FEBRUARY 2021, MIZO (RAM) DIARY

1st. Monday : Sihphirah ZPM Thalai Unit din niin, hruaitu thar thlan nghal a ni a, K.Sapdanga, Vice President, ZPM chuan he hun hi a hmanpui. K. Sapdanga chuan, “An tiam tawh an tihhlawhtlin a awm mang loh laia, tiam belh tura hmanhlel politician-te hian kan vote an rawn dil leh anih pawhin, kan in kawngka hawn sak mah ila, kan thinlung kawngka hi chu i khar hnan ve tawh ang u,” tiin Thalai kalkhawmte a fuih.

2nd. Tuesday : Sairengpuii (50) d/o Hualziki, Sihphir chu pumna avangin Civil Hospital-ah a boral. A thih danah mi kut tuar ni a hriat a nih avangin Police-ah FIR thehluh a ni a, pawikhawihtu ni a puh, Lalhmangaiha (40) s/o Hnehliana, Sihphir chu police in an man.

3rd. Wednesday : Vanlalchhanchhuaha kum 26 s/o Thathuan 'L'  Champhai leh Vanlalmalsawma (Ramuka) kum 35 s/o Chhanerh Sangau-I, kar hmasa Inrinni-a Siaha District jail atanga tang tlanchhuak pathum zinga pahnih te chu Sangau-ah man an ni. Heti hian man kim an ni ta.

4th. Thursday : Dr R. Tlangkunga (79) Dawrpui, Mizo zinga Surgeon kan neih hmasak ber pawl chu Civil Hospital Aizawlah lung lam natna (heart attack) avangin a thi. Civil Hospital Aizawlah Medical Superintendant in kum 20 leh thla riat (22.1.1979 - 7.10.1999) a thawk a, hemi hnu hian Director of Hospital & Medical Education hmasa ber niin a pension. 

 

5th. Friday : Sihphira thil hlui humhalhtu pawl, LIDCAS te chuan Mizo history-a hmun pawimawh tak chelhtu, Kawlawia thlan, Sairum rama mi chu an tlawh. Anni hian mumal taka humhalh turin hmalak an tum mek a ni.

6th. Saturday : Covid 19 hripui leng avanga nikum March ni 22 atanga a huhova inkhawm khap anih hnuin  Mizoram hmun hrang hrangah kohhran engemawzat an inkhawm leh tan ta. 

7th. Sunday : Covid-19 hri leng avanga hun rei tak inkhawm theih a nih loh hnu in kohhran tam zawk  te an inkhawm tan leh.

8th. Monday : Mizo National Front chuan Serchhip Assembly bial bye-election neih turah an party Vice President, Vanlalzawma an din tir dawn tih President leh Chief Minister ni bawk, Zoramthanga chuan a puang.

9th. Tuesday : Mizoram leh Assam ramri buai kal zelah Presbyterian Mission School, Synod Mission Compound, Gharmura,  Haiklakandi District-a Mission Headmaster, H. Vanlaldika s/o Sihphir te chhungkua, member panga awmna chuan Assam mipui te kut nasa tak an tuara, an taksa leh an bungrua te nasa taka nghaisak a ni. Thisena inchiahpiah nuaiin  Civil Hospital, Kolasib panpui nghal an ni.

10th. Wednesday : Law & Judicial Minister, TJ.Lalnuntluanga chuan ZOHANCO Special Handloom Expo-2021 chu  Champhai-ah a hawng a, hawnna inkhawmah hian thusawiin minister chuan "Mizo hnam a boral loh nan Hnam ziarang leh incheina vawn nun tlat a pawimawh," a ti.

11th. Thursday : Mizoram Thalai Kristian Pawl rorel vawi 67-na chu BCM Biak In, Electric Veng, Aizawlah neih a ni a, he hunah hian budget atan cheng nuai 13/- pawmin, TKP memberte'n rilru hrisel zawk  neih a nih theih nan MTKP in hmalak nise tih leh fa neih tam in zirtir kawngah MTKP in hma la se tih te an rel.

12th. Friday : Thangzela (38) s/o  Lalkawlliana (17) leh Thanglalduata s/o H. Muana Sunhluchhip khua ve ve te chu, Tuirialah chesualin an pahnih hian an tlahlum. Thangzela leh midang pali te hi Tuirialah hian an riak a. Tlai lamah midang riak ve te bula leng tura an lawngleng hmanga an in karchhuak chu Lawngleng an tibuk palh a, an chesual ta nia sawi a ni.

13th. Saturday : Mizoram Presbyterian Kohhran Hmeichhe bial inkhawmpui chu Zoram hmun hrang hrangah rorel leh hruaitu thlan in   hun hman a ni.

