Skip to main content

SEPTEMBER 2018, MIZO(RAM) DIARY



1st. Saturday: Postal department in bank thar a din, India Payments Bank chu India ram pumah a ruala hawn a ni a, Mizoramah pawh branch 6 leh acces 24 hawn a ni.

2nd. Sunday: JK Tyre-FMSCY National Racing Championship 2018, round 2-ah PC Andy Lalhmangaihsanga pakhatna a ni.

3rd. Monday: Mizoram Pollution Control Board hnuaia Mizoram ENVIS Hub chuan thla hnih awh tur Green Skill Development. Programme traning, Certificate Course in Pollution Monitors an buatsaih chu Directorate of Economics & Statistics Conference Hall-ah Pu Lalram Thanga'n a hawng.

4th. Tuesday: India hmarchhaka snooker inelna The Aijal Club North East Snooker Championship-2018 chu hawn a ni.

5th. Wednesday: Teacher' Day a ni a, sikul hrang hrangin hlim takin an lawm.

6th. Thursday: Mizoram Premier League session-7 chu khelh țan a ni a, inkhel hmasa berah champion lai Chhinga veng in kai thar Chawnpui chu 1-0 in an hneh.

7th. Friday: Lawngtlai Central Young Lai Association Playground-a phul lem phah thar chu Sports & Youth Services Minister Pu Zodintluanga'n a hawng.

8th. Saturday: Tunkar Thawhlehni a țan tak, The Aijal Club North East Snooker Championship-2018 chu a hmawr bawk a ni taa, hetah hian Mizo tlangval, Lalrina Renthlei chu a champion.

9th. Sunday: Mizoram kohhran hrang hranga naupangte chuan Sunday School Inkhawmpui an hmang.

10th. Monday: All India Congress Committee chuan India rama tuialhthei man sang leh to chak lutuk duhlohna lantirna 'Bharat Bandh' chu rampumah neih a ni a, Mizoramah pawh Vanapa Hall kawtah neih a ni.

11th. Tuesday: Gauhati High Court chuan Mizoram sorkar chu NLUP sem rih lo turin a hriattir.

12th. Wednesday: MHIP leh Art & Culture Department țangkawpin an buatsaih, 'Siktuithiang Kut' chu Lammualah hman a ni a, minister pahnihin an telpui.

13th. Thursday: Mizoram Synod Choir music video 'Vanram ropuiah' tih chu Synod Conference Center-a Synod Choir Cabin-ah CKȚP Leader, Rev. Dr. K. Lallawmzuala'n a tlangzarh.

14th. Friday: Home Minister, Pu R. Lalzirliana, Power & Electricity, Rural Development leh Prison changtu ni bawk chuan Chief Minister, Pu Lal Thanhawla hnenah cabinet minister ațanga a banna a thehlut.

15th. Saturday: Sihphir Arm Wrestling Association chuan local tournament an buatsaih a, hetah hian kg 70 chunglam champion Pauthianlala chu a champion. Pauthianlala hian a weight category champion lawmman bakah Rs 500/- leh certificate a dawng.

16th. Sunday: Mizo Sunday School Union (MSSU) hnuaia Senior Department te chuan inkhawmpui an hmang. MSSU report in a tarlan danin tunah hian Senior Department-ah hian naupang 29,676 leh zirtirtu 4,610 an awm mek a ni.

17th. Monday: Mizoram Pradesh Congress Committee chuan an Vice President, Pu R. Lalzirliana chu a chet danah an lungawiloh avangin tiamchin awmloin an hnawtchhuak.

18th. Tuesday: India hmarchhak state ten kumtin a huhoa an hman thin, World Bamboo Day chu R.Dengthuama hall-ah hman a ni a, Chief Minister, Pu Lal Thanhawla chu khullian a ni.

19th. Wednesday: Mizoram Basket Ball Association buatsaih, Inter School Basketball Tournament chu a hmawr bawk a ni ta. Hmeichhiaah St. Pauls HSS-A, Mipa Middle School-ah Gospel Centenry School-A leh mipa High School-ah Neuhof te an champion.

