1st. Monday : Suzuki Gixxer SF 250 20th. Inter Branch YMA Football Tournament chu Aizawla khelmual hrang hrangah khelh tan a ni. Tuntum tournament-ah hian team 110 an tel a ni.
2nd. Tuesday : Durtlanga Basic Service to Urban Poor Building pali, chhawng li theuh a sang chu a chhak lei tawlhin a nawr avangin a chim. In chimah hian mi pathum thiin, hliam 11 an awm bawk.
3rd. Wednesday : Mara Autonomous District Council-a MDC hlui, V. Lalchhawna lehkhabu ziah, 'Rambuai leh kei' (Pathian min hruaina) tih chu MZP Conference Hall-ah Minister, K. Beichhu-a'n a tlangzarh. Lehkhabu-ah hian rambuai intan dan leh hun harsa tak Mizoramin a hmachhawn dan te a chuang.
4th. Thursday : Mizoram Muaithay Association buatsaih, 16th. Mizoram State Muaithay Championship - 2019 chu Ramhlun Boxing Hall-ah khelh tan a ni. Tuntum championship-ah hian Zoram hmun hrang hrang atangin infiam mi 168 an tel.
5th. Friday : Economics & Statistics department buatsaih, 'Statistical Handbook Lunglei-2019' chu Lunglei DRO pisa-ah tlangzarh a ni. Hetatanga a lan danin Lunglei khawpui chhungah hian veng 23 awmin mihring 60,847 an cheng mek a ni.
6th. Saturday : Vairengte leh Lailapur (Assam) inri na-a State pahnih ten ramri fello lai a nih avanga kutthlakloh ve ve tura kum 1994 a Chief Secretary ten hming an lo ziah hnan na hmunah Assam Forest Department ten kut an rawn thlak avangin buaina tenau a chhuak.
7th. Sunday : Presbyterian kohhran chuan Health Sunday (chawhnu) leh Hospital Sunday (zan) an hmang. He'ng ni chihnih te hi tunhma chuan ni hrana hman thin a ni a, kum 2006 atang khan Pathianni vawikhatah a ruala hman a lo ni ta a ni.
8th. Monday : Kolasib DC, Zoengsanga chuan District Hospital a tlawha, an dinhmun te a zirchiang. DC chuan doctor te chu dawhthei taka tawngkam nem nen damlo te enkawl thin turin a chah.
9th. Tuesday : Lunglei District Football Association buatsaih, LDFA Super Cup-2019 chu Thuamluaia Mualah khelh tan a ni. Tournament-ah hian team 14 an tela, Chanmari FC chu champion lai an ni.
10th. Wednesday : Ruah nasa taka a sur avangin Sihphir leh Lungdai inkarah leiminin kawng a hnawh a, Sihphir khawtlangin an thianfai leh nghal.
11th. Thursday : Mizoram People's Conference party chuan an pisa-ah General Assembly an hmanga, he hunah hian kum 2019-'21 hruaitu tur an thlang nghala, president tang lai, Pu Lalchhandama Sailo chu president atan thlan leh a ni.
12th. Friday : Mizoram chu Best Horticulture State Award hlan a ni. 9th. Agriculture Leadership Award - 2019 hi New Delhi-ah neih a ni a, lawmman hi Agricultural Department, Director, Elizabeth Saipari'n a dawng a ni.
13th. Saturday : Chief Minister, Pu Zoramthanga pian champha (birthday) vawi-75 na a ni a, CM hian a birthday pual hian a bial chhunga mi harsa zual te hnenah tanpuina engemawzat a sem.
14th. Sunday : Aizawl Traffic Police-te chuan Vanapa hall-ah Aizawl Traffic Sammelan leh infuih tharna hun an hmang a, DIG (Nothern Range) Lalbiakthanga Khiangte in a hmanpui. Inkhawma an tarlan danin Aizawla kawngpui sei zawng hi kms. 297 a ni a, transport department-ah nitin motor 40-50 register thar ang a ni bawk.
15th. Monday : Ni li awh, United Nations in tualto hnam te chungchang a inhmuhkhawmna, Expert Mechanism on the Rights of Indegenous People's chu Geneva, Switzerland ramah tan a ni a, sawm an nih angin ZORO consultant pahnih, Lallian Puia Sailo leh Lalruatpuii te an tel.
16th. Tuesday : Ministry of Home Affairs chuan IPS Officer, DGP ni tawh thenkhat a siksawi a, Arunachal Pradesh DGP ni lai, SBK Singh chu Mizorama awm tura tih a ni a, Mizoram DGP ni lai, Balaji Srivastava chu Pondicherry DGP-ah a awm thung ang.
