1st. Friday : Urban Development and Poverty Alleviation Minister, Pu Zodintluanga chuan Durtlanga Economically Weaker Section (EWS) Housing Complex chu a hawng. Minister chuan in luahtute chuan an awm duh chhung chu an awm theih tur thu a sawi.
2nd. Saturday : Lei a chet avanga MG Road, Khatlaa Bible house thiah tak chu a thlanga GAD quarter-ah sak tum a ni a, Chief Minister, Pu Lal Thanhawla'n lung a phum. Lungphum inkhawm hi BSI Aizawl Auxiliary President, Rev. Dr. H. Vanlalauva'n a kaihruai.
3rd. Sunday : Ruah sur nasa avangin Tuirini luia motor kaikaina tur YMA in an siam chu a chhia.
4th. Monday : MFA leh MHIP buatsaih GIG Motor's Inter Branch MHIP Football Tournament chu a hmawr bawk a ni ta a, final-ah hian Champhai Sub-Headquarter leh Kolasib Town an intuma, Champhai hi (2-2)(4-2) a chakin an champion. Champion team hian trophy bakah ₹50,000/- an dawng.
5th. Tuesday : PWD in Tut lei an dawh thar chu Chief Minister, Pu Lal Thanhawla'n a hawng. Lei hi meter 11.25 azau a niin meter 128 a thui a ni.
6th. Wednesday : Aizawl FC chuan coach atan nikum lama Nercoa coach Gift Raikhan chu an la thar tih an puang. Gift Raikhan hian kum khat atan contract a ziak.
7th. Thursday : Thingdawl khaw dintu, an lal Peter Vanhnuaia hriatrengna lungphun chu Chief Minister, Pu Lal Thanhawla'n a hawng.
8th. Friday : Saitual Joint YMA chuan an khuaah Blood Donation Camp an buatsaih a, Aizawl Civil Hospital tan thisen unit 66 an pe a thisen petu te hi hmeichhia 20 leh mipa 46 anni.
9th. Saturday : LBS Suzuki, Bawngkawn chuan khawvela producttion bike chak ber, Suzuki Hayabusa chu a vawikhat nan an hralhchhuak. Bike hi ₹ nuai 13&4/- man lai a ni.
10th. Sunday : Hero Intercontinental Cup khelh mek chu a hmawr bawk a ni ta a, final-ah hian India chuan Kenya chu si hnih faiin an hneh. Final match hi Mizo player pathum in an khel ve a ni.
11th. Monday : Mizoram hmun hrang hrangah 'Green Mizoram Day' hman a ni.
12th. Tuesday : Secretariat Conference Hall-ah Jeevan Raksha Pradak Award - 2017 sem a ni a, mi panga in award hi an dawng a ni. Inkhawm hi Home Secretary, Pu Lalnunmawia Chuaungo in a kaihruai.
13th. Wednesday : Mizoram Social Defence & Rehabilitation Board chuan Secretariat Conference Hall-ah 'Technical Meeting on Accreditation of De-Addiction Centre's in Mizoram' an buatsaih a, ruihhlo enkawlna kalpui dan chungchang an sawiho.
1 4th. Thursday : Lunglei District Football Association hmalaknain Thuamluaia Mualah Charity Match khelh a ni a, hetah hian Mizo Professional Footballer Association (MPFA) Team leh Lunglai DFA Team an inkhela, MPFA hi 3-2 in an chak. Inkhelah hian Mizo Footballer lar te an tel tha hle.
15th. Friday : YMA Day vawi 84-na a ni a, Mizoram leh rampawn hmun thenkhatah mahni remchan dan anga hman a ni. He hun hmanpui hian Central OB te chu insem darhin hmun hrang hrangah an kal chhuak. President, Pu Vanlalruata chuan Venghlui Branch-ah a hmanpui.