14th. Sunday : Bairabi North Branch YMA Kumpuan duty te chuan phai atanga lo kal, bungraw phur lirthei pakhat atangin sap zu case 34 leh beer case 1 an man a, lirthei khalhtu hnam dang chu a tlanbo.

15th. Monday : T. Pazawna (82) Ramhlun North, Aizawl chu COVID19 kaihhnawih natna avangin a thi. Pu Pazawna hi January ni 30 khan Aizawl-a damdawi in pakhatah inentirin COVID19 a vei tih hmuhchhuah a ni a. ZMC ah admit nghal niin ICU a enkawl a nih mek laiin a boral ta a ni. Covid avanga Mizoram a thi 10 a nihna chiah a ni.

16th. Tuesday : Aizawl Municipal Corporation (AMC) inthlanpui chu tluang taka neih a ni. AMC inthlanah hian chuh tu mi 66 awmin, MNF, Congress leh ZPM ten ward 19-ah candidate an nei kim a, BJP-in ward 19-ah an chuh thung. AMC huam chhunga vote nei mi nuai 2,20,110 in vote annei a, heng zinga 139743 in vote an thlak (63.49).

17th. Wednesday : Nikum November thla atanga neih, Melham Reality International Zo Children's Online Talent Search chu a hmawr bawk a ni ta a, naupang rilru chak, Brandon Lalhriatpuia (5) chu pakhatna a ni. He Talent search-ah hian Mizo naupang talent nei tha mi 100 chuang ten inelna an hmachhawn a ni. Inelnaah hian pahnihna chu Daisy Lalrinkimi (11) Phullen (zaithiam) niin pathumna chu Saidingpuia Sailo (8) Aibawk (khuangpu/drummer) a ni.

18th. Thursday : Tunkar Thawhlehni a thlan Aizawl Municipal Corporation vote chu chhiar a ni ta a,  inthlanah MNF in seat 11 la in sorkar thei turin chakna an siam. ZPM in seat 6 la in INC in seat 2 an la bawk. Tuntum inthlanah hian AMC term hmasaa councillor ni lai mi 7 te thlan tlin leh an ni a, he'ng zinga 5 chu MNF councilor ni lai niin, INC councilor ni lai 2 an tling nawn bawk a, midang zawng chu mi thar vek an ni a, AMC term hmasa vawihniha councilor ni tawh, Rosiamngheta, INC chu tun term-ah hian a tling leh bawk.

19th. Friday : Deputy Chief Minister, MNF Sr. Vice President ni bawk, Pu Tawnluia hoin AMC councillor thlan tharte an thukhawm a, AMC a mawhphur turte  an ruat. Mayor atan Pu Lalrinenga Sailo ruat a ni a, Deputy Mayor atan Pu R. Thanglura ruat a ni bawk. Executive Councillor atan mi pali, Pu Lalringliana, Pu Laltlanzova Khiangte, Pi B. Lalawmpuii leh Pu H. Zonunsanga te ruat an ni bawk.

20th. Saturday : Mizoram State dinhmuna hlan kai champha a ni a, Vanapa Hall-ah Mizoram sawrkarin hemi pual hian hun a hmang.  

21st. Sunday : Inspector, V. Lalbiaksanga Vaivakawn OC, Aizawl Tuithiang veng chu lungphuchawl in a boral.

22nd. Monday : Covid-19 hrileng vanga kum khat dawn lai Mizorama zirna In te khar a nih hnuah sorkar ruahmanna angin   pawl 9 leh pawl 11 zirlaite chuan sikul an kai leh tan ta.

23rd. Tuesday : Mizoram Legislative Assembly, budget session, March ni 17 thlenga neih tur  chu tan a ni.  

 

24th. Wednesday : Mizo National Woman Front (MNWF) te chuan  Mizo hnam runah AMC 2021 inthlana hmeichhe tling tharte lawmpuina hun an hmanga, he hun hi minister, Dr. R. Lalthangliana chuan a hmanpui.        

25th. Thursday : Kepran khaw dai-a kangmei chhuakah kangthelhtu zinga mi, Presbyterian kohhran upa, Upa Zamawia (87) chu a kang hlum.

 26th. Friday : Lalropiangi in, Khawpuar Assam Type chu a kang. Pi Lalropiangi hian  fa pahnih a nei a,   tunah hian Aizawl Civil Hospital-ah damlohna a vangin  awm mek a ni.  

27th. Saturday : Mizo film uhnawm em em mai, scooty film-a a chang tupa Zorinpuia (28), Dinthar veng chu lungphu chawlin a thi.

28th. Sunday : Sairangah bike leh bike na takin an insu a, Samson Lalropuia (21) s/o Kapmawia, Ramthar Aizawl chu a hliam tuar loin Sairang damdawi inah a thi. Bike pakhat khalh tu pawh hi Civil Hospital, Aizawl lamah sawn nghal a ni.