1st. Friday : Health minister, Dr R Lalthangliana chuan Kolkata AMRI Hospital-a awm Mizo damlo pahnih, mipa puitling ve ve chuan Covid-19 hripui an vei tih hmuhchhuah a nih thu a sawi. Kolkata-a Covid-19 kaite enkawlna hmunah enkawl zui nghal an ni.
2nd. Saturday : CMO Cabinet room-a Council of Ministers ṭhu khawm chuan, Covid-19 vanga ram puma inkhârkhip zui zel tura sorkar laipui-in thutlukna a siam angin, May 4-17, 2020 chhung inkhàrkhip chhunzawm tura tih chu Mizoramah pawh kalpui zel turin an rél. State Disaster Management Authority (SDMA) chairman, Lalnunmawia Chuaungo, chief secretary pawhin inkharkhip dan tur a tichhuak nghal a; mihring phur chi lirtheite tlân phal a ni tawh dawn a, biak ina inkhawm leh mipui punkhawm erawh phal a la ni lo.
3rd. Sunday : Kolkata-a Covid-19 vei enkawl lai Mizo pahnih zinga pakhat, H Rohmingliana (73), Vairengte chu a thi.
4th. Monday : Serchhipa UDPA department hnuai-a DAY-NULM leh District Child Protection Unit-te chuan Serchhipa home hrang hrangte chu disinfectant hmangin an phuh fai.
5th. Tuesday : Mizoram sorkar hnuai-a sorkar hnathawk pawl 75 aiawhte chu chief secretary, Lalnunmawia Chuaungo kaihhruai-in Administrative Training Institute (ATI) Auditorium-ah an inhmu khawm a; Covid-19 dona atana sorkar hnathawkte'n pawisa an thawh dan tur sawiho in, an hlawh aṭangin 10% thla tin pek an remti.
6th. Wednesday : Mizoram Synod chuan office order tichhuakin, Synod Officers' Meeting thurel angin, Synod in luahtu (thawktute ni lo)-te chu April thla luah man àwltir an nih dawn thu a tarlang.
7th. Thursday : Malsawmkimi (30) d/o LH Lianzuali, Hnahthial Electric Veng chu Tuichang lui-ah a tla hlum. Malsawmkimi hi a laizawn leh a ṭhiante pahnih nen Tuichâng lui-ah an kal a, lui-a balu lakna JCB-in a laih khuarah a ṭhiante pahnih nen an tla a, mi dang pahnih chhanchhuah hman an nih lai-in, Malsawmkimi hi an chhanchhuak ve hman ta lo a ni.
8th. Friday : Council of Minister chu chief minister, Zoramthanga ho-in CMO Cabinet meeting room-ah an ṭhukhawm a, thil pawimawh chi hrang hrang an ngaihtuah.
9th. Saturday : Mizoram chhunga Covid-19 hripui vei awmchhun Pastor Vanlalhruaia Khiangte, Mission Vengthlang chu ni 45 zet an enkawlna hmun Falkawna Zoram Medical College (ZMC) damdawi in atangin a chhuak ta. Pastor Hruaia hi Baptist pastor niin kum 52-mi a ni a, Netherlands khawpui Amsterdam a Pathian thu lama zirna sang zawk a buaipui lai-in a zinna leh khawvel ram hrang hranga he hripui hi a len avangin a lo haw a. Oman khawpui lian ber Doha-ah tumin Delhi a lo thleng chho-a. Chuta tang chuan Guwahati paltlangin, March ni 16 khan Aizawl a lo thleng a ni. March ni 18 khan a khawsik hritlan dan chu a rinhlelh avangin doctor a hrilh a, doctor-in March ni 22 khan a hrawk chhung sample la-in endik turin a thawn a. He sample endik result hi March ni 24 zan khan chhuakin Covid-19 hri a vei tih hriat a ni ta a ni.
10th. Sunday : 46th Assam Rifles chuan New Vaikhawtlang khua-ah a thlàwna inentirna an buatsaih a, a thlâwnin damdawi mamawh ang ang te an sem nghal. Inentirte hnenah Covid-19 chungchanga hriat tur pawimawhte an hrilh bawk.
