JANUARY 2019, MIZO(RAM) DIARY

1st. Tuesday : Zairemthangi (58) w/o Lalthanzama (L), Sihphir chu stroke avangin a boral. 2nd. Wednesday : Chanmari Branch YMA, Aizawl chuan kumdanga an lo tih thin angin, Chanmari Kawnah New Year Concert an buatsaih leh a. Veng mipuite bakah hmun hrang hrang atanga chhimtute leh kawngpuia veivak ten an hlut hle. 3rd. Thursday : Deputy Chief Minister, Pu Tawnluia chuan, kum 2018-ah Mizo mipuite'n ram rawngbawl hna thawk turin MNF-te an thlan tlin thu sawiin, "Huapzo sorkar din kan tum," tiin thuthar thehdarh tute hmaah a sawi. 4th. Friday: Tourism Department-in Aizawl khawpuia 'Christmas Street Decoration 2018' a huaihawt chu Tourist Lodge, Chaltlangah lawmman sem a ni a, khawlai chei, mawi ber chu Ramhlun South a niin, a cheitu Ramhlun South Nuvalai hnenah lawmman Rs 4,00,000/- hlan a ni. 5th. Saturday: Sport Minister, Robert Romawia Royte chuan North Eastern Council sum hmanga Muallungthu khuaa football leh hockey khelmual siam mek a tlawh. Minister hi Lalrinsanga Ralte, MLA chuan a tawiawm. 6th. Sunday: Kum 2019 atana Pathianni hmasa ber a ni a, kohhran hrang hrang te chuan Sunday Schooo hming ziah thar ni atan an hmang. 7th. Monday: Mizoram Presbyterian Synod Office chu kum 2019 atan an hawng ṭan a, Synod Office hawn ṭanna-ah hian Pathian hnena inhlan tharna inkhawm buatsaih a ni a, Synod moderator Rev. R. Lalhmingthanga hoin hun an hmang a ni. 8th. Tuesday: North East Student Organisation (NESO) bul tumin India hmarchhak state hrang hrangah The Citizenship (Amendment) Bill, 2016 duh loh lantirna leh dodalna lantirna atan total bandh huaihawt a ni a; Mizoramah pawh MZP-in zing dar 5 aṭanga tlai dar 4 thleng total bandh an huaihawt. Bandh hian mipui thlawp a hlawh ṭha hle a, Sorkar pisa, zirna-in te, dawr leh sumdawnna hmunte khar vek a ni. 9th. Wednesday: All India Postal Employees Union (AIPEU) chuan India ram pumah lungawi lohna an lantir a; Mizoramah pawh hei hi thlawpin AIPEU Mizoram Divisional Branch chuan lungawi lohna lantir ve in Dâkinpui leh dak-in dangte khâr nih bakah, Dakinpui bulah thawktu eng emaw zat an kalkhawm a ni. 10th. Thursday: Council of Ministers chief minister Zoramthanga hoin Chief Secretary's conference hall-a ṭhukhawm chuan Mizoram sorkarin thisen sawngbawlna man, blood processing fee a lak chu tihtawp a rel a, hman nghal tura tih a ni. Health minister Dr R. Lalthangliana chuan, "Mipuite chhâwk zângkhai kan duh vanga blood processing fee lak ṭhin titawp kan ni," a ti. 11th. Friday: Mzorama missionary hmasa ber, Pu Buanga leh Sap upa te Mizoram an lo thlen champha vawi 125-na a ni a, Baptist Church of Mizoram te chuan uar takin an hmanga, kohhran pawl dang ṭhenkhat hmang an awm bawk. 12th. Saturday: Mizoram Ṭhalai Kristian Pawl (ṬKP) president hmasa ber, R. Lungruala f/o Rev Zosangliana Colney, Chaltlang chu a thi. ṬKP hi kum 1951 a ding a ni. 13th. Sunday: Mizoram Presbyterian kohhran hnuaia pastor leh probatory pastor, an awmna sawn, nemngheh leh dahngheh thar te chu an awmna tharah lakluh an ni hlawm. 14th. Monday: Chief Minister, Pu Zoramthanga chuan Prime Minister, Narendra Modi chu a chenna inah hmuin The Citizenship (Amendment) Bill, 2016 chu Mizoram sorkar leh Mizoram mipui ten kan duhloh thu a hrilh a, Mizoram tana pawimawh engemawzat a sawipui bawk. 15th. Tuesday: MJA General Headquarter chuan Aizawl Press Club-ah kum 2019 atan Pathian hnenah an inhlan thar. Inkhawm hi an pawl vice president, R. Lalhmangaihzuala'n a kaihruai a, president, Zonunsanga Khiangte chuan fuihna thu a sawi. 16th. Wednesday: Tourism Minister, Robert Romawia Royte chuan New Delhi-ah Union Tourism Minister, KJ Alphons chu a hmu a, Mizoram mamawh thil tamtak a sawipui. 17th. Thursday: Home Minister, Pu Lalchamliana chuan a pisa-ah Mizo Students' Union hruaitute a kawm a, Mizoram leh hnam himna tur thil chi hrang hrang an sawiho. 