20th. Thursday: MNF party chuan hmun hrang hrangah 'Martar Ni' an hmanga, general headquarter hruaitute chu hmun hrang hrangah an in  semdarha, party president, Pu Zoramthanga chuan Mamitah a hman pui.

21st. Friday: Mizoram Youth Commission chuan Young Achievers Award an sem a, thalai mahni thiltiha hlawhtling mi pariat hnenah award hi hlan anni. He hun hi Finance Minister, Pu Lalsawta chuan khuallian niin a hman pui.

22nd. Saturday: I&PR Department leh Inovations India in Ningani atanga an tan, Mizoram International Short Film Festival chu khar a ni ta. He hunah hian short film 82 chhuah a ni a, intihsiakna hrang hrangah lawmman sem nghal  ni. Open category-ah Communism (Russian) chuan lawmman pakhatna (Anthurium Gold Award for Best Film) a la a, Mizo category-ah My Angel, Albert Zosangliana siam chuan lawmman pakhatna a la thung.

23rd. Sunday: Penticostal Youth Department (PYD) ten Zirtawpni zan atanga Lawngtlaia inkhawmpui an hman chu a tiak. Kum 2019 inkhawmpuina hmun atan Hnahlan an thlanga, thupui atan 'Danglamna' tih an hmang bawk ang. PYD-ah hian member 9,804 an awm a, heng zinga 537 te hi zuk leh hmuamah an fihlim.

24th. Monday: All India Mixed Martial Arts Association butsaih National Mixed Martial Arts Championship-2018, New Delhi-a neih chu a zo ta a, Mizo infiammi kal 20 (hruaitu pali telin) zinga pakuain medal an hlawhchhuak a ni. Inelna hi World Championship-2018 Bahrain a neih tura India aiawh tur thlanna a ni nghala, hetah hian Mizo infiammi pahnih leh refree & judge turin pakhat thlan anni.

25th. Tuesday: Sateek High School-a Science Laboratory building thar chu bialtu MLA, Pu KS Thanga, Minister chuan a hawng. Building hi Rs 5,34,000/- senga sak a ni.

26th. Wednesday: Art & Culture Department leh Sangeet Natak Akademy, New Delhi ten an buatsaih, ni thum awh tur 'Swar Sudha-Festival of Choral Music & Instrumental Ensemble' chu Vanapa Hall-ah tan a ni a, Art & Culture Minister, Pu R. Romawia'n  a hawng.

27th. Thursday: Mizoram electoral roll thar, kumi'n election a hman tur chu district tinah tlangzarh a ni a, Mizoram pumah voter 7,68,181 awmin heng zinga 3,93,685 hi hmeichhia anni. Aizawl district-ah voter tam berin 2,88,322 an awma, voter tlemna ber Siaha district-ah chuan voter 38,843 an awm thung. Tripura Relief Camp a awm te roll-ah thun anni tawh naa, tunṭuma tarlanah hian telh annilo thung.

28th. Friday: ZONET Mizo Idol atan Chanmari tlangval, Jerry Lalrinawma s/o Zoliana (L) chu thlan a ni. Mizoram Idol thar Jerr-a hian lawmman Rs 1,50,000/- leh scooter bakah mi ṭhahnemngaite hnen aṭangin thilpek engemawzat a dawng bawk.

29th. Saturday: National Peoples' Party (NPP) chu Mizoramah din a nih thu party president, Conrad Sangma, Meghelaya Chief Minister ni bawk chuan Aijal Club-ah a puang. Anni hian MLA Election lo awm tur hi chuh an tum thu an puang nghal.

30th. Sunday: Mizoram Presbyterian kohhranin thlatir aṭanga an beihrual chu a zo ta. A tawp ni hi 'Nu leh pa ni' leh 'Kristian chhungkaw ni' an vuah.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more