FEBRUARY 2020, MIZO(RAM) DIARY

1st. Saturday : Chanmari leh Chaltlang inkar kawngpui-ah i10 car chesual in kawng thlangah a lum. Car-a chuang Lalrinnunga (23) s/o Lalneihmawia, Chaltlang Ruamveng leh R. Zothansanga (48) s/o R. Rualkhuma (L), Chaltlang Venglaite chu chetsualna hmunah an thi.

2nd. Sunday : Zemabawk Kananthar Vengah lei a min a, leimin hian Assam type in pakhat a minpui bakah, Aizawl-Seling kawng NH-54 a hnawh ping.

3rd. Monday : Governor, PS Sreedharan Pillai chuan   Kolasib District Hospital a tlawh a, hospital poor fund atan Rs. 10,000/- a hlân nghal. Kolasib District Hospital-ah hian Male Ward-ah khum 20, Female Ward-ah khum 20, Obstetric & Gynae Ward-ah khum 12, Isolation Ward-ah khum 6 leh Staff Sick Room-ah khum 2 a awm a ni.

4th. Tuesday : Sialkal Range Development Council (SRDC) office thar, Mimbung khua-a mi chu Chief Minister, Zoramthanga'n a hawng. Chief Minister chuan, SRDC chu council puitlinga hlàn a nih theih nan sorkarin theihtawpa hma a lâkpui tur thu a sawi.

5th. Wednesday : Cricket Association of Mizoram hnuai-a II Division inelna Khaled Memorial Tournament 2020 chu a hmawr bawk (final) a ni a, team ṭha pahnih inkhelah Bawngkawn South chuan Armed Veng chu run 89 ngawta hnehin an champion. Inelna-ah hian team pakua an tel a ni.

6th. Thursday : HM Ronghaka, Dulte chu May ni 14, 2015-ah tleirawl a pawngsual avangin hrehawm taka kum 10 chhung jail tang tur leh cheng 1,000/- chawi turin thiamloh chantir a ni a, a pawisa chawi hi a pek theihloh chuan thla 8 dang jail a tan belh ang.

7th. Friday : Mizoram Final Electoral Roll 2020 tlangzarh a ni a, heta a lan dan chuan Mizoram-ah Voters 799328 kan awm mek tih tarlan a ni.

8th. Saturday : Hmangaihsanga (35), Bulfek­zawl khua a mi khalh maxicab chuan Champhai leh New Champhai inkara kawng siam hna thawk mek, Tarmat company-a thawk hnam dang pahnih a sú a, mahse, a tlan tlang lui a. Zotlangah C. Khawllianthanga (55), sú lehin ká pawh chhawn lohin a thi. Hemi hnu hian T. Laikunga te nupa chu a su hliam leh bawk.  Hetia'nga pawi a khawih hnu pawha a tlan luih zel avangin Mualkawi ṭhalai thinrimte chuan a motor chu hmun him lai-ah la in an hal.

9th. Sunday : Pu Lalthankunga, Deputy Speaker hlui, MNF Gen. Hqrs. Adviser ni lai chu an chênna in Tuikhuahtlângah lungphu châwlin a boral.

10th. Monday : Kângmei Vên Hapta “Fire Prevention Week 2020” chu district hrang hrangah hawn a ni.

11th. Tuesday : Bîlkhawthlîrah truck,  MZ-02 A-3493, Vai khalhin Lalramkima (26) s/o KC Laltlanthanga, Bilkhawthlir chu a su hlum.Tipper hi Lalnghakmawii Pachuau, Lunglei Bazar Veng hminga ziah luh a ni.

12th. Wednesday : Zuangtui-a tuizêm siamna hmunah kângmei a chhuak a, mihring thi leh hliam   an awm lo na a, tuizem siamsa engemawzat a kang chhia.

13th. Thursday : International Paragliding Accuracy Championship - 2020 chu Sêrchhîpah țan a ni.

14th. Friday : Valentine’s Day a ni a, he ni puala Mizoram puma thisen pêk rûnpui huaihawtah thisen unit 1114 pêk a ni.

15th. Saturday : Champhai Excise & Narcotics Enforcement Staff-te chuan Țiau kawng, Hruaikawn pêngah heroin hawng hnih, gram 24.1 an man a, a neitu, Lalhmingthanga (25) New Champhai an man bawk.

16th. Sunday : Ex-MLA, C. Sangzuala (83) h/o Lalthanpari, Chaltlang  chu cancer natna avangin LRM Hospital-ah a boral.

17th. Monday : Mizoram Legislative Assembly pariatna session vawi ngana, budget session ni bawk chu ṭan a ni a, Governor, PS Sreedharan chuan, House member-te chu Mizoram hmasawnna atan session-ah ṭha taka an tel a beisei thu a sawi.

18th. Tuesday :  UPC (North East India) Kohhran missionary hmasa ber Rev. Ellis Luther Scism-a'n Mizoram a luh ní champha vawi 70- na a ni a, UPC din ni a ngaiin tualchhung kohhran hrang hrangte'n an lawm.
 