11th. Monday : Aizawl Civil Hospital-ah Territorial Salvation Army Youth huaihawtin SAY-te'n thisen unit 55 an pe a, petute mipa 39 leh hmeichhia 16 an ni.
12th. Tuesday : State Election Commission (SEC) chuan Central YMA Hall-ah Aizawl Municipal Corporation (AMC) inthlan lo awm tura hmeichhe tana bial (ward) hauh tur an pawt. Hmeichhe tana seat hauh tur ward-te chu - ward no. III, VIII, X, XIV, XVI leh XIX-te a ni.
13th. Wednesday : Mizoram Board of School Education (MBSE) chuan High School Leaving Certificate (HSLC) Examination 2020 result a tichhuak a, zirlai exam 18,036 zinga 12,324 an pass a, pass percentage chu 68.33 a ni. HSLC 2019-ah hian pakhatna mi pathum an awm a, St. Paul's Higher Secondary School zirlai vek niin mark 476 ṭheuh an hmu a ni.
14th. Thursday : Mizo pastor zinga langsar tak, Rev. VL Zaithanga (86) h/o Zoparmawii chu Diphu, Karbi Anglong, Assam-ah a thi a, Diphu-ah vui a ni. VL Zaithanga hi March 24, 1934-ah Sialhâwkah a piang a. Kum 1961-64 chhung United Theological College (UTC), Bangalore-ah B.D. a zir a, Mizo zinga UTC-a B.D zir hmasa ber a ni. Kum 1966-ah Synod Mission Board (SMB) secretary hna a thawk ṭan a, kum 1967-ah probationary pastor atan lak a ni a, SMB-a thawk lai a nih avangin pro.pastor hna kum khat chauh a thawk a, kum 1979 tawp lama pastor atan nemngheh a ni.
15th. Friday : Lockdown thawh thumna a lo tawp hnaih tak avangin State Executive Committee leh task group hrang hrangte chu chief secretary, Lalnunmawia Chuaungo ho in Secretariat conference hall-ah an ṭhukhawm a, May 18-31 chhung inkhàrkhip chhunzawm an rél a ni.
16th. Saturday : MJA, Kolasib district member-te chuan Covid-19 laka invenna atana Kolasib district chhung - Phaisen, Buhchangphai, Bairabi, Vairengte, Phainuam leh Saihapui-V khuaa ramri vengtute an tlawh a; duty-te hmalak dan leh an harsatnate an ngaihthlaksak. Kolasib MJA-te hi team pahnihah an inṭhen a ni.
17th. Sunday : Zoram Medical College (ZMC)-a khung hran mek hmeichhe pakhat chu a tlân chhuak. Amah hi Covid-19 kai ni-a inngai, rilru lama chian lohna nei a ni.
18th. Monday : Lalnunfeli (20) d/o Lalrindika, Khatla chu Serlui-ah a tla hlum. Lalnunfeli hi an ṭhiante nen Serlui-ah an kal a, a ṭhiante nen chuan chesualin, a rualin mi pathum tui-ah an tla a, midang pahnihte chhan hman an nih laiin, chhan hman a ni ve ta lo a ni.
19th. Tuesday : Chief minister hlui, Lal Thanhawla pian champha, a kum 82 tlinna a ni a; chief minister, Zoramthanga chuan Twitter leh Instagram kaltlangin lawmpuina a hlân. Zoramthanga chuan, "I pian champha phak vawi 82-na lo thleng hi ka lawmpui tak zet che a. I thiamna leh finnate ṭangkai taka kan ramin a chhawr chhunzawm zel theih nan Pathianin hriselna ṭha tak nen thuam chak zel che rawh se," tiin duhsakna a hlân.
20th. Wednesday : Tuikhuahtlang Local Task Force (LTF) chuan Karimganj, Assam aṭanga dan lo-a Mizoram lût ni ngeia hriat an man a, Magistrate thu angin quarantine centre-ah dah nghal a ni.
