Skip to main content

JULY 2018, MIZO(RAM) DIARY



1st. Sunday: Presbyterian kohhran chuan Health Sunday leh Hospital Sunday atan an hmang. Chawhnu hun hi Health Sunday anga hmangin 'Zu leh a kaihhnawih' tih an zira, zan hun hi Hospital Sunday anga hmang ve thungin 'Nat tinrenga na te tidamtu Isua' tih an zir thung.

2nd. Monday : Salvation Army dinchhuaktu, William Booth pian champha vawi-115 na a ni a. Salvation Army chuan 'Founder Day' ti'a vuahin khawvel pumah an hmanga, Mizoramah pawh India Eastern Territory chhunga corps leh society ten kawng hrang hrangin an lawm.

3rd. Tuesday : Mizoram University (MZU) a Incubation Centre din thar chu Governor, Kummanam Rajasekharan chuan a hawng. Centre hi sorkar laipui atang sum hmuh cheng vbc 10.45/- seng din a ni a, sq. feet 20,000 a zau niin 3D room leh fabrication / prototype lab. te a awm nghal.

4th. Wednesday : Lawngtlaia Region Higher Secondary School NSS unit chuan an sikulah blood donation camp an huaihawt a, Lawngtlai District Hospital tan thisen unit 56 an pe a, thisen petute hi mipa 41 leh hmeichhia 15 anni.

5th. Thursday : Assembly Speaker, Pu Hiphei chuan a bial chhunga Chakhei khuaa NEDP hnuaia hnathawh mek, Solar Water Pumping Scheme chu a hmunah a enfiah. Chakhei khua chawmtu tur siam nan hian cheng nuai 272/- ruahman a ni.

6th. Friday : Mizo Hmeichhe Insuihkhawm Pawl (MHIP) day vawi - 44na a ni a, Mizoram hmun hrang hrangah kawng hrang hranga hman a ni. MHIP Day lawmna hi General Headquarter hruaitute chuan hmu  hrang hrangah insem darhin an hmanpui a, President, Pi Saipuii chuan Vairengte leh Bilkhawthlirah te a hmanpui.

7th. Saturday : MNF party dintu leh chief minister hlui ni bawk, Pu Laldenga thih champha a ni a, Aizawl Treasury Square-a a thlanah party hruaituten hriatrengna pangpar an dah. Pu Laldenga hi kum 1990 khan London-ah a thi a ni.

8th. Sunday : Sihphir Pastor Bial Kristian Thalai Pawl ten nizan atanga Sihphir Venglai Kohhrana Half Year Meet an hman chu a tiak. Meet-ah hian thupui 'Tunlai thil awmzia'  (Rom 13:11) tih chu hman a niin speaker atan Rev. Remlalfaka, Registrar, MTC chu hman a ni.

9th. Monday : Central YMA hruaitute leh Synod Social Front hruaitute chu Synod Executive Secretary, Rev. B. Sangthanga pisa-ah an inkawma, ruihhlo do dan tur sawihoin thawhho an rel.

10th. Tuesday : Champhai collage chuan an multipurpose hall-ah Fresher's Social leh Graduation Day an hmanga, Champhai North bialtu MLA, Pu TT Zothansanga'n a hmanpui.

11th. Wednesday: Labour Union of Mizoram, Serchhip district  hmalaknain Serchhip a Mizoram Building and Other Constructions Workers Welfare Board (MBOCWWB) a inziak lut mi 610 hnenah educational assistance Rs 12,20,000/- sem a ni. Hei bakah hian awareness campaign an nei nghal.

12th. Thursday: Mizoram leh Assam ramri zirchiang tura Mizoram sorkarin a din, Core Committee hnuaia Task Team chuan ramri enfiah thawhkhatna an zo. July ni 16-ah thawhkhatna neih leh tum a ni.

13th. Friday: Zodin Cinema Hall thin hmuna Multi Level Car Parking cum Utility Centre sak tur lungphum chu UD&PA Minister, Pu Zodintluanga'n a phum. Minister chuan Multi Level Car Parking chu Mizorama khawl hmanga car park na hmasa ber tur a nih thu a sawi.

14th. Saturday: Champhai North Constituency chhunga Khuangphah Village Council member pathumte (VCP telin) te chu Dr. ZR Thiamsanga'n MNF-ah a lawmlut.

