Kristian Tlangau leh Kristian thalai chanchinbu te naupan tet atanga la kan ni bawk a, a ngaihnawm emaw ngaihnawm lo pawh ni se kan hnen lo thleng tawh chu hmaih loin ka chhiar chhuak vek thin. Kan veng chanchinbu mimal ta leh YMA buatsaih bakah kohhran mal chanchinbu pawh ka chhiar uluk thin hle. Man chawia kan lak a nih tlangpui avangin ka chhiar loh chuan pawisa insen thlawn na-ah ka ngai tlat. Chanchinbu neuh neuh bakah lehkhabu dang pawh hi tih bik awm chuanglo in ka hmuh ang ang chhiar chawt zel mai mi ka ni.
Hetiang chhiar thin takah chuan tha ka tih thu emaw ka duh khawp lohna ang chi bakah sawi zui chak ka ngah thin hle. Vanglaini chanchinbu in website an siam hnu phei kha chuan tunlai angin chhiar tur la tam ve hek lo, ka va chhiar kimchang thei tak em. Sawi zui chak ka ngah em em lai a comment section an siam takah phei kha chuan ka comment nasa ve thin hle. Thil tam tak ka hriat belh bakah in hrikthlak nan te pawh a lo tha khawp mai. Hun a kal zel a, en tur (website) pawh a lo awm belh ve zel bawk. Computer te han neih ve takah phei chuan site hrang hrangah ka lut kual ve fo a, chung zinga misual.com chu nuam ka ti fal hle.
Mi kan inang lo ang bawkin kan thil post te pawh a in persan thei hle. Comment te dah ve in kei ngei pawhin thil ka post ve zeuh zeuh. Topic hot deuh a awm tum phei chuan nuam ve thin tak a ni. Ka hlawkpui viau rualin mi ti na thei zawnga comment te pawh ka nei ta awm e.
Hun a kal zel a, inkawm hlimna site hrang hrang chu facebook in a rawn thlak ta. A awlsamin hman a lo nuam zawk bawk nen, website pangngai ang nilo a application hran nei a nih bawk avangin thil dang kha chu a lang (thlukna dah tur) ta hle. Luhlul chhuah a la lut awm ve bawk mah se kawm tur awm mang tawh miau heklo, thil pawimawh kan ennawn duh te a nih lemloh phei chuan luh tinah pawh ka tin ta meuhlo a ni e.
Chutih lai karah whatsapp a lo chhuak leh ta zel phei chuan facebook takngial pawh a lan leh ta thawthang e. Mizo, thil awlsam apiang bawh zel mi tan chuan kan chek mil zawng tak a lo ni nen, application dang te chu awm ve leh nual tawh bawk mah se kan hman lar ber chu a ni ta a nih hi.
Social media hian lehkha chhiar min ti thatchhia ti thin bawk mah ila, a chhiar zawng kan la chhiar ve zel tho hi maw. Kan lehkha phek a dang ta deuhah ngai mai teh ang u. Chhiar sen loh a awm ahnu hmanah milem en tur a tam em em a, ngaihthlak chi thlengin a lo awm ta.
Social media kan khawihna hmanrua ber chu mobile phone a ni ta ber a, awmhmunah mahni fon kan kheuh mual muala, bula mi te nen pawh inbe mang loin kan awm ta fo. Hetih lai hian hmun danga thil thleng erawh kan hre hma viau lawi a. A te thamin ken vel a awlsam si. Group hrang hrangah lut kualin kan nui bawk bawk a, thenkhatah tuarpuina thu thawnin thenkhatah kan thinrim kan inhrithla chiam thung. Hetih lai hian pawl, sorkar emaw leh mimal tu emaw phak ang tawk tawkin kan lo selin fuihna thu kan dah ve fo bawk. Hun reilote chhungin thil tamtak kan hmachhawna, kan thil comment atanga kan zia hriat tum tan phei chuan kan hlim nge kan lungngai tih pawh hriat har tak tur a ni ta. Status update in thil kan post chamchi a, thenkhat share/foward tawk a awm bawk. Hetiang zarah hian kei ngei pahin thuziak fahrah te te ka neih ve nual phah a, a chhawr tangkai pawl tak chu ka ni ve awm e.
Hre hmasa ber nih chak avanga thil ning nel tak post hmuh tur a tam a, thil thenkhatah tawngthei zet zet awmin hmeichhia ai mahin mipa kan tawng thei zawk ta mai emaw tih pawh a awl ta rum rum mai. Hmel inhmuh lohna a nih vang nge mawni dawnni.
Heng te a nih nuaih tak avang hian mi tih nat tawk a lo awm a, puitling chin pawhin kan tangkai pui viau rual hian chhiatpuina pawh a va tam si em. Thubuai neih phah pawh kan awm nual reng a nih hi. Kei ngei pawhin mi hriat tham loha buaina, chhungkua leh mimal ang pawhin ka tawng ve ta fo mai. Min tih hlim viau rual hian lungngaihna a va thlen hnem si em.
Engpawhnise, heng thil zawng zawng hi khawvel changkanna in a ken tel a ni miau a, tunhma pawhin a telloin kan awm thei ti mai lo a khawsak pui thiam a pawimawh khawp mai.
Comments
Post a Comment