1st. Tuesday : Lunglei Higher Secondary School NSS chuan an sikulah blood donation camp an huaihawta, Lunglei Civil Hospital tan hmeichhia 19 leh mipa 17 ten thisen unit 36 an pe.
2nd. Wednesday : Durtlang leh Bawngkawn inkarah Sihphir bus MZ 01C-5766 leh bike MZ 08-2061, Lalrotluanga(28) s/o H. Thangliana, Hortoki khalh te chu an insu a, bike khalhtu Lalrotluanga hi ka chhawn loin a thi.
3rd. Thursday : Mizoram Board School Education chuan HSLC exam result a ti chhuaka, zirlai exam 17,695 zinga 13,563 an pass a, pass percentage hi 76.65% a ni. Lalremsiama Darchhun s/o Vanlalpeka, Tanhril, St. Paul's HSS a zir leh Royal Philem s/o Philem Opendro Singh, Selesih, Mt. Carmel HSS a zir te chu pakhatna anni.
4th. Friday : Aizawl District Football Association chuan 2018-2021 chhunga hruaitu tur an thlanga, President atan Pu Robert Romawia Royte, Chhinga veng chu a tling.
5th. Saturday : Dinthar branch KTP te chuan Aizawl Civil Hospital tan thisen unit 41 an pe a, thisen petute hi hmeichhia 3 leh mipa 38 anni.
6th. Sunday : Mizoram Salvation Army Corps leh society hrang hrang te chuan an inkhawmnaah Mother's Day an hmang a, he ni pual hian nute hnenah chawimawina leh zahna thilpek an pe.
7th. Monday : Vanlalfela, Khawzawl thattu Kumar Subha chu damchhunga jail tang turin Champhai Additional Judge, R. Vanlalvena'n thutlukna a siam. Kumar-a hian kum 2014 khan rama a riahpui Vanlalfela hi a that a ni.
8th. Tuesday : Zoram People's Movement chuan kumi'n assembly inthlanpui lo awm tura an chief ministerial candidate tur chu ZNP President, Pu Lalduhoma a nih thu an puang.
9th. Wednesday : Mizoram Table Tennis Association (MTTA) hnuaia kum 2018-'19 chhunga inelna hmasa ber chu MTTA Hall, Mission Vengah khelh tan a ni. Tournament hi May ni 12 thleng neih tura ruahman a ni. Inelnaah hian player 145 an tel a ni.
10th. Thursday : C.Lalthangpuii lehkhabu buatsaih 'C.Lalruata biahzai' tih chu Synod Conference Centre-ah Home Minister, Pu R.Lalzirliana'n a tlangzarh. Lehkhabuah hian thu ziak chi hrang hrang 47 a awm a ni.
11th. Friday : Mizoram Chess Association buatsaih, Dr. D.Baruah Chess Championship 2018 chu Ramhlun Indoor Stadium-ah khelh zawh a ni. Inelna hi agd category lia then a ni a, Zonuam player kum ruk mi, Mamsawmhlua Kawilam chu inlan zinga naupang ber a ni.
12th. Saturday : Zemabawk daia Berawlui quarry chu a chima, helai hmuna hnathawk mi pali, Zemabawk mi vek chu a delh hlum a, motor pahnih a delh chhe bawk.
13th. Sunday : India U-16 football team chuan Tajikistan chu 4-1 a hnehin an champion. Inelna hi Serbia rama neih a ni. India team-ah hian Mizo pali awmin an goal li zinga goal khat hi Mizo tlangval khung a ni nghe nghein Mizo goalkeeper chu best keeper-ah thlan a ni bawk.
14th. Monday : Bairabi MSU te chuan high school a zirtirtu dah belh tura sorkar an ngenna a hlawhtlin mai loh avangin sorkar kar nan an khuaa sorkar zirna in zawng zawng chu tiamchin awmloin an khar.
15th. Tuesday : Sialsuk leh Thenzawl inkar hnathawk, Sanjoy Thapa (39), s/o TB Thapa, Silchar chu crane in a delh a, a hnuah damdawi inah a thi.
16th. Wednesday : Khawzawl Welfare Committee, Aizawl chuan Aizawl Press Club-ah tunhnaia Khawzawl ti hmingthatu mi pathumte an chawimawi a, bialtu MLA, Pu Lalrinliana Sailo in a hmanpui.
1 7 Thursday : Mizoram Board of School Education chuan HSSLC exam result a ti chhuaka, zirlai exam 11,802 zinga 9,500 an pass-a, pass percentage hi 80.49% a ni.
18 th. Friday : Mizoram Football Association leh Mizo Hmeichhe Insuihkhawm Pawl in a buatsaih tur, GIG Motor's All Mizoram Inter Branch Football Tournament chu Pi Lal Riliani'n a kick-off. Inelnaah hian MHIP branch 37 an tel dawn a, May ni 22 atangin Lalmualah khelh tan a ni ang.
19th. Saturday : Mission Vengthlang Branch YMA chuan an veng mi leh sa India rama civil mite chawimawina sang, Padma Shree dawngtu mi pathum, chatuan ram pan tawh te hriatrengna lungphun an phun chu Central YMA President, Pu Vanlalruata'n a hawng.
20th. Sunday : Pentikos ni a ni a, Mizorama kohhran hrang hrang ten hlim takin an hmang.
21st. Monday : Mizoram Basketball Association in session tan na atana an hman, MBBA Cup chu Hawla Indoor Stadium-ah khelh tan a ni.
22nd. Tuesday : LBS Suzuki Inter Branch Volleyball Tournament vawi 21-na chu R. Dengthuma Indoor Stadium, Mualpuiah khelh tan a ni.
23rd. Wednesday : Mizoram Youth Commission chuan Lungleiah Youth Summit & Road Show 2018 an buatsaih a, Chief Minister, Pu Lal Thanhawla'n a hawng. MYC hian hetiang hun hi district hrang hrangah an buatsaih tawh a, Lungleia an neih hi a hnuhnung ber tur a ni.
24th. Thursday : Vice President, M. Venkaiah Naidu chuan lehlangin Mizoram a rawn tlawh a, Mizoram University-ah Academic & Seminar Complex a hawn bakah Boy's & Girl's hostel sak tur lungphum a phum.
25th. Friday : Mizoram Information Commision-a Information Commissioner atan Pu Zorammawia, IPS (Rtd.) chu Raj Bhavan-ah Governor, Lt. Gen. Nirbhay Sharma chuan rinawmna thu tiamtirin a lalut.
26th. Saturday : Central Board of School Education chuan kumina pawl 12 exam result a ti chhuaka, pass percentage hi 83.01% a ni a, nikum aiin a tha zawk.
27th. Sunday : Lalfakzuala (27) s/o Lalngilneia, Vairengte chu an in atangin a tlahlum.
28th. Monday: Governor, Nirbhay Sharma chuan a term a tawp tak avangin Mizoram a chhuahsan.
29th. Tuesday : Mizoram Governor 19-na turin Karela lam mi, Kummanam Rajasekharan chu Gauhati High Court Chief Justice, Ajit Singh chuan rinawmna thu tiamtirin a lalut.
30th. Wednesday : United Forum of Bank Union's hmalaknain India ram bank-a thawk ten Indian Bank Association leh sorkar laipui laka an lungawilohna lantir nan bank te an khara, hei hi Mizoramah pawh zawm ve a ni.
31st. Thursday : World No Tobacco Day a ni a, Mizoram hmun hrang hrangah hman ve a ni.
Comments
Post a Comment