1st. Wednesday : School Education minister, Lalchhandama Ralte chuan thuchah tichhuakin, Covid-19 leng chu a kian hun tur sawi theih a nih loh avangin sikul luh ṭan hun tur pawh sawi lāwk theih a ni lo tih a puang a; zirlaite chu zirlaibu zir tur an neih loh pawhin, lehkhabu ṭha leh ṭangkai chhiar ṭhin turin a chah.
2nd. Thursday : Mumal takin blood donation camp neih theih a nih rihloh avangin Association for Voluntary Blood Donation, Serchhip Branch leh Serchhip District Hospital in an ngen angin Serchhip Vengchunga mi paruk leh Chhimvenga mi palite'n Blood Bank-ah thisen unit 10 an pe.
3rd. Friday : Coronavirus léng avanga Supreme Court thuchhuak angin Mizorama jail-a táng mekte leh thubuai nei mek mi 338-te chu ngaihdamna (remission) hmang leh intiamkamna (PR bond) hmangin jail aṭanga chhuahtir an ni. He'ng mite hi thiamloh chang (convict) tawh zinga an tàn hun hmang tlingtla hnai tawh mi 48 leh pawikhawihtu a puha an chungthu ngaihtuah mek (under trial) avanga jail-a táng (judicial custody) zinga thil sual tih vanga vawikhat man tâwk mi 290 te an ni.
4th. Saturday : AVBD leh NSS state office ruahman angin Aizawl Civil Hospital-ah blood donation camp neih a ni a, NSS volunteer mipa 34 leh hmeichhia 4 te'n thisen unit 38 an pe. Thisen petu te hi Aizawl North College NSS-te'n unit 14, T Romana College NSS-te'n unit 16 leh Mizo Higher Secondary School NSS te'n unit 8 te an ni.
5th. Sunday : Zan dar kua-a minute 9 chhung Prime Minister, Narendra Modi in Covid-19 hri leng mek kan dona kawnga kan inlungrual a ni tih lantir na'n kan in theuha light zawng zawng off-in a ai-ah mombati, diyas leh phone light te ti eng zawk tura ram mipuite min ngenna chu mi engemawzatin an zawm. Hetihlai hian, Hindu sakhuana (myth) nena inkungkaihna nei ni'a ngaih avanga zawmlo engemawzat an awm bawk.
6th. Monday : Lunglei College NSS volunteer-te chuan Lunglei Civil Hospital blood bank-ah thisen unit 17 an pe a, petute mipa 16 leh hmeichhia pakhat an ni.
7th. Tuesday : Champhai-a personal protective equipment (PPE) volunteer group chuan Champhai-a damdawiin, quarantine centre, village task force leh police-te hnenah Covid-19 laka invenna hmanruate an sem.
8th. Wednesday : Rajya Sabha MP hlui leh Mizoram Legislative Assembly speaker hlui, Hiphei (82) chu Aizawl Civil Hospital-ah stroke leh pneumonia vangin a thi. Hiphei hi MLA inthlanah kum 1972, 1978, 1979, 1984, 1987, 1989 leh 2013-ah INC ticket vekin thlan tlin a ni a, kum 1972-ah hian deputy speaker a ni. Kum 1984-ah minister of state a ni a, kum 2013-ah Assembly Speaker a ni. Parliament-a upper house Rajya Sabha-ah term hnih : Kum 1990-1996 leh kum 1996-2002 chhung member a ni bawk. Hiphei hian a nupui, Sathlie leh a fate, panga a kalsan.
9th. Thursday : UPC (NEI) chuan Covid-19 léng chungchangah Pathian ṭanpuina dilin chaw nghei-in an ṭawngṭai.
10th. Friday : Union Health minister, Dr Harsh Vardhan ho-in state hrang hranga health minister-te leh department official-te'n video conferencing hmangin Covid-19 dona-a hmalak dan leh hmachhawpte an sawiho. He hunah hian Health minister, Dr R Lalthangliana pawh a tel a, Mizoram dinhmun te sawiin, mamawhte a thlen nghal.
11th. Saturday : Covid-19 laka mipui an him zawk theih nan Chief secretary, Lalnunmawia Chuaungo chuan vantlang hmuna chil chhah khapna thupek a ti chhuak.
12th. Sunday : Bilkhawthlir South Village Task Force duty te'n Bilkhawthlir ram chhunga Phaiphengah hnam dang (vai) mi 21 an man. He'ng mite hi North Tripura leh Karimganj lam mi an niin an khaw lama haw tum niin an in sawi.
13th. Monday : Mumbai Mizoram House-a damlo inenkawl mek Mizo hmeichhe pakhat chu Covid-19 a kai tih hmuh chhuah a ni a, Meghalaya-a a hmasa ber turin Mizo doctor pakhat chuan Covid-19 kai tih hmuh chhuah thar a ni bawk.
14th. Tuesday : Covid-19 hrik pai leh pai loh enfiahna hmanraw pakhat, Viral Transport Media (VTM) 1,800, Indian Council of Medical Research (ICMR) aṭanga an rawn thawn chu Indian Air Force (IAF) thlawhna-in Lengpui Airport-ah a rawn thlenpui a, Zoram Medical College-ah lak nghal a ni.
15th.Wednesday : Dr John L Sailo (69), Meghalaya chu Covid-19 avangin a thi. Mizo zinga he hri avanga nunna chan hmasa ber a ni.
