PARTY POLITICS

Kan hma lawk, November ni 28 khian Mizoram rorel khawl tur, MLA thlan hun a lo ni leh ta reng mai. Thla khat bak a awm ta lo. Party a inhmang ho phei chu mawngvawmba ang maiin an hman hlel hle tawh mai a nih hi. Khawi emaw punkhawm a awm dek dek tawh chuan politics hi kan sawi zin pawl tak a ni awm e. A mawh lo e. Tun ang inthlan hnaih tawha kan lo ngaihven hi ram tan thil tha tak ni zawk pawhin a lang e.

Mihring kan inang lo ang bawkin kan thil vei leh ngaih pawimawh zawng pawh a danglam. Thenkhatin politics an ngaihven loh viau laiin thenkhat ve thung chuan an hun pum an pe a. Hunpuma inpe lemlo tuichilh tak tak pawh kan tam awm e.

YMA hruaitu te zingah pawh party a inhmang kan awm nawk mai. Thenkhat phei chu kan awmna a inan loh avangin kan khawchhung thil mai maiah pawh nasa tawkin kan lo inhnial thin zuk nia. Tin, kan party thiltih a nih chuan dik leh tha em em, party dang thiltih a nih chuan thil pangngai tak pawh nise sawisel tum ngar ngar hi ram aia party hmangaih anni awm e. Kumtir lama kan khaw pa CM security ten kut an thlak chungchangah pawh eptu lam mipui te chuan politics zawnga la in sorkar an dem a, tlem lai deuha Karela tuilian tuartu te tanpui na tura sum thehchhuah pawh tullo ang lek lekin kan sawi duh a, thenkhat phei chuan an pek tak tak pawh kan ringlo niawm tak a ni! A mak ngawt mai! Sorkar hotute thiltih ni miahlo Mizoramah thil duhawm lo (chhiatna) tak tak a thleng chamchi a, hetiang nikhua te hian eptu lam chu an lawm zawk thin emaw tih mai turin a tuartu te tanpui tum mang siloin chhiatna thlenna hmun chu chhanchhuah hna thawktu te aimahin an thlen hma zawk chang lah a tam.

Tunah pawh kan han inthlang mah na’nga, thenkhat chuan ram aiin party kan dah hmasa leh hlawm ngeiin a rinawm. Fiamthua an sawi thin, “Vawkpui pawh ni se, Congress (sorkar lai anni bawka tehkhin nan hmang mai ila) annih hrim hrim chuan ka vote ang,” tih te pawh hi a tak tak a nih hmel ta viau mai. Hemi ep, ep chiah lo tho si chu Congress etc.an nih hrim hrim avanga vote tum lo hrim hrim pawh a awm theih awm e.

Engpawhnise, party politics bansana ram tana thil tha tur ngaihtuah chunga vote thlak theuh turin member te kan insawm a ni e.