JUNE 2020, MIZO(RAM) DIARY

1st. Monday : Mizoramah  Covid-19 vei mi 12 hmuh chhuah thar a ni. Covid-19 veite hi mi 10 chu Delhi aṭanga rél hmanga rawn haw an ni a, mi pahnih chu motor hmanga Kolkata aṭanga rawn haw an ni. Mipa pakhat leh hmeichhe 11 an ni a, Kolasib district mi 11 leh Aizawl district mi pakhat an ni.

2nd. Tuesday :  Aizâwl Bâwngkâwn thlânmual bul, High School leh Primay School inkâr kawng laiah Lalhminghlua, Armed Vêng ‘S’ leh Vânlalnghâka, Saron Vêngte ruang chhar a ni.

3rd. Wednesday : Lalremtluanga (39), s/o H. Lallura, Sihphir chu Synod Hospital-ah pneumonia avangin a boral.

4th. Thursday : Rajya Sabha MP inthlan, June ni 19-a neih tûrah, MNF Nomination Committee chuan, Pu K.Vânlalvêna, National Core Committee member, MNF Gen. Headquarters chu candidate turin an ruat.

5th. Friday : Bible Society of India, Aizawl Auxiliary chuan hri lêng vânga Mizoram khaw hrang hranga ramri depa duty post hrang hranga dah tûr, Mizo leh Bengali Bible copy 625 chu an thawn chhuak.

6th. Saturday :  Chawnhu khaw naupang pahnih – Lalhriatsânga (13) leh Stephan Vanlalawmpuia (9)-te chu Pu Champion-a sangha dîl tuikhuahah an tla hlum.

7th. Sunday : Falkawn khawtlang chuan Covid-19 lakah an khua leh Mizoram a him theih nan ṭawngṭai rual an huaihawt. Falkawn khua hi dedicated Covid-19 hospital - State Referral Hospital (ZMC) awmna a ni a, tun hnaiah Covid-19 vei hmuh chhuah thar zinga a tam zawk ZMC-ah dah an nih avang leh, ZMC-a thawktu zingah Falkawn mi leh sa an awm nual avangin hripui laka an khawtlang a him theih nan leh Mizoram a him theih nan mahni in ṭheuha ṭawngṭai rual hi an huaihawt a ni.

8th. Monday :  Chief minister, Zoramthanga ho in Assembly Speaker, minister te, sorkar official, Indian Medical Association, Mizoram Government Doctors' Association, Non Government Hospital Asso­ciation of Mizoram, NGO Coordination Committee, Mizoram Kohhran Hruaitu Committee, local council leh village council hruaitute chu an ṭhukhawm a, Mizoramah chawlhkar hnih chhung khauh zawka inkhàrkhip (total lockdown) an rèl.

9th. Tuesday : June 19, 2020-a Rajya Sabha MP inthlana chuh turin   returning officer, H Lalrinawma, Legislative Assembly secretary hnenah mi pathumin nomination an thehlut. Heng mite hi hming pete chu an ni : Mizo National Front (MNF) can­didate aṭangin K Vanlal­vena, Indian National Cong­ress (INC) candidate Dr Lal­lian­chhunga leh Zoram Peo­ple's Movement (ZPM) can­didate B Lalchhanzova te.
 
10th. Wednesday : June 19, 2020-a Rajya Sabha MP inthlana chuh tumte'n nomination an theh­luh chu    endik a ni a, pawm vek a ni.

11th. Thursday : New Delhi aṭanga June 2, 2020-a Vairengte kaltlanga Aizawla lut hnam dang pakhat chu Covid-19 vei a ni tih hmuh chhuah a ni. Hnam dang hi Vairengte aṭangin Pick-up hmangin Aizawlah hruai a ni a, pick-up khalhtu chu Edenthar Veng mi a ni; hei vang hian Edenthar Vengah curfew an puang.

12th. Friday : June 8 aṭanga neih ṭan Lai Autonomous District Council (LADC) budget session chu a ṭiak a, kum 2020-21 budget atan cheng nuai 18,986.91/- an pawm. 

13th. Saturday : Health minister, Dr R Lalthangliana chuan State Referral Hospital/Zoram Medical College-a Covid-19 donaa thawktu te tan vawk talhin zanriah a buatsaih.

14th. Sunday : Sorkarin quarantine facility a siam zinga mi YHAI, Luangmuala dahte zinga mi, Laltlanmawia (48) s/o R Thangchhuaka (L), Zuangtui Vengthar chu zingah quarantine centre aṭangin a tlân bo a;   tlaiah Durtlang Gosen Vengah man leh nghal a ni.   Laltlanmawia hi   Zirtawpnia YHAI hmuna khung hran ṭan a ni.

15th. Monday :  Young Mizo Association (YMA) din champha vawi 85-na a ni a; Covid-19 hripui léng vangin kum dang angin lawm theih nilo mah se YMA branch tam tak chuan mi dang ṭanpuina atan an hmang.

16th. Tuesday : Laldinpuii (22) d/o Zoramchanthanga, Lunglei Bazar Veng (Dip­loma-in Medical Laboratory Technology), F Remruatsanga (21) s/o Lalchangliana, Thei­­riat (Au­xiliary Nurse Midwifery), PC Lalramhmahruaia (22) s/o PC Lalmuansanga, Lunglei Ramthar Veng (Diploma in Medical Laboratory Technology) leh, C Lalthanpuii d/o Dr CT Lalruatthanga, Tlabung Chawnpui Veng (General Nursing and Midwifery)- te chu Covid-19 donaa hlawh nei loa thawk turin an district-a Health department hotute hnenah an inpe. 