21st. Thursday : Lunglei High Powered Committee (HPC) vice chairman, Lawmawma Tochhawng, MLA chuan Lunglei district-a artui-a intodelh tura hmalakna 'HPC Artui' chu a pisa conference hall-ah a tlangzarh. HPC Artui project hi Zobawk South, Ramthar Veng, Pukpui, College Veng leh Lunglawna cooperative society pangate kaltlanga kalpui a ni a, Rainbow Rooster ar notê 10,000 hmangin December 2019 khan bul ṭan a ni.
22nd. Friday : Aizawla Sikulpui leh Sikulsen chu Mizoram sorkarin kum 68 a enkawl hnuah Mizoram Synod kutah an enkawl turin a hlan lêt. Sikul hlan lêtna inkhawm hi Sikulpui hall-ah neih a ni a, School Education department hotu te, Synod puipate leh Synod Education Board member-te an tel. Sikulsen leh Sikulpui inhlan lêtna lehkha-ah hian School Education department aiawhin secretary, Esther Lalruatkimi leh Mizoram Synod aiawhin moderator, Rev. R Lalchangliana ten hming an ziak.
23rd. Saturday : Zonuam Bial KṬP te chuan an bial KṬP kum 10 tlin pualin Synod Hospital-ah thisen unit 48 an pe a, petute mipa 37 leh hmeichhia 11 an ni.
24th. Sunday : Lalruatzela (52), Saitual chuan a nupui hlui Lalṭhatluangi (52), Saitual mi tho chu a vit hlum.
25th. Monday : Chief minister, Zoramthanga chuan Asam lam dep hmun hrang hranga ramri vengtute a tlawh a, Mizoram pum him theihna tura an inpekna ropui a tih thu a hrilh. CM hi Kolasib bialtu MLA, K. Lalrinliana leh Serlui bialtu MLA, Lalrinsanga Ralte ten an ṭawiawm a ni.
26th. Tuesday : Mizorama tangkhang mek, an awmna state-a haw duh zirtirtu leh zirlai mi pariatte chuan hawna tur remchang an hmuh theih loh avangin Governor, PS Sreedharan Pillai an hmu a, hma lakpui turin an ngen. Larsap chuan, Mizorama tangkhang mek state páwn lama haw turte chu a ṭul anga a puih tur thu a lo hrilh.
27th. Wednesday : Darlak bul Teirei lui-a lei dawh mek chu tuilianin a dona lei chhunpawn chu lain, a chim.
28th. Thursday : Delhi-a Mizo tangkhang zinga mi pakua phurtu bus RJ-14 TE-4359, Siaha pan chu Ṭawipui South khaw dái-ah chesualin, kawng thlangah ft. 25 vel a lum a, hliam an awm nãin, thi an awm lo. Bus hi May 24, 2020-a Delhi chhuahsana Mizoram rawn pan a ni a; Mizo pakua bakah, a khalhtu pahnih (hnam dang ve ve) an chuang.
29th. Friday : Former Legislators Association of Mizoram (FLAM) chuan an member thi - F Saphleia leh J Lawmzuala, Lunglei ve vete chu an in ve ve-ah an rál a, minister C Lalrinsanga'n a telpui. F Saphleia hi kum 1989 khan Congress party ticket-in Lunglei South bialah MLA atana thlan a ni a, March 7, 2020 khan kum 83 mi niin a thi. J Lawmzuala hi kum 1998 khan PC party ticket-in Lunglei South bialah vêk MLA atan thlan a ni a, March 30, 2020 khan kum 76 mi niin a thi a ni.
30th. Saturday : Mizoram Football Association chuan thuchhuah siamin tunlai a hripui leng coronavirus avangin 2019-2020 season-a a la khelh zawh loh inelna zawng zawng tih tawp a nih thu an puang.
31st. Sunday : Lalngaihawma (54) s/o Zahmingthanga (L) Durtlang chu a thi.
Comments
Post a Comment