Aizawl Municipal Corporation (AMC) inthlan turah an party hminga chuh ngei an tum thu an puang. PRISM chuan, "Aizawl khawpui enkawltu ṭha tak thlan chhuah a nih leh ngei theihna turin candidate ṭha tak chhawp chhuak tura hmalak ni se kan ti," tiin an tarlang.
10th. Thursday : Assembly speaker, Lalrinliana Sailo, deputy speaker, Lalrinawma leh MLA dang 16-te chuan Covid-19 dona atan CM Relief Fund-ah an hlawh an thawh. Speaker leh Dy. Speaker hian August thla hlawh aṭangin basic pay aṭanga 50% an thawh a, MLA dang zawngin basic pay aṭangin 30% an thawh thung.
11th. Friday : Lunglei Rahsi Veng PYD-te chuan Lunglei Civil Hospital-ah thisen unit 21 an pe a, petute mipa 16 leh hmeichhia 5 an ni.
12th. Saturday : MLA, Dr Buddha Dhan Chakma, Tuichawng bialtu chu Covid-19 a vei tih hmuhchhuah a ni. Amaherawhchu, a taksaah harsatna (Covid-19 symptom) a nei lo. ZMC-ah lâk phei nghal a ni.
13th. Sunday : Lalhmangaihi Chhakchhuak d/o Lalrinmawia Chhakchhuak (L), Chawlhhmun, Aizawl chuan SAP Seminar hall, School of Social Sciences, University of Hyderabad atangin Sociology Subject-ah Doctor of Philosophy (Ph.D) degree a dawng thar. Dr. Lalhmangaihi Chhakchhuak thesis title hi "Diseased Body and Social Suffering: A Study of Cancer Affected in Mizoram" tih a ni.
14th. Monday: Covid Care Centre (CCC), Thingdawla hnam dang driver, Covid-19 an vei avanga enkawl zinga hripui vei tawh lo mi 72 chhuahtir an ni. Hei vang hian Silchar Truck Driver's Association (STDA) pawhin Mizorama lut tur lirtheite September 12 aṭanga dan an titawp nghal. Thingdawl CCC aṭanga chhuahtir tâk mi 72 zinga pathum chu Mizorama hna thawka awm chhunzawm tur an ni a, a bak mi 69 chu Lailapur thleng hruai thlak an ni.
15th. Tuesday: Mamit District Hospital-a TrueNat laboratory (Biosafety Level-2) bun thar chu district bawrhsap, Dr Lalrozama'n a hawng. Khawl hi Covid-19 vei leh vei loh hriatna tura swab sample endik na'n hman a ni ang.
16th. Wednesday: Parliament Monsoon session ni thumna neih a ni a, thil pawimawh engemawzat sawiho a ni. Union Minister of Ayurveda and Homoeopathy, Shri Shripad Yesso Naik Bill putluh The Establishment of The Institute of Teaching and Research in Ayurveda chu hun rei tak sawiho a ni a. He hunah hian Rajya Sabha MP, Pu K. Vanlalvena chuan parliament-a a hmasa ber atan Mizoram 50% chu Forest a nih thu te, forest-ah ramhmul damdawi awmsa tam tak kan neih thute a sawi.
17th. Thursday: Solid Waste Management Centre, Dihmuntlang sak zawh a nih huna hman dan tur inkaihhruaina zirchianna hun Kolasib IPR conference hall-ah Kolasib Town Sanitation Task Force leh Kolasib Town Village Council 17-te tan buatsaih a ni a, bawrhsap, Dr H Lalthlangliana’n a hmanpui.
18th. Friday : Champhai DC, Maria CT Zuali chuan an district-a khaw pathum - Tualchéng, Lungphunlian leh Hnahlan khuate a tlawh a, khawtlang hruaitute nen inkâwmin, khawtlang hmasawnna atana hmachhawpte leh hmalak dan turte a sawipui.