17th. Wednesday : Urban Development and Poverty Allevation Department, Mizoram leh Miss Mizoram 2020 Zirsangpuii chuan inremna ziakin Zirsangpuii hi Swachh Bharat Mission (Urban)-a faina leh thianghlimna kalpuina kawngah kum khat chhung UDPA Brand Ambassador a ni dawn. A kum khat term chhung hian Miss Mizoram, Zirsangpuii hian a social media post-te chu Swachh Bharat Mission (Urban) chawi larna atan a hmang dawn a, faina leh thianghlimna chungchanga a follower-te hriat tur post a siam dawn bakah SBM(U), Mizoram activity buatsaihahte a tel dawn a ni.

18th. Thursday : Chief minister, Zoramthanga hoin MLA 15-te'n an MLA-LADS fund aṭangin CM Relief Fund-ah cheng nuai 25/- ṭheuh an thawh. MLA fund thawhtute chu - Zoramthanga, Lalrinliana Sailo, Dr R Lalthangliana, Lalchhandama Ralte, Lalruatkima, TJ Lalnuntluanga, Robert Romawia Royte, Lalrintluanga Sailo, C Lalmuanpuia, Prof. F Lalnunmawia, H Lalzirliana, Vanlalhlana, C Lalsawivunga, VL Zaithanzama, Lalchhuanthanga leh Dr Vanlalthlana te an ni.

19th. Friday : Assembly Secretariat-ah Mizoram Rajya Sabha MP tur thlan a ni a, MNF candidate, K Vanlalvena (50), Bawngkawn, Aizawl a tling.

20th. Saturday : Ramhlun North Branch YMA chuan Endala Middle School-ah thisen pek rûnpui an huaihawt a, Aizawl Civil Hospital tan mipa 150 leh hmeichhia 31-te'n thisen unit 181 an pe. 

21st. Sunday : Khawvel ram, hmun hrang hrangah awkin ni a lem. Ni awk lem hi hmun hrang hrangah mipui tamtakin an thlir a ni. Mizoram atang chuan hmun thuma then hmun hnih vel lemin a lang.

22nd. Monday :   Mizoramah lìr a nghîng a, Mizoram khawchhak lamah in tihchhiat nei nual mah se, mihring thi leh hliam an awm lo. National Centre for Seismology tarlan danin lirnghing inṭanna (epicentre) hi Tuipuiràla Khawbung leh Samthang inkar vel, 23.22 (latitude) leh 93.24 (longitude) inkar a ni a, magnitude 5.5-a ná niin, lei chhungril km. 20 vela thûk aṭanga inṭan a ni.

23rd. Tuesday : Champhai South bialtu MLA, TJ Lalnuntluanga, minister of state chuan a bial Zokhawthar a tlawh a, tun hnaia lirnghingin chhiatna a thlen dante sorkar official-te nen an enfiah a, chhawmdawlna a sem nghal.

24th. Wednesday : Champhai South bialtu MLA, TJ Lalnuntluanga, minister of state leh district official-te chuan   Champhai Vengthar leh Zote inkar kawng zauh leh chei hnûm dan tur an enfiah.

25th. Thursday : BJP, Mizoram Pra­desh chuan   Ai­zawla an pisaah National Emergency Black Day an hmang.

26th. Friday : Khawvel puma Ruihhlo Dona Ní, 'International Day Againts Drug Abuse & Illicit Trafficking' a ni a, he ni denchhen hian Excise & Narcotics department (END)-in ruihhlo an man zinga court-in tihral a phalsak tawh cheng nuai 928/- man hû chu   MJA president Zonunsanga Khiangte-in a hâl ral.

27th. Saturday :
Sports & Youth Services (SYS) minister, Robert Romawia Royte chuan Kolasib, Vairengte leh Kawnpuiah infiamna hmun din dan tur a enfiah. Minister hi Kolasib bialtu MLA, K Lalrinliana, minister of state leh Serlui bialtu MLA Lalrinsanga Ralte ten an ṭawiawm.

28th. Sunday :  Lunglei Civil Hospital (LCH) laboratory-ah Truenat khawl hmangin swab sample 30 endik a ni. LCH laboratory-ah hian  sample 299 endik a ni ta chiah a ni.

29th. Monday : Kolasib bialtu MLA, K Lalrinliana chuan   a bial Diakkawn VC area chhunga MLA-LAD Fund, Excluded Area Grant leh Mizoram Finance Commission Grant hmanga hnathawh a hmunah kalin a enfiah a, MLA fund hmanga sak Neuva Section YMA Chawlhbuk chu a chung siam danah duhthu a sam loh thu sawiin, steel structure hmanga nalh zawk leh tha zawka siamtha tur leh estimate pawh siam tha leh turin a ti. 

30th. Tuesday : Remna Ni a ni a, Mizo National Youth Front (MNYF) chuan  he ni pual hian  Aizawl leh district khawpui hrang hrangah thisen pek rûnpui an huaihawt a, thisen unit 264 an pe. A petute hi mipa 234 leh hmeichhia 30 an ni.