* Kumi'n chhung hian Sihphir khua-ah mitthi 26 (hmeichhia 14, mipa 12) lai an awm a, (heng zinga 12 hi nupa tangthen anni) hmun dang atanga rawn zin/hnathawk boral hi pahnih an awm bawk. Kuang siamsaka an khaw lama thawn chhuah an ni. Sihphir thlanmuala phum (ruang awm chiahlo) pakhat a awm bawk. Thi hmasa ber chu Pi Zairemthangi w/o Lalthanzama (L) January ni 1, kumthar ni a thi kha a ni a, hnuhnung ber chu tunkar Thaehtanni a thi, Lalthafamkima (21) s/o Vanlalruala, Chhanhim veng kha a ni. Nikum (2018) chhung khan mitthi hi 36 kan nei a ni. Tin, kumi'n chhung hian Venghlun lam pawhin mitthi hi 26 bawk an nei ve a ni.
* V/C member, Pu Lalnelawma, MPC ticket-a thlan tlin chuan MNF party a zawm. Pu Nelawma hi MPC Gen.Hqrs Treasurer ni lai a ni nghe nghe. Tin, Vice-Chairman, ZPM MP Election Coordination leh Chairman, Aizawl East-I North Block Chairman te a ni bawk.
Pu Lalnelawma hian Mizo Hnam Runa an lawmluhna-ah thusawiin "MP inthlan lo awm tura naupuak thlauh thin Congress (MPCC) thawhpui tura thuthlukna an siam hi MPC ruhkawl, thisena than hnan leh theihtawp lo chhuah thin hian ka thei tawh ngang lo va. MPC chhuahsana MNF zawm turin thuthlukna ka siam ta a ni," a ti. Pu Nelawma hi kum 2015 VC thlan khan MPC ticket-a thlan tlin niin vote 711 a hmu a, thlan tlin zingah vote hmu sang pathumna a ni.
* May ni hnih, 2019 a ni a, chanchinthar vela an puan kan hriat danin HSLC result chhuah ni tur a ni tih kan hre fur. Mi nawlpui chuan kan hriat kha duhtawkin kan vei zui lem in a lang lo. Exam hmachhawn tute leh chu'ng mite chhung khat te
chuan an ngaihven viau in a rinawm. Result chu a lo chhuak ta ngei a, Mizorama thiam ber chu kan khua in kan nei nawlh mai. Hnuk pawh a ulh rum rum hial mai. Top ten huang a lang hi chu kan nei ve zauh zauh tawh a, a ber han neih em chu kan suangtuah phak vakin a rinawm lo. Amah chu Lalrinnungi (Nungnungi) d/o Zothantluanga, Neihbawia ni.
A ni hi lehkha thiam thei a nih mai piahlamah a taima ve thawkhat viau niin a lang. A taimak em avanga ber nihna hauh thei pawh a nih hmel. Sihphir khua hi tunhma atangin mi taima khua
anga hriat lar kan ni thin. Kan Topper-i pawh hi chutiang huang chhunga dah chi pawh a ni ang. A nu hi kharchhawnga eizawng a ni a, chu chu Nungnungi chuan zak miahloin a pui ve lawp
lawp thin. Ama zarah lehkhathiam khua ni mai loin mi taima khua nih pawh kan hlawh phah zel thei dawnin a lang a, a lawmawm takzet a ni.
Full mark 500 a mark - 486 (97.2%) zet hmutu Nungnungi hi ni 23.03.2003 khan Zothantluanga leh Lalhlimpuii te inkarah a lo piang a, unau pianpui pathum neiin a mah hi a naupang ber a ni. Zirna hi Young Learner's School, Sihphir a tanin tunah hian a pass chhuahna, St. Joseph HSS-ah a zir zawm leh a ni.
Pakhatna a ni tih hriat a nih veleh Branch YMA hmalâknain Durtlang Leitan-ah lo hmuah a ni a, Arpu-ah châwimâwina hun hman a ni bawk.
Hetih lai hian 2nd Mission Veng Open Chess - One Day Rapid Tournament, C.YMA Hall a khelhah Sihphir Chess Club atangin Pu Cosie Rorelkima, Kawn Veng chu a champion bawk. Hei pawh hi rampum huap a niin Mizo zinga Chess khel thin, 'Kei ka ni' inti chu an kim viau ni'a sawi a ni.
* Sihphir khua-a pa lar leh mi pawimawh ber te zinga mi, VC President hial ni tawh, Pu Khawlrimawia (78) h/o Pi Mangchhuani, Arpu chu Grace Hospital, Aizawlah 'Chuap Cancer' avangin a boral.
Pu Khawlrimawia hi pa thothang tha leh mi hlim thei tak, tha a tih leh a duhloh zawng erawh pehhel kual lova tlanghrawk a sawi mai chi, pa ngainatawm tak si a ni. V/C member term 3 ('87-'90, '97-'99, 2006-2008) niin, 2006-2008 khan President hna a chelh bawk. VCP a nih lai hian khawtlang tan a sikul pawimawh tak leh kan chhawr zui em em ni zui ta Sihphir Higher Secondary School leh UPHC, building tha tak mai hi a din a ni.
