AUGUST 2020, MIZO(RAM) DIARY

 

1st. Saturday :  Mizoramah Covid-19 vei mi 55 hmuh chhuah belh a ni a, Mizoramah ni khat chhunga Covid-19 vei hmuh chhuah tam ber ní a ni.  

2nd. Sunday : Johan Lalruathlua (7), s/o Lalnunzira, Tawizo chu V/C ten khaw bul lawka check dam an siam, patling ban pil vela thukah a tla a, an bul lawka insu a awm, Lalhriatpuii  (23) w/o John Zairemmawia chuan hmuin, a ni tui pawh thiamlo chuan engmah dang ngaihtuahlo leh ama tan a hlauhawm zia pawh ngaihtuah hman loin chhan turin a lut ve nghala, vanneihthlak takin a huaisen avang liau liau in a chhanchhuak.

3rd. Monday : Chief secretary, Lalnunmawia Chuaungo chuan   Chief Secretary conference hall-ah sipai chi hrang hrang hotute sipai zinga Covid-19 darh nasa lutuk chungchangah a kâwm a, Covid-19 darh zel lohna atana hmalak dan tur a sawipui. He hunah hian August 15, 2020 thleng army leh paramilitary force-te Mizorama an luh khap rih an rêl. 

4th. Tuesday : Animal Husbandry & Veterinary (AH&Vety) minister, Dr K Beichhua chuan Lengpuia Eri Seed Farm-ah Socio Economic Development Programme (SEDP) a tlangzarh. SEDP-ah AH&Vety department aṭangin pilot project atan ṭanpuina dawng tur mi 1,020 thlan a ni. SEDP tlangzarh inkhawm hi AH&Vety, Fishery & Sericulture Board vice chairman, C Lalmuanpuia'n a kaihruai a, MLA Dr K Pachhunga'n a hmanpui a ni.

5th. Wednesday : Mizoram State Election Commission (SEC) chuan village council (VC) leh local council (LC) inthlan hun atan August 27, 2020 ruat a nih thu a puang a, Election Model Code of Conduct hman ṭan nghal a ni bawk. VC 558 inthlan turah hian seat 2,464 a awm a, general seat 1,831 leh hmeichhe tana hauh seat 633 a ni a; LC 83-ah chuan seat 545 awmin, general seat 397 leh hmeichhe seat 148 a ni. VC inthlan turah voter 4,54,180 leh LC-ah 2,18,758 an awm. 

6th. Thursday : Minister of state, Lalchhandama Ralte chuan a pisaah Mizoram khaw­chhak lama lìrnghîng ṭhin zir chiangtu mi­thiamte a kâwm a, lirnghing an zir chiannate a sawipui. Lalchhandama Ralte hian lirnghing tuartu Tuipuiràla khaw hrang hrangte chu tun hnai khan a tlawh kual a, harsatna an tawh dante a en. Chumi hnuah mithiamte chu a hmun ngeiah an hmanraw neih ang ang nena kala zir chiang turin a sáwm a, mithiamte chuan an zir chiang ta a ni.

7th. Friday : Siahaa Joint NGO (MTP, MChP, MSO) leh DC pisaa thawkte chuan Siaha DC aṭanga chhuak tur Bhu­pesh Chaudhary, IAS chu Circuit Hall-ah an thlah. Bhupesh Chaudhary chuan, amah thlahna hun buatsaih a ni chu lawm­awm a tih thu sawiin, "Siahaa ka awm chhung­in Maraland mipui, tlawm­­ngai pawlte leh kohhrante'n min duhsakna leh hma­ngaihna hi ka theihnghilh tawh lo ang," a ti.

8th. Saturday : Governor, PS Sreedharan Pillai-a'n Covid-19 lockdown chhunga lehkhabu a ziah hrang hrangte pualin Raj Bhavan Durbar Hall-ah hun hman a ni a, chief minister, Zoramthanga khuallian a ni. Inkhawmah hian PS Sreedharan Pillai kutchhuak thu leh hla lehkhabu 13 chu Chief Minister-in a chhawp chhuak. Hetihlai hian Gauhati High Court chief justice, Justice Ajai Lamba chuan 'Republic Day 2020' tih leh, 'Thus Speaks the Governor' tih lehkhabute chu Guwahati aṭangin video katlangin a tlangzarh bawk. 