17th. Wednesday : July ni 11-a Tlawng lui-a tla, C. Lalfakzuala (53), s/o LN Tluang(L), Gov't. Complex, Aizawl chu khawtlang huapa ni sarih chhung zawn a nih hnu pawha hmuh a nihloh avangin khawtlang huapa zawn hna chu tih tawp a ni.
18th. Thursday : Home Minister, Pu Lalchamliana chuan MZP General Secretary hnenah lehkha thawnin,. Mizoram Chief Minister hmasa ber, Ch. Chhunga leilet hmun, Bairabi Zophai-a 'Zofate Chawlhbuk' sak chu state sorkar ang chuan a rem rihlo-a an ngaih thu a tarlang. MZP te hian nikum khan chawlhbuk hi an lo sa tawh a, mahse, Assam lam ten an an thiahsak avangin sak leh ngei tumin hma an la mek a ni.
19th. Friday : MZP bultumin Aizawlah 'Ramchhan' kawngzawh a ni a, Aizawla college zirlai engemawzat an tel. Kawngzawhna-ah hian resolution panga pass a ni.
20th. Saturday : Central YMA buatsaih branch hrang hrang te tan football-a inelna chu a hmawrbawk (final) a ni ta a, final-ah hian Chanmari branch chuan Armed veng branch chu 4-1 in an hneh. Chanmari branch hian ₹ 1,00,000/- leh trophy an dawng a, best player leh best keeper lawmman an dawng bawk.
21st. Sunday : India-in British laka zalenna a sual lai-a India tan zalenna sualtu Mizo zinga la dam awmchhun (ni'a hriat), Darthawma (98), Lunglei chu a thi.
22nd. Monday : Champhai Venglai Branch KṬP chuan an kohhran hall-ah blood donation camp an huaihawt a, Champhai District Hospital tan thisen unit 37 an pe a, thisen petute hi mipa 28 leh hmeichhia 9 an ni.
23rd. Tuesday : July ni 21 aṭanga chin hriatloha bo, Rochuailova (40), s/o Lalhmachhuana, Tuipui-D chu Darzo ramah thi a hmuh a ni. Rochuailova hi balu la-a eizawng ṭhin a ni a, a lawng enfel tura a kal chu chin hriatlohin a awm ta a ni.
24th. Wednesday : MPCC chuan Lal Thanhawla Auditorium-ah hruaitu thar an thlang a, president atan president ṭang lai, Pu Lal Thanhawla chu chuhtu awmlo a thlan nawn a ni.
25th. Thursday : Lunglei District Inter Club Batminton Tournament - 2019 khelh mekah Lunglei Bazar Batminton Club player, C. Lalropuia (30), s/o Lalzama (L) chu heart attack avangin a thi.
26th. Friday : Mizoram puma harhna thlen ṭum thumna, kum 1919 kuma harhna thlen kum za na (Centenary) a ni a, he hun hi harhna thlenna hmun pathum zinga Thingsai khua a kohhran hrang hrang te chuan hlim takin an lawm. July ni 26, 1919 kumah Thingsai, Nisapui leh Zotlangah te harhna hi a rualin a thleng a, a hnu-ah Zoram pum a kang kai a ni.
27th. Saturday : Champhai-a nitin chanchinbu pakhat, Rihlipui editor, DK Lalhruaitluanga (39), s/o R. Laihnuna (L) chu thin ṭhalo avangin Ebenezer Hospital, Aizawlah a thi. DK Lalhruaitluanga hian a nu Vanlalhmuchhuaki, a nupui Laldinpuii leh a fate pathum a kalsan.
28th. Sunday : India Under-15 (football) chuan Thailand rama tour nei turin India ram an chhuahsan. India team-ah hian Mizo rawlthar pahnih : Lalthangliana (midfielder) leh Issac Zomuanpuia (forward) te an tel.
29th. Monday : MPC General Headquarter Vice President, Lalthansanga (Chatea) leh hruaitu engemawzatin MPC chhuahsanin ZPM an zawm tih Aizawl Press Club-ah thuthar thehdarhtu te hnenah an sawi.
30th. Tuesday : Serchhip District FA buatsaih Independence Day Football Tournament chu Serchhip Sports Stadium-ah khelh ṭan a ni a, hetia'ng hi inkhel result a ni : Hmarveng FC 9-0 Dress Up FC,
FC Serchhip Kawnpui 5-0 New Serchhip 'N' FC,
Vengchung FC 5-0 Bazar veng FC, Thenzawl
Chanmari FC 5-1 FC Serchhip Kawnpui II.
31st. Wednesday : Indian Medical Association (IMA) chuan zing dar ruk aṭangin sorkar laipuiin Lok Sabha-ah Medical Council of India thlakna tur dan National Medical Commission Bill a pass avanga ram puma darkar 24 chhung nawrh an huaihawt chu ṭan a ni a, hei hi IMA Mizoram State Branch pawhin an thlawp a ni.
Comments
Post a Comment