19th. Wednesday : Kolasib District Agriculture Office hmalakna in Circuit House Complex-ah Rabi Mela buatsaih a ni a, DC,  Sangchhin Chinzah in a hmanpui.
Pi Sangchhin Chinzah chuan Damdawi tel lo a thlai tharchhuah te chu khawvel hmun hrang hrang a mi te ngaihsan a nih mek thu sawiin Mizoram leilung hausakna hmang hian organic farming nasa zawk a kalpui uar zel a pawimawh thu a sawi. Mela-ah hian Kolasib district chhunga Zau hrang hrang atanga loneituten thlasik thlai an tharchhuah te chu stall 19 ah man tlawm zawk a lei theihin an rawn phochhuak.

20th. Thursday : India danpui hnuai-a Mizoramin state anga inrêlbawlna a neih ṭan ni, Mizoram State Day a ni.  Mizorama district tinah sorkar bultumin lawm a ni a, Aizawlah chuan Vanapa Hall-ah lawm niin, Governor, PS Shreedharan Pillai leh chief minister Zoramthanga ten an hmanpui. Aizawla State Day lawmna inkhawm hi chief secretary, Lal­nunmawia Chuaungo-in a kaihruai a, sorkar mi pawimawh engemawzat an tel. Mizoram hi kum 1972 aṭanga union territory a nih hnuah, February 20, 1987 khan state puitlingah hlànkai a ni a, India ram state 23-na a ni. 

21st. Friday : Mizoram State Election Commissioner (SEC) atan Laima Chozah, IAS (Rtd.) ruat a ni. Thla khatah Rs. 2,25,000/- (fix) a  hlawh ang.

22nd. Saturday : 
Mizorama a hmasa ber atana Chaltlang khawtlangin ruang zalh (phûm)-na tura thlàn chhâwng an siam chu Chief Minister, Zoramthanga'n a hawng. Thlàn hi RCC building-a siam a ni. Thlân in hi chhâwng nga a ni a, chhâwng tinah thlàn 27 dah niin, thlan 135 a awm a; a chhaka thlân 28 an siam belh nen a vaiin thlân 163 a awm. 

23rd. Sunday : Tarpho leh Khawhri vahchap chu tu tih hriat lohte’n an hal a, Tarpho vahchap phei chu a kâng
vek.

24th. Monday : West Lungdar naupang, kum 13 mi, rûk bo tum nia rinhlelh thil thu-ah vai pathumte man an ni a, an motor mipui thinrimin an hal zui.

25th. Tuesday : Mizoram sorkar chuan Mizoram Public Service Commission (MPSC) member atan FJ Liantluanga, MCS (Rtd.) leh Malsawmdawngliana, MES (Rtd.) te a ruat thar. 

26th. Wednesday : Mizoram Baptist Koh­hran Hmeichhe Pawl (MBKHP) Rorel vawi 70-na chu   Thenzawl Venghluna BCM Bethlehem biakinah palai lawmna inkhawm neih a tan a ni. MBKHP-ah hian pastor bial 85-ah unit 532 leh member 33,746 an awm mek a ni.

27th. Thursday : Aizawl South-II Area MUP chuan   Tuikhuahtlang YMA Hall-ah inkhawmpui an hmang a, Social Welfare minister, Dr K Bei­chhua chuan a hmanpui. Inkhawmah hian MUP Aizawl South-II area chhunga mipa upa ber, Laihnuna (96) leh hmeichhe upa ber, C Lal­chungnungi (90) hnenah thilpek hlan a ni.

28th. Friday : Mizoram Science, Technology & Inno­vation Council (MIS­TIC) chuan  ATI auditorium-ah National Science Day an lawm a, Planning secretary, Dr C Van­lalramsanga'n a hman pui. National Science Day hi February 28, 1987 aṭangin  India ram pumah lawm ṭhin niin India mi physics a Nobel Prize la hmasa ber Dr CV Raman'n February 28, 1928 a 'Raman Effect' a hmuhchhuah ni hriatrengna a ni.

29th. Saturday : Lengpui Airport a IndiGo thlawhna service thar lawmna Chief Minister, Pu Zoramthanga ho-in hman a ni. Regional Connectivity Scheme (UDAN-RCS) hnuai-a IndiGo in India hmarchhak state zinga service an neihna khawpui parukna Aizawl chu niin, IndiGo flight hi Aizawl - Guwahati inkar service tur niin Lengpui atanga thlawhna route la awm ngailo, Agartala khawpui pawh a thlawk tel dawn a ni. IndiGo hi airline chuan man tlawm, InterGlobe Aviation Ltd company peng pakhat a ni a. Haryana-ah Headquarter neiin thlawhna 255 service an nei a. Nitin flight 1500 chuang an nei a. Aizawl - Agartala - Guwahati flight hi ATR thawhna a ni.