9th. Sunday : Lalnuntluanga (36), s/o Romawia,

Electric Veng, Aizawl chu a thi.

10th. Monday : Lalrintluangi w/o Johana, Bilkhawthlir Tuiṭha Veng chu rûl chuk avangin a thi. Lalrin­tluangi hi a fanute ina léng tura a kal chu rûlin a chuk a, Bilkhaw­thlir damdawi-ina rûl túr thahna hmanga chiu a nih hnuah Kolasib District Hospital panpui ni mah se, a nunna chhan hman a ni lo.

11th. Tuesday : MZP chuan an pisa conference hall-ah MZP Hla Inphuahsiak result puanna leh lawmman semna inkhawm an buatsaih a, additional chief secretary, JC Ramthanga'n a hmanpui. Hla inphuahsiakah hian hla 75 a lût a, K Lalhmahruaia phuah 'Kan chhuang zel dawn MZP' tih chu pakhatna a ni. 

12th. Wednesday : Gauhati High Court judge, Justice Michael Zothankhuma, Mizoram State Legal Services Authority (SLSA)-a executive chairman ni bawk chuan   Mamit District Jail a tlawh. Justice Michael Zothankhuma hian   jail-a táng mekte dinhmun enfiah­in, harsatna an neihte a ngaithla a, jail building leh hmunhmate a enfiah.  

13th. Thursday : State Disaster Management Autho­rity (SDMA) hnuaia State Executive Committee chairman, Lalnunmawia Chuaungo, chief secretary chuan   chhiatni ṭhatnia puipunna hmunahte zawm tur dan engemawzat a tichhuak.

14th. Friday : Kolasib District Level Monitoring Committee for Central Sector Scheme chu an chairman, Dr H Lalthlangliana, bawrhsap hoin DC conference hall-ah an ṭhu a; an district-ah Farmers Producer Organisation (FPO) kaltlangin aieng leh dragon fruit-ah nasa zawka hmalak an rél.

15th. Saturday :  Mizoram hmun hrang hrangah Independence Day vawi 74-na lawm a ni. A lawmna puk ber, Aizawlah chuan zing dar 8-ah Lammualah lawm a ni a, chief minister, Zoramthanga'n hnam puanzar a pawt pharh.

16th. Sunday : Mizoram sorkarin Aizawl Municipal Corporation (AMC) huam chhungah     ni li chhung atan inkhàrkhip  puan a ni. He thupuan hi Health & Family Welfare minister, Dr R Lalthangliana hoa sorkar hotute SAD Conference Hall-a ṭhukhawmin an rêl a ni.

17th. Monday : Union minister of Environment, Forest & Climate Change (EFCC) Prakash Javadekar hoin state hrang hrang EFCC minister-te'n video conference an nei a; EFCC minister, TJ Lalnuntluanga pawh telin, scheme hrang hrang hnuaia Mizoram sorkar hmalaknate leh Mizoram mamawhte a sawi.

18th. Tuesday : Assam Rifles mi leh sate chuan Mizoram sorkar aṭanga phalna nei lo leh Mizoram sorkar official-te'n an lo dang chungin Mizoramah an lut lui. Vairengte police-te aṭanga thu dawn danin, Mizorama luh tum Assam Rifles-te hi Vairengte checkgate-ah tihdin an ni a, Home department aṭanga phalna an neih loh avangin luh tlang phal an nih loh thu hrilh an ni. Aizawl aṭangin Home department hotute pawhin phone hmangin an be bawk. AR-te hian phalna nei lo mah se, an tlang tur thua chhángin, silai nen motor aṭangtein an zuangthla a ni. AR-te hian kaltlang luih an tum avangin darkar khat vel chhung buaina a awm a, Home Secretary biakpawh a ni a, ani pawhin kaltlangtir lo turin Mizoram sorkar aṭanga duty-te a hrilh a ni. Checkgate-a hrui pawh thlahdul deuh a nih laiin an tlàn tlang lui a, police-te'n au zui mahse an ding lo.