16th. Thursday : Melbuk khua chuan CM Relief Fund aṭangin ṭanpuina Rs.10,000/- an dawng a, mahse, CM Relief Fund-ah Covid-19 do na'n a ṭula hman turin an hlan lêt.
17th. Friday : Lawngtlai district chhunga Myanmar ramri hnaiha awm, Archhuang kai checkpost-a police duty commander, Hav. F Lalthansanga, 2nd MAP, Lunglei, Lunglawn chu zachhamlak in a thi.
18th. Saturday : Nasa taka thli a tleh avangin Sairanga Bisnu Hemborn te in chu a bula thing tluin a delh a, Bishnu fanu, Lallawmkimi (thla 4) chu a thi. Thingin in a delh lai hian inah an chhungkua-a mi panga an awm a, pa ber erawh hmun dangah hna thawka a awm lai a ni.
19th. Sunday : Mizoram páwn aṭanga mipui nitin mamawh leh bungraw pawimawh luh ṭanna Vairengte leh Bairabi-a lirthei lutte phuh thianghlim (disinfection) hna thawk turin Fire & Emergency Services chuan kâng ṭhelh motor (fire tender) pahnih an tîr chhuak.
20th. Monday : Aizawl Civil Hospital Blood Bank-ah Pachhunga University College NSS unit-te'n thisen unit 36 an pe a, a petute mipa 33 leh hmeichhia 3 an ni.
21st. Tuesday : Gospel Speaker, Tv. Frederick Lalrindika leh a rawngbawlpui mi 3 te chuanna Ford Endeavour MZ-01/M-9669 chu Rangvamual leivung paihna thlangah chesualin kawngthlangah an tlan liam a, metre 150 vel lumin an motor a chhe hneh hle. Vanneihthlak takin thi an awm lo hlauh a, hliam tenau erawh an nei hlawm.
22nd. Wednesday : Aizawl Bawrhsap Pisapui chu kum 130 a tling a, a lawmna hun hman niin, Aizawl SP, C Lalruaia'n a hmanpui. Pisapui kum 130 tlin lawmna atan hian pisa kawtah thil hlui engemawzat an phochhuak.
23rd. Thursday : 23rd. Sector Assam Rifles hnuai-a 46th. Assam Rifles chuan Central YMA hnenah a mamawh apiangte hnena an pek turin eitur leh duty-te mamawh tur hrang hrang an pe. AR-te thilpek hi CYMA vice president, Lalhmachhuana'n a dawng a ni.
24th. Friday : Hliappui-ah rial nasa taka a tlak avangin in engemawzat a chhia.
25th. Saturday : Adventist Youth Federation, Aizawl chuan Aizawl Civil Hospital-ah thisen unit 55 an pe a, a petute mipa 42 leh hmeichhia 13 an ni.
26th. Sunday : Vairengte VC-I Village Level Task Force Comittee chuan phai lam aṭanga nitin mamawh ni lemlo Mizoram sorkar in Mizoram a phurhluh a phalrai tak vang leh nitin bungraw phur lirthei 200 chuangah lirthei khalhtu leh a puitute an lo luh reng avang te in Mizoram leh Assam ramri-a volunteer duty te chu an hna chawlhsan turin an ko haw. Hetih lai hian Vairengte chhimlama awm, VC-II, VC-III leh VC IV te chu a ngai angin an la duty reng dawn thung.
27th. Monday : YMA Sub-Headquarters, Champhai chuan, member 196 awmna SYMA Anti Covid-19 Squad-te chu ramri-a duty turin an tír chhuak.
SYMA Anti Covid-19 Squad member atan hian SYMA Champhai huam chhunga ṭhuthmun branch ramri dep khua ni lote zawn a ni a, branch hrang hrang aṭangin ruihhlo laka fihlim thlan a ni. Tirhchhuah te chu hmun 28-ah inṭhen darhin, Zokhawtharah team pariat an lut a, a bak zawng chu ramri dep khua-ah an insem darh dawn a ni.
28th. Tuesday : C Lalramnghaka (52) s/o C Liansanga, Dâwn chu electric current-in a man avangin a thi. Lalramnghaka hi P&E department a thawk a niin Dawn aṭanga Hnahthial lam km. 2 vela hla-ah Hnahthial aṭanga Lunglei lama power pekna 33KV enfiaha zawm (jumpering) turin a kal a ni. A haw har avang leh a chhungte'n vawi tam tak phone-a biak an tum pawha a chhàn theih loh avangin a kalna-ah an enfiah a, electric hrui a zawmna hnuaiah thiin an hmu ta a ni.
29th. Wednesday : Yangoon, Myanmar-a Presbyterian kohhran upa, Hmangaiha chu Covid-19 natna vangin a thi a, a ruang hi hâl ral nghal a ni. Hmangaiha fate zinga mipa pakhat pawhin Covid-19 a vei a, damdawi-inah enkawl mek a ni. A nupui leh a fapa dang pakhat chu endikna-ah Covid-19 vei lo-a hmuh ni mah se, khung hran mek an ni.
30th. Thursday : Vaphai Branch YMA chuan Corona Virus (Covid 19) avanga lock down hun hman mek a nih avanga harsatna tawk chhungkaw khat chu Buh tuh pui-in Branch Executive Member-te an hnatlang.
Comments
Post a Comment