1st. Wednesday: Governor, Prof. Jagdish Mukhi chuan Zokhawthar a tlawh a, Indo-Myanmar Border Trade Point-a ramri leh ramri venghimtu Assam Rifles sipaite hnathawh dan a enfiah.
2nd. Thursday: Mizoram Board of School Education chuan High School Leaving Certificate Examination-2019 result a tichhuaka, exam beitu 17,346 zinga 11,783 (67.93%) in an pass a, a pumpui-ah Lalrinnungi d/o Zothantluanga, Sihphir, St. Joseph Higher Secondary School, Aizawl a kal chu pakhatna a ni.
3rd. Friday: MFA Cup vawi 19-na chu a hmawrbawk a ni ta. Final-ah hian Aizawl FC Junior chuan Lunglei Zotlang chu hun pangngai leh hun pekbelhah goal awmloa an inkhelh hnu in penalty hmangin 3-2 in an chak. Champion team hian trophy leh cheng 1,00,000/- cheque an dawng a ni.
4th. Saturday: Champhai Tlangsama Hrangkianlova in, Assam Type chu a kang a, kangmei hian bungraw ṭhenkhat bakah scooty leh thingzai khawl a kangral.
5th. Sunday: YMA leh police ṭangkawp chuan Denghliri, Edenthar inah hnamdang kum tlinglo hmeichhe pariat leh mipa pali an man. He'ng mite hi Bangladesh aṭanga Myanmar-a kalpui tur nia rin an ni.
6th. Monday: MZP General Headquarter hruaitu te chuan Zofate chawlhbuk an lo sak tawhna, Bairabi Zophai an tlawh a, chawlhbuk an sakna tur hmunah chhinchhiahna an tar.
7th. Tuesday: World Orphans Day a ni a, World Vision India leh Gan Sabra huaihawtin Chanmari YMA Hall-ah hman a ni. He hunah hian HIV vei naupangte leh HIV avanga nu leh pa chan tawh naupang te an tel a, zai thiam leh lam thiam te nen hun hlimawm tak an hmang.
8th. Wednesday: Mizoram Civil Service officer, Lalrempuii Fanai chu SIRD sum eiru-a puhna-ah Special Court (Prevention of Corruption Act) chuan thiamloh a chantir a, kum nga jail tang tur leh Rs 5,00,000/- chawi turin a hrem. MCS Lalrempuii Fanai hi computer 150 supply na a sum Rs 37,50,000/- hlep ru-a puh a ni.
9th. Thursday: India rama huaisen chawimawina, Uttam Jeevan Raksha Padak chu H. Beiduasa s/o H. Vabeily, Tisopi hnenah hlan a ni. H. Beiduasa hian kum 2016 khan sabereka khuangkaihin a lak naupang pakhat, khama tla mai tura ni'a ngaih chu a chhanchhuak a ni.
10th. Friday: Mizoram Chess Association leh Mizo Zirlai Pawl ten an buatsaih, MZP 8th. Mizoram Inter-Chess Championship-2019 chu Dawrpui Multipurpose Center-ah zawh a ni. Inelna hi category li-ah ṭhen a ni a, category tina champion te chu he'ng mite hi an ni: Primary School - Lalnunmawia, Govt. Primary School, Zonuam
Middle School - Lallawmzuala, Govt. Middle School, Reiek
High School - Johny R. Lalmuanpuia, Ephraim H/S
Higher Secondary School - St. Benedict HSS, Reiek.
11th. Saturday: Central YMA hnuai-a ruihhlo dotu SRS tena an mankhawm sa te chu Mizoram Kohhran Hruaitu Committee Chairman, Rev. R. Lalhmingthanga'n Central YMA pisa tualah a halral. Ruihhlo te hi ₹ nuai 473/- chuang hu a ni.
12th. Sunday: 'Nute Ni' a ni a, khawvel hmun hrang hrangah hman niin Mizoramah pawh Salvation Army ten hlim takin an hmang.
13th. Monday : Siaha DC, Bhupesh Chaudhuri chuan Siaha District Hospital a tlawh a, hospital-a thawk te hian an thil neih leh an mamawh thil chi hrang hrang an lo thlen. Siaha District Hospital-ah hian khum 54 awmin doctor hi 12 an awm mek a ni.
14th. Tuesday : Mizoram Board of School Education chuan Higher Secondary School Leaving Certificate Examination result a ti chhuak a, exam beitu 10,606 zinga 8,380 (78.94%) in an pass.
15th. Wednesday : Aizawl Press Club-a MJA Public Library sak thar chu MJA President, Zonunsanga Khiangte in a hawng. Library-ah hian lehkhabu hrang hrang 5,416 a awm mek a ni.