18th. Friday: Mizoram University chuan under graduate first semester, third semester leh fifth semester exam result a tichhuaka, zirlai exam 18,930 zinga 11,611 in an pass-a, pass parcentage hi 61.34% a ni. 19th. Saturday: ZPM Legislature Party Leader, Pu Lalduhoma chuan Brigade Parade Ground, Kolkata-a Mega Rally naah thu a sawi a, The Citizenship (Amendment) Bill, 2016 avangin Narendra Modi kaihhruai sorkar laipui chu na takin a sawisel. Mega Rally-ah hian mi nuai sawmli vel an kalkhawm a, India rama political party hruaitu hrang hrang ten thu an sawi. 20th. Sunday: Myanmar hotulu (councellor) Aung San Su Kyi chuan Myanmar ramchhunga Zo hnahthlak tamna, Chin State a tlawh a, Rih dil a tlawh nghal. Hetia'nga a zinna-ah hian hian Mizo thuamin a inthuam a ni. 21st. Monday: Chakma Autonomous District Council (CADC) Rest House-ah Lawngtlai DC, N. Chakhai chuan Chief Executive Member (CEM) atan MNF Legislature Party Leader, Rasik Mohan Chakma chu rinawmna thu tiam tirin a lalut. CADC-ah hian MNF-7, Congress-8 (MDC pakhat a thih hnu-ah pasarih) leh BJP-5 an nei ṭhin a, tunhnai-ah Congress MDC pali ten MNF an zawm avangin MNF in MDC 11 neiin sorkarna an siam thei ta chiah a ni. CEM thar hi ṭumhnih CEM a lo ni tawh a ni. 22nd. Tuesday: Mizoram sorkar-a dan, The Mizoram Liquor (Prohibition & Control) Act hnuaia zu zuar ten Gauhati High Court, Aizawl Bench-ah sorkar-in December ni 21, 2018 - January ni 14, 2019 leh January ni 15, 2019 - March ni 10, 2019 thlenga dry day an puan chungchangah inrawnkhawmna awmloa hun rei tak dry day puan chu inpalzutna ni'a an ngaih avang leh an zu kawl lai te ho mai maia a riral mai hlauhthawn thu-ah Mizoram sorkar a khing a, court chuan sorkar lam te January ni 25 thleng insawifiah turin a ti a, January ni 29 ah ngaihtuah leh turin tih a ni. 23rd. Wednesday: MZP chuan The Citizenship (Amendment) Bill, 2016 an duhloh zia lantirna leh dodalna lantir na atan Aizawl mai bakah hmun hrang hrangah hnam chhanna kawngzawh an huaihawt a, mipui thlawp an hlawh hlawm hle. 24th. Thursday: Aizawl Theological Collage-a SCMI unit buatsaih, 'Mizo Identity Bihchianna' tih lehkhabu chu Principal, Rev. Prof. Vanlalnghaka Ralte in a tlangzarh. Lehkhabu-ah hian mithiam 17 thu ziak a chuang a ni. 25th.Friday: 5th. B. Lalthlangdika Memorial Open Arm Wrestling Championship chu Ignite Studio-Khatla-ah neih a ni a, a pumpui-ah Zotea Ramhlun chu a champion. 26th. Saturday: Mizoram hmun hrang hrangah Republic Day vawi 70-na lawm a ni a, mahse, NGO Co-Ordination Committee in an boycott avangin mipui telloa hman a ni. A hmanna pui ber AR Lammual, Aizawla neihah chuan Governor, Kummanam Rajasekharan chuan hnam puanzar a pawtpharh. 27th. Sunday: Zirtawpni zan aṭanga ṭan, Presbyterian kohhran hnuaia Kristian Ṭhalai Pawl, pastor bial conference chu a ṭiak. 28th. Monday: Environment, Forest & Climate Change minister, TJ Lalnuntluanga hoin a pisa-ah kumi'na 'Kangmei venna hapta' hman dan tur ngaihtuahin Sub-Committee on Fire Prevention an ṭhu a, kangmei venna hapta hun atan February ni 11-16 an ruat a, kumi'n a lo hal hun hnuhnung atan March ni 15 an ruat bawk. 29th. Tuesday: Gauhati High Court, Aizawl Bench-in January ni 22-a sorkar-in dry day a puan rei lutuk avanga zu zuar ten an khinna chu court thuchhuak angin ngaihtuah leh a ni a, March ni 31 thlenga sorkar-in dry day a lo puan tawh chu sut a ni. Amaherawh chu, Pathianni leh national holiday dry day a ni chhunzawm anga, kumi'n Chapchar Kut lo awm tur pawh an duh anih chuan sorkar chuan dry day atan an puang thei dawn a ni. 30th. Wednesday: Nihnih awh tur Urban Development & Poverty Alleviation (UDPA) department chuan Aizawl Art Gallery-ah 'Art Workshop-cum-Exhibition' an buatsaih a, School Education Minister, Lalchhandama Ralte in a hawng. Art Workshop hi Swachh Bharat Mission (Urban) hnuaia UDPA hmalakna thar a ni. 31st. Thursday: Kum 2013-a MLA inthlan dawna affidavid diklo thehluta puh, Chief Minister hlui, Pu Lal Thanhawla thubuai chu Serchhip District Court-ah ngaihtuah a ni a, March ni 6-a ngaihtuah leh tura tih a ni. Pu Hawla chuan kum 2013 inthlan dawn khan Kolkata-a a ram hi neitu nihna doucument a la neihloh avangin affidavid-ah hian a ziah lan loh thu a sawi.