15th. Sunday: Sihphir Venglai Presbyterian kohhran chuan Pathian ram thilpek an lakhawma, heta an thawhlawm lakkhawm hi Rs 5,51,925/- lai a ni.

16th. Monday: Rengdil lal hnuhnung ber, Lalzamanga (92) s/o Thankunga chu a thia, vuiliam nghal a ni. Lalzamanga hi kum 1951-ah a pa a thih avangin a lal tana, kum 1954-a lal ban a nih thleng khan Rengdil khuaah hian a lal a ni.

17th. Tuesday: CADC meeting chu Raj Bhavan-ah neih a ni a, Governor leh Chief Minister ten an telpui.

18th. Wednesday: Meisavaih West-a V/C te training na hmun tur, District Panchayat Resource Centre chu Pu Hiphei, Speaker in a hawng.

19th. Thursday: LPS Youth Icon 2012 third place, Melody Lalsawithangi (28) chu Synod Hospital-ah a thi.

20th. Friday: Tui tla an awma awlsam leh remchang zawk a awm theih nan Kolasib District Disaster Management Authority leh YMA Sub-Headquarter, Kolasib tangkawp chuan District Park, Thingdawlah tuichhunga luh zirna, Scuba Diving Training an buatsaiha, Kolasib DC in a hmanpui.

21st. Saturday:Aizawl Civil Hospital tan Adventist Youth Federation in thisen unit 85 an pe a, a petute hi mipa 79 leh hmeichhia 6 an ni.

22nd. Sunday: Champhaia Excise & Narcotic deptt. leh Khuangleng VDP tangkawp chuan Khuanglengah heroin gram 151 leh a neitu a puh, R. Lianchhingi (49) w/o C. Laldingliana, Khamrang ni a inchhal chu an man. Hetih rual hian an manna motor leh a neitu pawh man nghal a ni bawk.

23rd. Monday : Chhinga veng FC chuan tualchhung football session thara nomawi chawi theih hmasa ber, Lalbiakliana MFA Supper Cup-ah Lalrammawia goal hmangin Chanmari FC chu 1-0 a hnehin an chawia, anni hi nikum lam pawh khan champion an ni tawha, an title an humhim.

24th. Tuesday : New Delhi-a Venezuela Embassy-ah Venezuela ram zalenna, kum-207 na tlin lawmna leh Venezuela-India Youth Dialougue 2018 neih a ni a, he hunah hian MP, Pu Ronald Sapa Tlau chu khuallian a ni.

25th. Wednesday: MZP chuan March thla a Bairabi Zophaia chawlhbuk sak an tum naa Assam police ten an bungrua an tihchhiat sak te man hu hmuhlet na'n Aizawl khawchhung hmun hrang hrangah vehbur khawn hnatlang an tan.

26th. Thursday: Mizoram Gov't. Lumpsum Grant-in-Aid Higher Secondary School Assn. (MIGLAHSSA) luh lumpsum aided HSS awmna khaw pakuaa School Managing Board, Joint Student Union leh Joint Action Comtt. chuan an thil phut sorkarin a tih hlawhtlin loh avangin tiamchin awmloin anmahni khua theuha zirna in leh sorkar pisa te an khara, kawngpui an dang bawk.

27th. Friday: Lunglei District Football Assn. hnuaia inelna lian siamthar, LDFA Supper Cup vawikhatna chu a hmawrbawk a ni a, he hunah hian Chanmari chuan Ramthar chu 4-1 a hnehin champion hmasa ber anni.

28th. Saturday: MNF President, Zoramthanga chuan kumi'n MLA inthlanah Aizawl East-I biala din a tum thu MNF Zemabawk group ten YMA hall a free medical clinic an buatsaih a hawnnaah a sawi.

29th. Sunday: Sihphir Venglai Presbyterian kohhran chuan thlaithar thawhlawm lakkhawm inkhawm an nei a, hetah hian mahni thlai thar ang ang te kengkhawmin an lilama, thlai nei remchang lo ten pawisa faia an thawh khawm nen heta an sum hmuh zawng zawng hi Rs 18,068/- a ni.

30th. Monday: Mizorama lumpsum grant-in-aid HSS pakua te adhoc grant-in-aid a hlankai phut vanga kawngpui dang te chuan an kawngpui dan te an ti tawp. Hetih lai hian sikul leh sorkar pisa khar erawh an la kalpui zel thung.

31st. Tuesday: Mizoram hmun hrang hrangah Draft Electoral Roll tlangzarh a ni.

