1st. Sunday : Mizoram chuan harsatna lian tham awm lovin Kum Thar, 2023 a hmuak thleng.
2nd. Monday : Bangladesh aţangin Lawngtlai district-a Parva khua-ah raltlan 17 an lo luh belh. Raltlan lo lutte hi chhungkaw 5 a mi te an ni.
3rd. Tuesday : Champhai Bethel Veng Presbyterian Pastor, Rev. F. Lalrinawma (54) chu an in chung lawnna step-ah chesualin a a boral. Rev. F. Lalrinawma hian a nupui leh a fate mipa pahnih a kal san a ni.
4th. Wednesday : Bilkhawthlir Kuhva Chingtu te chuan Oil Tanker MZ 01 C 4265 hnamdang khalh aṭangin danlo a lakluh Burma Kuhva ro engemawzat an man.
5th. Thursday : Agriculture,I&WR & Cooperation Minister, Pu C.Lalrinsanga chuan a bial chhunga Buarpui khuaa Helicopter tumhmun tur (Helipad) chu a hawng.
Buarpui Helipad hi MLA Fund ațanga siam a ni a. A hawnna neih dawn hian Mizoram-a service mek Pawan Hans Helicopter hi Helipad-ah hian Minister hi a tawiawmtute phurin a rawn țum nghal nghe nghe.
6th. Friday : Lok Sabha MP, Pu C. Lalrosanga chuan sorkar laipui chu Bangladesh atanga Mizorama himna rawn zawngtute hi mihring dan pangngai anga enkawl an ngaih thu a hrilh.
7th. Saturday :
Mizote zinga Football khawvel a thlengsang ber, age level leh senior team thlenga India football captain ni thei awmchhun, Mizote zinga India tana goal thun hnem ber leh a khelh laia hlawh hnember, Jeje Lalpekhlua kum 33 na a ni a, Social Media kaltlangin lawmpuina engemawzat a dawng.
8th. Sunday : Mizoram Presbyterian Kohhran hnuaia Pastor bial thar vawng tur te chu bial hrang hrangah thlahna inkhawm neih a ni.
9th. Monday : Deputy Chief Minister, Tawnluia chuan New Delhi-ah sawrkar laipuia Ministry of Housing and Urban Affairs Secretary, Manoj Joshi a hmu a, UD&PA Department hmalakna hrang hrang leh hmachhawp te a sawipui.
10th. Tuesday :
Minister, Lalrinawma chuan a bial chhunga Chalphai leilet te, Ngentiang, Lungpho leh Rullam khuate a thlawh a; khawtlang hruaitute nen inkâwmin, khawtlang mamawh leh hmasawnna tura hmachhawp hrang hrang te te an sawiho.
11th. Wednesday : Kum 2023, Presbyterian Kohhran Hmeichhe Inkhawmpui Lian chu March 10 - 12, 2023 chhungin Darlawnah neih a ni dawn a. Hemi atana hman tur, Pandal chu Darlawn GSA Playground, Venghlunah sak tan a ni.
12th. Thursday : Chief Minister, Pu Zoramthanga chuan Sihphir V/C House leh Rohrenga Hall a hawng.
13th. Friday : Aijal Club Conference Hall-ah National Disaster Management Authority, MHA, Government of India leh Disaster Management & Rehabilitation Department (DM&R) tangkawpte chuan State Level Workshop on Landslide Risk Mitigation Scheme a buatsaih a. Home Minister, Pu Lalchamliana'n a hman pui.
14th. Saturday :
Lunglei Battalion Headquarter 23 Sector Assam Rifles, Headquarter Inspector General Assam Rifles (East) hnuaia awm ten Sapi khua mipuite hnenah Army leh Assam Rifles te hnathawh leh an mawhphurhna hrang hrang an hrilhfiah a, Army leh Assam Rifles a tan duh te tan kawng kawhhmuhin helam kawnga hriatchian duh neite tan engtiklai pawha hun an pek theih thu an sawi bawk.
15th. Sunday : Presbyterian Kohhran, hnuaia Pastor bial 108-ah Pastor leh Pro-Pastor dahnghehna inkhawm bial hrang hrangah neih a ni. Tuntumah hian pastor 57 an awmna hmuna an awm hun hmang zo tawh leh a awmsa siam rem leh pastor nemngheh tharte 9 te chu an awmna hmun turah dah ngheh an ni a. Mission field a thawk tur pastor 17 te leh pro pastor thar 10 bakah pro-pastor awmna siamrem mi 9 te nen an vaiin mi 108 te dahnghehna inkhawm neih a ni.
16th. Monday : Chawngte atanga Aizawl pana tlan, gypsy, MZ-01 F 0805 chu Melthumah a chesuala, Chakma Autonomous District Council-a MDC pahnihin, Mohesh Baron Chakma leh Charan Singh Chakma te an boral. Motor-ah hian mi panga chuangin MDC pahnih te bakah hian nunna chan dang pakhat awm bawkin, midang pahnih te hian hliam an tuar bawk.