19th. Saturday: Congress party ṭhalaite chuan thuchhuah siamin, MNF sorkar in swab sample endik man tihniam tura rawtna a awm leh private hospital leh laboratory-ah swab test tih theih tura ruahmanna siam a ni chu lawmawm an tih thu an tarlang.
20th. Sunday: Bawngkawn Traffic Point-ah No Entry road, Bawngkawn – Ramhlun lama motor pakhat a tlan avangin buaina tenau a chhuak. Truck hi MZ-01 3320 a niin driver chu Laldintluanga Chhangte a ni. Police lam hian driver hi nasa takin kut an thlak avangin suspend nghal an ni.
21st. Monday : Aizawl DC, R Lalramnghaka chuan Aizawl Municipal Corporation (AMC) executive councillor atan mi pathum a la lut.
22nd. Tuesday : MNF party MLA 8 te chuan ZPM Legislature Party (ZLP) leader Lalduhoma chu Indian Constitution 10th Schedule Para 2(2) a bawhchhia nia puhin, MLA aṭanga bàn turin Assembly speaker Lalrinliana Sailo an ngen.
23rd. Wednesday : Mizoram UPC ṭhalai pawl, Pentecostal Youth Department (PYD) chuan General Headquarters conference hall, Aizawlah rorel inkhawm vawi khatna leh General Board ṭhut vawi 24-na an hmang a; thil pawimawh chi hrang hrang an rêl.
24th. Thursday : National Service Scheme (NSS) Day vawi 51-na a ni a, Aijal Club-ah lawmna inkhawm buatsaih niin, Sports & Youth Services minister, Robert Romawia'n a hmanpui. NSS Day lawmnaah hian Aizawla NSS unit 30 vel aṭangin NSS programme officer 50 vel an tel a, Covid-19 leng avangin NSS volunteer-te erawh an tel thei lo.
25th. Friday :YMA Central Executive Committee (CEC) ṭhukhawm chuan, October 15, 2020-a Mizoram University-a YMA Rorel Inkhawm neih tura an lo ruahman tawh chu Covid-19 léng vangin hman loh mai ni se, an ti. Rorel Inkhawma chawimawina hrang hrang hlan ṭhin chu kum 2021-a General Conference-a hlan turin an rêl nghal bawk.
26th. Saturday : Aizawl Civil Hospital (ACH) tan mi 136-in thisen an pe a, thisen petu te hi veng hrang hranga YMA leh KTP member te an ni.
27th. Sunday : Mizoramah Covid-19 vei hmuh chhuah mi 43 an awm. He'ng zingah hian Mizoram chhunga kái chhâwng mi 11 an tel.
28th. Monday : World Rabies Day a ni a, Mizoram hmun hrang hrangah hman niin, a thlàwnin ui hri danna rabies vaccine hmangin ui eng emaw zat an chiu. Day thupui chu, 'Inlungruala thawkhoin hri danna hmanga ui a hri nuaibo' tih a ni. Aizawlah chuan World Rabies Day pualin AH&Vety department huaihawtin Veterinary Polyclinic Hospital-ah hman a ni a, AH & Vety director, Dr Hmarkunga'n hmanpuiin, official, People for Animal Protection Society hruaitute leh ui neitute an tel. Ui a (â) hri avang hian khawvelah kum tin mi 60,000 vel an thi ṭhin a ni.
29th. Tuesday :
C. Lalrinchhana (40), S/o C. Lalhrangluaia, Chanmari, chu Ṭhuampui-ah a Scooty khalh lai chu kawng sirah a ding fel hman chiah a a boral. Pu Lalrinchhana hi Bethlehem Vengthlang, Forest Quarters-ah a nupui fanau te nen'a cheng an ni.
30th. Wednesday : Lalthafamkimi (27) h/o Ruben Biakchungnunga, Sihphir chu Synod Hospital-ah kal thalo avangin a thi.
Comments
Post a Comment