Fa hi mipa 4 leh hmeichhia 3 neiin, Kohhran leh khawtlang tana mi chhuanawm tak tak an ni hlawm.
Veng khatah pawh pa fel nih a har em em lai-a V/C member mai bakah President hial ni thei a ni a, a uiawm takzet a ni.
* Sihphir khua-a a hmasa ber ni turin Sihphir Air Rifle Club te chuan Multipurpose Indoor Hall kawt, Arpu-ah 1st. Air Rifle Shooting Competition an buatsaih a, silai kap thiam 30 vel zet an tel a ni.
Competition neihna senso atan hian V/C ten Rs 3,000/- an pe a, tualchung mi inphal engemawzatin tanpuina pawisa an pe bawk.
He hunah hian meter 10, 20 leh 35 te a inel a ni a, pakhatna theuh te chu 35 Mtr, Pu Lalhmunmawia w/o Zomawii Arpu, 20 Mtr Pu Malsawmsanga s/o Lalrosanga Theihaingaw leh meter 10-ah Pu Malsawmsanga s/o Lalrosanga, Thrihaingaw te an ni.
* August ni 21-31 chhunga SAFF U-15 Championship, 2019 Kalyani, West Bengal-a khelhah Sihphir rawlthar Isac Zomuanpuia s/o Lalthazuali Ralte, Arpu chuan India champion puiin Cup a chawi. Sihphir rawlthar Isaka telna India team-ah hian Mizo dang Amosa Lalnundanga, Chanmari, Aizawl chu a tel ve bawk. Asia khawmualpui chhim lam ram te inkhelh na South Asian Football Federation (SAFF) Under-15 Championship-ah hian India team hi an champion chiang hle. An champion mai nilo in an goal a virgin hial a ni. Final-ah hian group stage-a an sawp tawh hnu Nepal chu tum leh in a hma aia chianga sawpin 7-0 in an hneh.
Blue Tigers (India team sawina) hian league round match hmasa berah Nepal hi 5-0 in an lo sawp tawh a, thenawm ram hian final-ah phuba lak theih in beisei viau mah se a aia tam goal an chhuah ta zawk a ni. Nepal bakah Bhutan 7-0, Sri Lanka 5-0 leh Bangladesh te chu 4-0 in an hneh bawk a ni. Indian rawlthar rual hian inelna neih chhung zawngin match nga an khelhah goal 28 an khung a, an lamah a lut miah lo. Goal 28 zingah hian Isaka hian goal khat khungin assist hi vawi li a nei bawk. Final khelh hma hian a inhliam avangin a tir atangin a a lut nghal lo a, mahse, coach hian a duh em avangin bench atangin a lut leh ta tho a ni.
Tunah hian TATA Trust COE tan contract neiin a khel mek a, heti chung hian ram tan a khel ve reng bawka, tunah pawh hian India camp, Goa lamah awmin Krismas chawlh hmangin a lo chhuak mek a ni.
* Hunrei tak atang khan kan khawchhung kawng chhe lutuk hi kan hre vek awm e. Youth Action for Sihphir Town Development (YASTD) chu hemi chungchangah hian lungawi loin Gauhati High Court, Aizawl Bench-ah dt. 3.5.2018 khan YASTD President Pu Zorempuia hmingin Public Interest Litigation (PIL) thehluha ni a. High court chuan thu tlingah ngaiin WP(C)(PIL) 46/2018 ziak lutin, texnder chhangtu M/s Nidhi Creative Infrastructure (P) Ltd . Silchar kawng chu an siam ta mup mup mai.
Kawng siam a chhiat that thu-ah khawtlang thalai, nu leh pa te an tangkai hle mai a, a lawmawm takzet a ni.
* Mizoram State Games (MLA Constituency inelna) chu tluang taka neih a ni a, he hunah hian kan bial (constituency) chu a pumpui-ah pakhatna niin Gold 25, silver 18 leh bronze medal 16 te kan la. Aizawl West -1 chuan gold medal 21 la in min dawt. Inelna-ah hian kan bial hi infiammi thawh hnem ber niin 315 kan thawh a, heng zinga 30 chuang mah tur hi Sihphirin kan thawh ve a, medal pawh kan thawhchhuak ve nual a, keimahni avanga constuency champion ni pawhin a insawi theih awm e. Contingent mai bakah official hi pathum, Vansangkima d/o Lalnunzira, Neihbawi (arm wrestling), C. Lalmuanpuii w/o Lalringngheta Damveng (fencing) leh Lalhlanmawii w/o Peter Lalrinnunga, Kawnveng (Wushu) te an awm bawk. Infiamna hi khawpui chhung hmun hrang hrangah neih a ni a, heng zinga Sepaktakraw chu Sihphirin Community Hall-ah kan thleng a ni.
Comments
Post a Comment