17th. Tuesday : NABARD (RIDF-XXIV) sum Rs.528,99,000/- hmanga Rural Development Department hmalakna, Springshed Development & Water Supply for Chalfilh Catchment Area chu Rural Development Minister, Lalruatkima’n Khanpui-ah a hawng.
Hawnna inkhawm Khanpui Bazar-a neihah Pu Lalruatkima chuan, ramin hma a sawn rualin chenna leilung leh boruakin chhiat lam a pan a, tuihna te a lo tlem tial tial thung a; ramngawte leh tuihna te siam thar leh turin khawvel ram lian te leh India sawrkar ngei pawhin nasa takin hma a la, a ti.
18th. Wednesday :
Kar khat awh tur, National Girl Child Day, 2023 lawmna chu Social Welfare Minister, Er.Lalrinawma’n a pisa-ah a hawng a, district hrang hrangah he hun hi hman ve nghal a ni bawk.
19th. Thursday :
State Task Force Committee for Immunization chu Committee Chairman, Pi Esther Lalruatkimi IRS, Principal Secretary, Health & Family Welfare Department hovin a office ah an thu khawm a. Natna hrang hrang laka invenna, Immunization programme kalpui mek te leh Mizoram dinhmun te, programme thar kalpui leh turte nen an thlirho.
20th. Friday : Lawngtlai District Level Monitoring Committee (DLMC) chu an Chairman, Lawngtlai Bawrhsap, Amol Srivastava hovin Lawngtlai DC Conference Hall-ah an ṭhu khawm a. "Centrally Sponsored Scheme - Formation and Promotion of 10,000 FPOs" hma lakna hnuaia Lawngtlai District chhunga RD Block pathum - Bungtlang 'S', Chawngte leh Sangau huam chhunga kut hna thawktute in tel khawmna cooperative society chi khat, Farmer Producer Organisation (FPO) din chungchang an sawiho.
21st. Saturday : K.Lalrinliana, Supply Minister, Kolasib Assembly Constituency bialtu MLA ni bawk chuan RD Department leh MLA-LADS hmang a sak, Project Veng Futsal Ground hawngin MLA Cup 2023 Kolasib District Open Futsal Tournament a hawng nghal bawk.
22nd. Sunday :
Zuangtui-ah bike pakhat chuan a hmaa truck tlan pelh a tumna lamah tluin truck hnuaiah a inbarhlut a, bike khalhtu, Lalrampâra (27) leh a nupui Lalmalsawmhlui (23), Muanna vengte chu a hmunah an thi nghal.
23rd. Monday : Chapchar Kut Organising Committee chu an Chairman, Chief Minister, Zoramthanga hovin CM Office Conference Hall-ah an thukhawm a, he hunah hian kum 2023 March ni 3 a Chapchar Kut lawm dan tur an rel.
24th. Tuesday : Higher & Technical Education Minister, Dr. R. Lalthangliana chuan Pachhunga University College Research Conclave 2023 chu PUC Seminar Hall-ah a hawng.
25th. Wednesday : Dr K Beichhua, MLA chu MNF a a nihna (primary member) atanga chawlhtir a ni.
26th. Thursday : India ram danpui hman tanna ni, Republic Day chu India ram hmun dang te rualin Mizoram hmun hrang hrangah lawm a ni a, a lawmna lian ber Aizawl a sipai Lammuala neihah Governor, Hari Babu Kambhampati chuan India Hnam Puanzar pawtparhin Parade contingent 26 ten Hnam Puanzar zahna chibai an buk chu a chhanglet.
27th. Friday : Champhai police, Chalbâwiha Junction Khankâwna duty-te chuan heroin gram 279 (hâwng 22), international market-a chêng nuai 139/- chuang man chu Lalthâwmluaia (33), Sindihai, Myanmar nia inchhâl kut aṭangin an man.
28th. Saturday : Sêrchhîp mi, Pu Rohmingthanga (35) ruang chu an kawmthlang lawkah hmuh a ni.
29th. Sunday : Bilkhawthlir Kuhva Chingtute chuan, Vairengte lam aṭanga rawn chho, truck ke 12 nei motor pahnih; NL-02/L-3795 leh NL-01/K-7475 te aṭangin Myanmar kuhva ro tam tham tak man an man.
30th. Monday : Pu Robert Romawia Royte, Minister, Sports & Youth Services, Tourism, ICT, etc. chuan Mizoram Open Boxing Championship, 2023, Serchhip District Boxing Association ten an buatsaih chu a hawng.
31st. Tuesday : Aizawl Sipai Lammualah North Eastern Council Golden Jubilee ropui takin lawm a ni a. Chief Minister, Pu Zoramthanga chuan khuallian niin a hmanpui.
Comments
Post a Comment