16th. Thursday : Suzuki Gixxer Pro-Volleyball League - 2019, Chawnpui Sport Centre-a khelh chu a hmawr bawk a ni ta a, final-ah hian Chhinga Veng Spikers chuan Durtlang chu 25-23, 18-25, 22-24, 31-28, 15-13 (3-2) a hnehin an champion. Champion team, Chhinga veng Spikers hian trophy bakah tangkafai ₹ 1,30,000/- (₹ 20,400) an dawng a ni.
17th. Friday : Mizoram State Museum chuan Aizawl-ah International Museum Day an hmanga, Art & Culture Director, R. Hmingthanzuala'n a hmanpui. International Council of Museum chuan kum 1977 khan May ni 18 chu International Museum Day atan a puanga, kumi'nah May ni 18 chu Inrinni a nih avangin vawiin hian hman a ni ta a ni.
18th. Saturday : Lunglei DC, K. Lalrinzuala chuan South Vanlaiphai leilet 'Zaupui' a tlawh a, lo neitu te fuihin, kut hnathawh chu hna zahawm bera khawvelin a ngaih, ram changkang apiangin an ngaisanga, an hausak pui a ni tih a sawi.
19th. Sunday : Synod Mission Board in Ningani zan atanga Bethlehem Venglai kohhran biak ina an hman, 'Missionary Retreat' chu a tiak. Retreat hi Home Mission (Mizoram chhung) leh Cachar tlangram a thawk te tana buatsaih a ni.
20th. Monday : Champhai Tlangsam Branch KTP te chuan Champhai District Hospital tan thisen unit 20 an pe a, thisen petu te hi mipa 17 leh hmeichhia 3 an ni.
21st. Tuesday : Champhai DFA hnuai-a inelna lian leh ngaihhlut ber, Rii & Hawla Inter Village Football Tournament - 2019 chu a hmawr bawk a ni ta a, final-ah hian Kanan chuan Vengthlang chu Ramdinthara goal hmanga 1-0 a hnehin an champion.
22nd. Wednesday : Ngaizelah kawng chung atanga lung tla in kawngsira two wheeler workshop a dengchhiaa, two wheeler paruk kawngthlangah a hnawlthla. Lirthei engmah kaltlang theihlohin kawng hi a ping nghal. Mihring thi leh hliam erawh an awmlo.
23rd. Thursday : Mizoram MP Election result chu puan a ni ta a, MNF party candidate, Pu C. Lalrosanga chu vote 2,24,286 hmu in a tling. Amah hnaih ber tu Lalnghinglova Hmar chuan vote 8,140 in a phaklo a ni. MP thlan ruala neih Aizawl West - I Assembly Constituency bye-election result pawh puan nghal a ni a, MNF candidate tho, Zothantluanga chu vote 12,309 a tling bawk.
24th. Friday : Serchhip Sports Complex-ah Mizoram Profesional Footballer Association (MPFA) leh Serchhip XI ten Exhibition Match an khel a, ruahsur nasa tak hnuai-ah MPFA hi 4-3 in an chak.
25th. Saturday : Rev. K. Lungmuana lehkhabu ziah, 'Hei le, Mizo moral reform chu' tih chu Mizoram Synod Moderator, Rev. R. Lalhmingthanga'n ZONET Cable TV Studio-ah a tlangzarh. Lehkhabu hi ₹ 250/- man tur a ni.
26th. Sunday : Mizoram Synod-in Mizoram pum huap, Kohhran Pavalai Pawl Meet vawi - 4 na, Chanmari West kohhran biak ina neih chu a tiak. Meet thupui chu 'Chhungkaw rel fel' tih a ni.
27th. Monday : Traffic Police te chuan Aizawl khawpui-ah No Tolerance Week an hmang tan a, lirthei document leh driving license te an endik.
28th. Tuesday : Aizawl West - I Assembly atang bye-election hmanga thlan tlin MNF party candidate, Zothantluanga chu speaker, Lalrinliana Sailo chuan a pisa-ah rinawmna thu tiamtirin a la lut.
29th. Wednesday : Food, Civil & Consumer Affairs (FC&CA) Minister, K. Lalrinliana chuan Hunthar venga Legal Metrology office a tlawh a, office mamawh hrang hrang te an sawiho. Minister hi FC&CA Secretary, HL Rochungnunga'n a tawiawm.
30th. Thursday : Tuikual North Branch KTP chuan an kohhran hall-ah blood donation camp an huaihawta, Aizawl Civil Hospital tan thisen unit 29 an pe a, thisen petu te hi mipa 28 leh hmeichhia 1 an ni.
31st. Friday : AOC, Lunglei-a petrol pump chu ni khata darkar 24 hawn tawh turin Co-operation minister, C. Lalrinsanga'n a hawng.
Comments
Post a Comment