1 6th. Saturday : Muslim sakhaw zuitute chuan Id Ul Fitr chu hmun hrang hrangah an hmang. A hmanna pui ber Aizawla Mizo High School Field-ah chuan Aizawl Mosque-a iman, Maulana Bilal Ahmed chuan a kaihruai.
17th. Sunday : Mizoram Presbyterian Kohhran chuan 'Rualbanlote Ni' an hmang. Kumi'n a an thupui chu 'Piansualin tlai luat a neilo' tih a ni.
18th. Monday : Kar hmasa Zirtawpni atanga chin hriatloha bo Lalhminga (35) c/o Partinthangi, Zokhawthar ruang chu Tiau lui, Kelkang ngawli-ah hmuh a ni.
19th. Tuesday : Mizoram Underground Returnees Association (MURA) chuan an pisa-ah chawngheia nawrh an huaihawt leh. MURA te hian thla tir lama ni kaw chhung chaw an nghei hnu-ah sorkar lam hotu te nen an inbiak avangin chawnghei hi an ti tawp lailawka, an lungawi theih loh avangin hetiang hian an chhunzawm leh ta a ni.
20th. Wednesday : Gauhati-Aizawl Maxi Cab, AS11-4052 chu Badarpur leh Kalain i karah a ke a puah avangin a chesuala, motor-a chuang mi 11 zinga 5 in hliam an tuar.
21st. Thursday : Romuanpuii Zadeng lehkhabu ziah 'Inleh' tih chu Prof. Dr. Laltluangliana Khiangte chuan a tlangzarh.
22nd. Friday : AH & Veterinary Department leh NEIDA tangkawp chuan Serchhip YMA Hall-ah vawk hri leng (PPRS) leh Swine Fever chungchang inzirtirna leh Animal Health Camp an huaihawt a, ran 347 endik a niin a thlawnin ran damdawi an sem ngal.
23rd. Saturday :TKP Co-ordination, Aizawl chuan Bawngkawn BCM kohhran hall-ah blood donation camp an huaihawt a, pastor bial pathum atangin member 149 in thisen an pe. Thisen petute hi hmeichhia 23 leh mipa 126 anni.
24th. Sunday : Tunkar Zirtawpni atanga tan Synod Revival Meet, Bawngkawn biak ina neih chu a tiak. Thupui chu 'Sim rawh u' tih a ni.
25th. Monday :, Finance Minister, Pu Lalsawta chuan Central Jail a tlawh a, jail enkawl tute nen jail hungchhunga hmun hrang hrang te fang kualin an en dik. Tun dinhmunah jail-ah hian thawktu 114 an awm a, tang 638 an awm mek bawk.
26th. Tuesday : Ruihhlo hman khawloh leh tawlh ruk dona ni 'International Day Against Drug Abuse & Illicit Trafficking' a ni a, he ni hmanna Lammualah chuan ruihlo man sa tam tham tak halral a ni. Khuallian, Chief Minister, Pu Lal Thanhawla chuan ruihhlo chu ram hmasawnna tithuanawp tu a nih thu a sawi.
27th. Wednesday : Ni hnih awh tur Mizoram Legislative Assembly session tan a ni. He hunah hian Pu R.Lalzirliana put luh, 'The Sinlung Hills Council Bill, 2018' chu lungrual taka pass a ni. Session-ah hian April thlaa thi MLA hlui, Pu PB Nikhuma (89) sunna hun hman nghal a ni.
28th. Thursday : Nimina tan tak Assembly Session chu tluang taka neih leh a nih hnuin a tiak. Tun tum session hi tun sorkar term chunga a hnuhnung ber tur a ni. Tun sorkar term chhung hian session tum 16 neih a niin dN 48 pass a ni.
29th. Friday : Hero Xtreme 200R chu Millennium Centre kawtah tlangzarh a ni.
30th. Saturday : Remna ni a ni a, Mizoram hmun hrang hrangah hman a ni a, Aizawl-ah chuan MZP bultumin Pachhunga University Collage Auditorium-ah hman a ni.
Comments
Post a Comment