19th. Wednesday : Chief Minister hlui, Mizoram Pradesh Congress Committee (MPCC) president ni bawk, Lal Thanhawla chuan State Election Commissioner (SEC) hnenah lehkha thawnin, village council (VC) leh local council (LC) inthlan hun sawn turin a ngen. A ngenna lehkha hi Chief Minister leh Chief Secretary a pe tel nghal. Congress President chuan, SEC-in VC leh LC inthlan a puan ní-ah Covid-19 vei mek Mizoramah mi 222 an awm thu tarlangin, "August 19 thleng hian hri vei mek chu 400 chuangah a pung chho a ni. Chubakah, khawi aṭanga kai nge (source) tih hriat hleih theih lohin Covid-19 vei an awm ta nual mai a, local task force hrang hrangin an veng an lockdown a, Mizoram sorkar pawhin August 17-21 zing dar 4:30 thleng AMC huam chhungah total lockdown a puang a ni," a ti.

20th. Thursday : Mizo zaithiam zinga hmabak nei eng ber pawl, India ram puma talent nei ṭha an koh khawm zingah pawh a lo tel pha tawh ngat, Ruatpuii chuan hla thar 'A dawn phak lo' a tichhuak. He hla thar hi lenglawng hla ṭha tak a ni  a, ruihhlo leh thildang min tichhe ṭhintu kalsan ngamna chu inchhir lohna zawk a nihzia tarlanna hla a ni.

21st. Friday : UPC (NEI) PYD, Lung­lei district headquarters bial chuan thisen pek rûnpui an huaihawt a, Lunglei Civil Hospital blood bank-ah thisen unit 25 an pe.

22nd. Saturday : Mizo Gospel singer zinga sawm hlawh berte zinga mi leh zaithiam chawimawina hrang hrang lo dawng tawhtu, Sawmtea Chhangte chuan hla thar 'Hun leh ni lo danglamin' tih chu YouTube channel kaltlangin a tichhuak.

23rd. Sunday : Mizoram sorkarin Covid-19 darh zel tur venna atana Aizawl Municipal Corporation (AMC) huam chhunga August 16, 2020 zan aṭanga total lockdown a puan chu Health minister, Dr R Lalthangliana hoin Covid-19 Operational Team chairman, Dr ZR Thiamsanga, MLA; chief secretary, Lalnunmawia Chuaungo leh official dangte'n an thlirlet a, lockdown hi kalpui chhunzawm  loh an rel.

24th. Monday : C. Lalsawma (59), Mizo film CHHURBURA-a a changtupa chu a chenna in, New Vervek Zion vengah kal thalo avangi a boral.

25th. Tuesday : Lok Sabha MP, C Lalrosanga chuan model village atana a thlan zinga mi, Muallungthu khua chu a tlawh a, khaw chhung fang kualin, Muallungthu mipuite chu VC inthlanah MNF candidate-te vote turin a sáwm.

26th. Wednesday : State Election Commission chuan  Mara Autonomous District Council-a Siaha North-I bialah by-election a buatsaih. By-election hi MDC ni lai a thih vanga buatsaih a ni a, BJP, INC leh MNF-te'n candidate an nei a ni.

27th. Thursday : Mizoram State Election Commission (SEC) chuan Mizorama district pakuaah village council leh local council inthlan a buatsaih a, Covid-19 vanga inthlan theih lohna khua leh veng 32 a awm a, LC 24 leh VC 8 an ni. Hetih lai hian, SEC chuan VC 12-ah chuan chuhtu awm loin MNF candidate-te tlingah a puang a, VC pahnih dangah chuh­tu awm lo bawkin Congress party candidate-te tlinga puan an ni bawk.  

28th. Friday : UPC (NEI) hnuaia Penticostal Youth Department (PYD), Theiriat Bial chuan  Lunglei Civil Hospital blood bank-ah thisen unit 25 an pe.

29th. Saturday : AMC Ward-V councillor, Rosiamngheta chuan pianphunga rualbanlo, Lalrammawii, Vaiva­kawn hnenah TVS scooter (scooty) Ntorg 125 a pe. Lalrammawii hi AMC office-a thawk a ni a, mi dang tibuai loa pisa a kai theih nan a khalh theih tura siam danglam scooter thar chu Rosiamngheta hian a pe a ni.  

30th. Sunday : Zosangzuali (46), Collage veng chu a thi.

31st. Monday : Governor, PS Sreedharan Pillai chuan Covid-19 dona atan Chief Minister's Relief Fund-ah August thla hlawh aṭangin 30% (Rs. 1,05,000) a thawh.