Comments

Post a Comment

Popular posts from this blog

KUM ZA CHHUNGA MIZO HMEICHHIATE DINHMUN

 1. Tunhmaa an dinhmun : Kan pi pu te khan 'Hmeichhe finin tuikhur ral a kai lo', 'Hmeichhia leh uipui chu lo phun lungawi mai mai rawh se' tih leh 'Hmeichhe hna, hna ni suh, chakai sa, sa ni suh' tih te hi an ṭawng duh dan a ni a, hetaṭang hian hmeichhia te an dah hniam ṭhin zia a chiang viau awm e.  Nula in inleng a neihin an mi ngei zawng tak pawh ni se, biak chhiat an ngaitheilo a, ngaihtheih loh chu sawi loh, thianglo hialin an ngai a ni. Khawvar tirh aṭangin hna an ngah nghal hle mai a, tuichawi, buhden, ei rawngbawl, chawei siam leh a seng fel. An kuta awm vek a ni. Pi pute hunlai kha chuan an eizawnna hi a inang ṭhûma, lo neih a niin an feh tlut tlut ringawt mai ṭhin a, chuvangin, Mizo hmeichhia te chuan hetia'ng nikhua hian feh tur mamawh zawng zawng hi an tihtura ngaih vek a ni a, an emin an phurh vek a ngai bawk ṭhin. Mipa chuan iptepui an ak ve hram chauh a ni.  Feh haw'n kawngah lah hmeichhia chuan em khatin in lam mamawh an phur haw ...
Post a Comment
Read more

CHANCHINBU MAN KHAWN A HUN LEH DAWN TA

  Thlatina Inrinni hnuhnung ber hian chanchinbu man khawn a ni tlangpui a, thlathar Inrinni hmasa ber leh remchang danga khawn pawh kan awm zeuh zeuh bawk. Thla a lo tawp (Inrinni hnuhnung ber) leh takah hian chanchinbu man pek lamah tan i la teh ang u. Kan chanchinbu hi thla khat lak man cheng 30 kan ti a ni a, heti hian a mah leh a mah a intum tawk vel viau a ni. A man pawh a lut tha tlangpui a, a lawmawm. Chutihrualin, pek lam ngaihsak lutuklo kan awm leh zeuh thin erawh a zialo thin khawp mai. Chanchinbu hi naupang semtir thin a ni a, a man khawn thu-ah pawh anni hian an keng tlang mai thin. Naupang an nih avang tak hian thenkhat hian zahlo taka lo tawngkhum in 'min pe ngai silo a, a man khawn hre hlur ringawt mai' tih an hlawh fo niawm tak a ni.  Thenkhat chhiar duh si a man pe duh manglo te pawh an awm niin a semtute hnen atangin thu kan dawng fo. A zialo khawp mai. Tin, pe emaw intia pe silo te pawh a awm theih a nia. Naupang rilru thianghlim tak te an ni a, rilru sual ...
Post a Comment
Read more

BIBLE CHHIAR

Lehkhabu, a kawm dum, a changtupa thihna ‘Bible’ kan tih mai hi hi khawvela lehkhabu darh zau leh copy pawh tam ber a ni awm e.  He lehkhabu hi chatuan nunna kawng min kawhhmuhtu lehkhabu hlu tak a nih avangin chhiar ngei tur a ni a; a chhiar ve lo pawh chhiar tura in fuih a tul bakah hnam hnufual zawk te pawh chhiar tur chhawp chhuah sak theih hi a tul ngawt mai. Chutiang atana mi thahnemngai tlem azawng an awm pawh hi a tihzia e. Tunhma chuan nitina chhung inkhawm nei thin kan nia; (tunah erawh ‘tunlai chuan mihring kan tul tawh a’ tih chhuanlam tute zingah ka tel ve ta.) chu’ng lai chuan ka pa hian kumthar project-ah ka u hnenah Thuthlung Thar bu pumpui hi chhiar chhuak turin a tia;  kei Chanchin Tha bu li te, tin, ka naute pahnih chu Sam bu chhiar turin a ti bawk. Ka unau dangte khan ka pa  ngenna kha an ti hlawhtling ta em? ka hre ta chiah l’aw, kei erawh chuan ka tih hlawhtlin mai bakah Thuthlung Thar zawng zawng chu ka chhiar ta vek a, ka tui tak zel avangin Thu...
Post a Comment
Read more